Thun ini, Ramưwan rah tabiak meng harei 7- 9/7/2013 saka ia harei. Di tuk  nan, bruk uan raok harei mbang muk kei mboh biak bui sambai, chreih chrai di grauk dom palei Cam Nam bộ, dalam nan hu dom palei Cam di tỉnh Ninh Thuận.

Yau dom ribau baoh sang karei karei, sang sa-ai Đào Thị Đậy daok di palei Cam Lương Tri, xã Nhơn Sơn, huyện Ninh Sơn, tỉnh Ninh Thuận sap pagap tani tanat dom janih yau: Lư cuh gilau, mbah hla birau, ahar meneing, baoh kayau, khan ao birau…piah raok muk kei. Sa-ai Đẩy khan lac, meng hu bruk daong di Karja saong bruk kham merat di drei, baoh sang sa-ai hu tabiak truh kan kathaot. Thun 2003, meng phun jien 10 triệu đồng mesre di Karja saong 10 triệu đồng mesre di Kapul urang kumei xã, sa-ai buh tame raong glang saong pala drak. Tal urak ini, sa-ai Đậy hu sa trang trại praong hu 120 drei pabo, 40 drei pabe, 12 drei limo. Langiu di nan, sang sa-ai daok ngak dua hecta padai saong pala dom janih njam patam. Thun blaoh, sang sa-ai duah hu jaik 100 triệu đồng, kaok abih phun jien buh tame ngak, daok laba hu 50 triệu đồng. Ngak mbang hu ginup meda nan ye Ramewan thun ini bui sambai jang yaok thun: “Sang dahlau deih kan kathaot, meng tuk hu mesraiy phun jien, buh tame ngak padai, raong pabo, raong limo. Meng nan hu jien mek tame, sang dak harei dak ginup meda, hu jien raong anek nao mbang bac yau harei ini” – sa-ai Đậy lac yau nan.

 Tame palei Cam Phước Nhơn, xã Xuân Hải, huyện Ninh Hải, dom jalan dalam palei, mikva tuan hala dok, bingu la,  khẩu hiệu hadah tanyak salam uan  Ramewan siam mekre, patuah jamo, hajan siam, hangin lagaih. Sa-ai Dương Bửu Viên, akaok UB bhap bini xã Xuân Hải khan lac : Karja buh jien ngak jalan bê tông atah 5 mbaik meteh saong yaom jien ngak abih 18 tỷ meteh, ba mbuan lagaih ka bruk pajeng ba saong nao mai di mikva. Mikva hu rik tame labaih 900 triệu đồng piah ramik pasiam, peih praong sang megik, saong ngak mblang caoh mbanh, mblang bein. Piah ka bhap bini thei jeng hu mbang muk kei dalam bui sambai chreih chrai, xã hu peih ngak ginup sarak iek glang ka labaih 90 baoh sang urang Cam kan kathaot, yaok baoh sang hu daong 150 ribau đồng.

Sa-ai Dương Bửu Viên brei thau: thun ini, “kol dahlak tacei pato mikva mbang Ramưwan dalam patak pataom, min khik hu ilamu bangsa. Bhap bini Cam, Kinh dalam xã tuk halei jeng jum pataom, bui sambai saong Ramưwan rah tabiak dalam sron mbon, siam mekre”.

         Ninh Thuận hu labaih 67 ribau urang bangsa Cam, dalam nan urang Cam Aval hu labaih meteh. “Gam saong dom sang bhap bini, dom halau janeng kuhria caga biak siam labik ngak adat saong pambuak bruk haong karja palei khik ramik siam mekre piah ka mikva mai bui sambai uan raok Ramưwan” - ong Imem Dương Điệp, Phó Chủ tịch Hội đồng Sư cả Hồi giáo Chăm Bani tỉnh Ninh Thuận khan brei thau. 

 Ba drei tame bruk chreih chrai uan raok  Ramewan saong mikva Cam Bini, dom harei ini, tỉnh Ninh Thuận hu brei dom kapul nao rivang, tadhau ayuh, alin pandap ka dom ong gru, imem, dom baoh sang urang Cam dalam sarak karja hu buh pren yava ka bruk cách mạng di bangsa, dom baoh sang kan kathaot. Ong Thành Chiểu, Tỉnh ủy viên, Akaok mban Bangsa - Hội đồng bhap bini tỉnh Ninh Thuận brei thau: “Tỉnh ủy tuk halei jeng ba mbuan lagaih ka 7 sang megik Bini saong 4 sang megik Islam, dom halau janeng, dom urang Cam Bani saong dom baoh sang kan kathaot uan raok Ramewan dalam siam mekre,  patak pataom, bui sambai. Lingiu di nan, Tỉnh ủy tacei pato dom huyện pambuak bruk saong puk palei peih dom bruk  daoh tamia, me-in thể thao piah ba bui sambai ka mikva”./..