Meng harei 16-18/11, urang bangsa Cống, sa bangsa biak takik manuac di negar drei chreih chai uan raok Tết bingu “Mền loóng phạt ái”. Di tỉnh Điện Biên, bangsa Cống urak ini daok jaik 1.000 menuac min, daok dalam 4 palei di huyện Điện Biên, Mường Nhé saong Nậm Pồ. 

Nao tapa jalan ceik atah labaih 150 km tui gah Barak, khaol dahlak  tal palei Lả Chà (xã Pa Tần, huyện Nậm Pồ, tỉnh Điện Biên) di kreh bilan bingu Phạt loóng (bingu mào gà) rak bak angaok dom mblang hamu bahrau yuak blaoh. Dalam palei hu labaih 60 baoh sang urang Cống ini, mikva daok chreih chrai caga raok Tết meng kan di bangsa drei. Ini lac Tết akaok meti hadei di yaok pluh thun var lahik, urak ini meng humai veik haong adat cambat tanarakun di bangsa drei. 

Meng page mesup, mikva dalam palei chreih chrai kuhria caga ka harei Tết di drei. Yaok baoh sang jeng brei manuac tagok hamu apuh atah di sang yaok tuk nao kabak piah paik bingu  Phạt loóng mai ngak pandap paling yang, ngak vòng bingu tuak akaok ka urang kamei saong ranaih sit. Ini lac adat cambat oh kurang hu dalam dom harei ini, ngan haong hatai saneng urang urang kamei saong uranaih nan lac dom urang yếu thế njauk pandar janih bingu ginreih ini piah khik suan yava ka nyu klah ruak kik, pandik harao. 

Pak sang gru ieu yang Lùng Văn Bắt (umo 79 thun), sa adat praong daok rah tabiak dalam van biar harei puac thun klak ngan haong adat iew suan yava, daa ong amuk ong akei mai mbang Tết. Pandap paling yang hu sa phun nứa tượng trưng ka baoh tatua pambuak pagam dua dunya haong lot deih, angaok rup phun hu trang trí dom bingu hala Phạt Loóng sambo màu bhong saong kanjik, hu mong lac jalan piah ka suan yava ong akaok ong akei mai di labik paling yang. Dom janih pandap paling yang karei karei yau nding krem, patau ngak ghing, panyil brah, vòng pariak, baoh menuk, mbaik dhil… Dom urang thik takoi menuk, mek darah drei pabui prong jaik 70 kg angaok sàn sang labik caik talam salao paling ka adat paling pandap metah. Patui hadei nan lac adat paling pandap tasak ngan haong bei sọ, rilo pabui ginup abih bộ phận hu tuk tasak, aia bai ikan ngak meng nding krem, alak cần, hành tỏi, bimao pong, bingu Phạt loóng… Dom janih pandap paling ini kayua dom baoh sang dalam palei ba mai ka gru ieu yang ngak adat. Gru ieu yang ngak adat blaoh ka mikva dalam palei ngan haong kadha langkan hu asal: “Sa thun klak nao tapa blaoh, thun bahrau mai tal, khaol dahlak likau ong akaok ong akei saong yang mebhang brei adat peih ngak Tết bingu, chat tamia daoh ma-in bui sambai piah hadei di Tết, anek taco thei jeng khang kadang, oh njuak ruak kik, ngak hamu hu padai, ngak apuh hu tangeiy, limo kubao, pabui menuk bak glai; but khamot dalam glai nao abih oh daok tame sang ngak ruak kik manuac urang…”

Dalam tuk gru ieu yang di palei daok ngak adat paling yang puac thun, pak dom baoh sang jeng daok chreih chrai thik raih pabui, menuk, ngak ahar meneng, tahanek ndiuk, dom ong po sang khan brei thau ka sa thun ngak mbang, langkan ka thun bahrau hu ralo patuah jamo saong daa ong akaok ong akei mai sang mbang Tết. Dalam melam nan, taong abih urang dalam palei ba pandap mbang mai rik tame saong mbang menyum pak sang gru ieu yang dalam bui sambai gul pataom gauk. 

Tapa harei camereip di thun bahrau, mikva dalam palei pataom gauk di mblang taneh prong kreh palei piah daoh tamia gam ma-in dom kadha ma-in bhap bani yau taong cù, cuh phao phốc, jhul gai, katung talei… Pak di labik trang trọng abih, gru ieu yang saong dom urang taha dalam palei daok tapen salao talam bak pandap paling yang, mong yau akaok ong akei mai sang, mbang menyum saong chat tamia haong mikva dalam palei. Hadei di nan, dom baoh sang rik pandap mbang tame, ba gauk mbang menyum bui sambai luac harei. 

Akaok palei Mào Văn Phiến brei thau: "meng thun 1967- 1968 mai ini, urang Cống di palei ini oh daok mbang Tết tui adat meng kan di bangsa drei tra. Tui hatai saneng di urang Cống, dalam bilan 10 saka aia bulan, hadei di tuk yuak kuak blaoh, yaok baoh sang eng drei mbang Tết tui bruk di sang drei bo oh hu harei cambaih laih. Sang ngak pathi atau tavak bruk di tukvak nan, ye padeih tal harei karei nan ye oh daok không khí gul pataom bhap bani. Kayua pambak tui rai diuk harei ini nan ye bhap bani labik ini ralo meng mbang Tết tui Tết nguyên đán di taneh aia. Thun ini, kayua hu mbang tui  Dự án khik ramik saong patagok kinh tế xã hội bhum urang bangsa Cống di Raja-ei, nan ye palei meng peih bruk mbang Tết haong gauk. Dalam tỉnh tok hu 4 palei urang Cống, yaok palei daok atah di gauk yaok rituh mbaik km, min dom palei diah jeng brei manuac urang lambaok mai mbang Tết haong palei Lả Chà". 

Tui dự án đầu tư di Raja-ei ngan haong dom bangsa biak takiak manuac ini, palei Lả Chà hu salih bahrau biak ralo yau jalan radaih ô tô atah jaik 10km saong baoh tatua tuan tapa craoh bahrau hu ngak blaoh dalam thun ini, pagam  Quốc lộ 4H haong palei. Meng ralo thun ini mai, dalam palei hu sang bac hu padang ngak biak siam ginup abih dom tal bac meng mầm non tal tiểu học. Jaik abih dom baoh sang dalam palei padang ngak hu sang tol khang kajap, hu ginup abih pandao panda piah pandar dalam sang yau ti vi, radaih patuh. Langiu padai brah pala ngak hu, yaok thun yaok baoh sang daok taduan hu jien khik iek glai jaik 15 triệu đồng, nan ye rai diuk di bhap bani trun kan kandah biak ralo. Tết bingu “Mền loóng phạt ái” di urang Cống urak ini daok hu tỉnh Điện Biên khik ramik, padang ngak veik piah ka bangsa biak takik manuac ini khik ramik saong patagok dom yaom glaong ilamo di drei, dalam baoh sang praong di bhap bani dom bangsa Việt Nam./.