Alat ragam biak gheih di bhap bini Raglai meng kan dahlau caik veik nan lac Chapi hu ngak meng nding kreim. Chapi bhian hu mikva me-in dalam dom harei rija, dom harei roya di bhap bini, yau harei mbang akaok padai bahrau,  rija klaak kubo, harei tết nguyên đán, atau hadei di tuk ngak bruk glaih glar di angaok hamu puh. Da-a mikva saong taong abih gauk pang ong Nguyễn Văn Lâm – Akaok jabat ilamu thể thao huyện Ninh Sơn, tỉnh Ninh Thuận ndom biai ka alat ragam biak gheih ini.

PV: Salam ong, dahlau di abih, likau ndua dhar phor ong hu mbaok dalam danak dak. Pathau ong, mbaik Chapi nan lac sa dalam dom alat ragam di urang  Raglai, yau nan ong meda khan brei thau hasit ka mbaik Chapi ini, hu halei oh ong?

Ông Nguyễn Văn Lâm: Mbaik Chapi di urang Raglai nyu hu sap yava yau dom alat ragam bo urak ini drei bhian me-in hu nốt đồ, rê, mi, pha, xon, la, xí.. dom nốt nan nyu samu saong dom talei dalam mbaik Chapi, paik tagok nyu hu dom nốt, dom sap yava

PV: Maong gah lingiu mboh mbaik Chapi biak mbuan ngak, min piah ngak hu nyu oh lac mbuan, urang ngak tabiak mbaik Chapi brei hu tangin gheih ngak, njauk halei oh ong?

Ông Nguyễn Văn Lâm: Piah ka mbaik Chapi hu sap bingi pang urang brei ngak meng nding kreim, saong urang ngak brei thau ngak tabiak dom talei ka nyu gam lipih gam kapal piah ngak jeng sap njauk haong nốt nhạc ye num eng bingi pang hu.

PV: Njauk halei oh ong mbaik Chapi hu ngak meng kanduh kreim hak tabiak?

Ông Nguyễn Văn Lâm: Njauk ye, taong abih jeng hu ngak meng kreim, pagap yau meta kreim, phun kreim urang kaoh jeng candaih sit piah ngak dom phím pandok tame dalam kanduh di nding kreim nan.

PV: Piah ngak hu sa mbaik Chapi abih rilo tukvak halei oh ong?

Ông Nguyễn Văn Lâm: Tui menuac ngak, meyah hu caga ginup nding kreim ye dalam 20 tal 30 minit meda ngak salah sa mbaik Chapi, min piah ka sap nyu njauk nyu bingi pang ye brei ramik gac. Daok urang ngak samar ye dalam 10 minit meda ngak salah sa mbaik Chapi. Tuk nding kreim hu tram piah palahik maok, ye pandar hu suai livik. Sap siam mai meng kreim kapal mbiah, kreim ginup thun bilan saong tak kreim di bilan pandiak piah klah hu maok. Lingiu di nan, tuk ngak brei thau mbeik ka nyu njauk meng tabiak sap bingi pang hu.

PV: Hok, tapa panuac khan meng bloh di ong ye urang pang rayo hu thau jang ka mbaik Chapi di urang Raglai, min tuk pang sap Chapi tok mehit nyu yau menyi di tapen tanye. Yau nan kayua halei bo Chapi ini oh kurang hu dalam raidiuk di mikva:

Ông Nguyễn Văn Lâm:  Kayua nyu nan lac suan lac yava di urang Raglai, lac janih alat ragam oh kurang hu dalam dom adat cambat, dom rija roya di urang Raglai. Tapa mbaik Chapi urang Raglai brei mboh hatung hatian di drei, dui ba urang mai jaik gauk jang. Urak ini urang me-in Chapi gam saong Mã la, menuac hu ye me-in mã la, daok menuac oh hu ye me-in Chapi, Chapi biak mbuan ngak saong mikva meda eng drei ngak hu piah paik, piah me-in. Daok Mã la ye abih rilo jien padai saong oh njauk lac sang halei jeng hu bộ mã la ta-eng di drei. Dahlau deih, sa mã la yaom samu sa drei kubao atau sa drei limo. Saong tapa nan nyu brei mboh bruk kaya meda di yaok but pajaih urang Raglai. Daok Chapi ye urang kan kathaot jeng meda ngak hu sa mbaik Chapi piah me-in, piah bui sambai chreih chrai, piah var lihik dom glaih glar.

Hok, biak uan tabuan thau dhar phor ong hu brei ka urang pang rayo thau ka mbaik Chapi- alat ragam biak gheih di urang Raglai./.