Pathau mikva saong grauk ayut!

Dalam dom adat cambat, rija roya di urang Cam Ninh Thuan, Kate nan lac praong di abih, pataom hu rilo menuac di abih. Kate thun ini rah tabiak meng harei 22 tal harei 24 bilan 10. Dalam dom harei Kate, yaok ribau ribau baoh sang urang Cam mai paling yang di dom bimaong, kalan, dom puk palei saong da-a yang di sang biak praong. Dom palei jeng hu peih tabiak rilo bruk me-in bui sambai ngak ka harei Kate hu chreih chrai jang. Thúy Linh – urang vak di Rayo sap ndem Viet Nam daok ngak bruk di ban raya Ho Chi Minh brei thau ka bruk uan raok Kate di tỉnh Ninh Thuan, da-a mikva saong grauk ayut tui pang:

Dalam dom harei Kate ini, bhap bini Cam di 5 xã Phước Hậu, Phước Thái, Thành Hải, Bắc Sơn, Phan Rang – Tháp Chàm hu ngak adat raok khan ao Pô Klong Girai dalam baoh kalan birau hu ngak blaoh dom harei dahlau pak palei Baoh Nà - Chất Thường, xã Phước Hậu, huyện Ninh Phước. Bhap bini saong dom ong saih ong padhiar thei jeng bui sambai. Kayua nan lac công trình hu makna praong, hu padang ngak meng pren yava, hatung hatian di bhap bini ngan saong Po Klong Girai, lac sa dalam dom Po hu dar phor praong dalam bruk ngak ribaong ba ia tame hamu, daopng ka mikva ngak hamu pala padai…Kalan Po Klong Girai hu padang ngak abih labaih 500 triệu đồng. Kalan Po Klong Girai hu padang ngak oh lac piah peih bruk raok khan ao dom Po yang dalam dom harei Kate bo daok lac labik piah ka mikva urang Cam di 5 palei nan paling yang tui adat cambat meng muk kei Cam yau ye: ngak yang akok thun, paling yang…Ong Padhiar Đổng Bạ daok di palei Baoh Nà, xã Phước Hậu, huyện Ninh Phước, tỉnh Ninh Thuận brei thau: " Khan ao dom Po hu caik di kalan ini, tal harei Kate mikva mai raok ba tagok Bimon..."

Ong Quảng Đại Hùng daok di palei Mblang cak, xã Phước Hậu, huyện Ninh Phước, tỉnh Ninh Thuận ndom lac: " Cam drei meng kan mai hu khan ao, pandap karei krei, hu bimon klan...harei ini hu klan praong jang thei thei mboh bui sambai..."

Katê di urang Cam Ahier tỉnh Ninh Thuận hu peih ngak sa thun sa mbang dalam bimaong, kalan bloh tal puk palei. Ini lac adat cambat piah hadar dhar phol dom po yang, ong muk ong kei, pô lingik pô tasik chraong daong ka anek manuac di dunya ini. Yau nan ye, yaok thun tal bilan Kate, langiu bruk sap pagap dom pandap piah paling yang, mikva urang Cam daok iek praong bruk ramik pasiam veik dom bimaong kalan kakuh po piah brei mboh bruk thau dhar phol dom po yang; gam likau dom po yang chraong daong ngak mbang hu kaya meda, raidiuk trei sir haniem phol. Langiu di nan, karja dom palei jeng hu pambuak bruk saong dom gah peih dom bruk daoh tamia, ma-in dom kadha meng kan di bhap bini atau peih bruk pakacah gauk ngak dom janih pandap mbang menyum meng kan …piah paglaong jalan sahaneng di bhap bini.

Salam uan Kate di urang Cam Ahier, meng blaoh, Uy ban bhap bini xã Bac Sơn, huyen Thuan Bac hu pambuak bruk saong Mban khin iek palei Banya peih ngak rilo bruk ilamu Cam pachreih hu rilo mikva dalam palei pataom mbaok tame, ngak brei chreih chrai jang  dalam dom harei Kate. Saong pata nan, pato pakai dom rairah urang Cam dalam palei brei pagalong bruk jum pataom, anit ranam gauk saong khik ramik, patagok dom yaom glaong ilamu meng kan di bangsa. Sa-ai Sầm Văn Tim, Phó akok Uy ban bhap bini xã Bac Sơn, huyen Thuan Bac, tinh Ninh Thuan brei thau: "Kate thun ini, karja xa, palei  hu peih ngak van nghe daoh tamia di dom palei..."

Kate hu makna biak praong ngan saong urang Cam Ahier di Ninh Thuan, rah tabiak dalam praong prang, dui pachreih menuac sia, kak kajap talei jum pataom. Ini jeng lac tuk urang Cam brei mboh rilo yaom glaong ilamu di bangsa drei tapa adat cambat, daoh tamia dom kadha di bhap bini. Bruk nan nyu ngak ka makna saong mbaok meta di Kate hu gheih mekre jang./.

                                                                                                 Bhumi lang tapa sap Cam