Mô hình pala kruac bung kalik hijao di ong Nguyễn Văn Nhân, daok di xã bhum ceik Hòa Ninh, huyện Hòa Vang, bal Đà Nẵng ba jien tame ralo. Ong Nhân brei thau, dahlau diah, sang ong pala phun keo saong padai min jien mek tame oh tani tanat, rai diuk biak kan kandah. Hadei di nan, ong salih tapa pala kruac bung ba mai kein laba glaong. Meng nan, ong Nhân peih prong taneh pala kruac bung tagok labaih 15.000 m2. Tui ong Nguyễn Văn Nhân, kruac tabiak baoh luac thun, hu urang mai duah blei tal labik, yaom 20.000 đồng/kg. Yaok thun pala 2 mbang, ong Nhân laba hu meng 150 tal 200 triệu đồng: Mboh pablei hu, peih prongtaneh pala ralo jang. Xã Hòa Ninh pachreih paka kruac bung, bhap bani pak ini daok pala ralo. Pajaih kruac bung ini pala biak njauk. Dahlau diah, drei pala dom janih phun tạp, phun keo, phun padai oh hu jien hadom. Phun kruac bung pala di taneh sit min sa phun duah hu 3 tal 4 triệu. Meng nao njauk jalan lac pala phun kruac bung, rai diuk cakrok patagok yaok thun.

          Urak ini, mô hình pala kruac bung kalik hijao di sang ong Nhân hu ralo mikva urang nong di xã ini ngak tui. Ong Nhân lingiu di bruk pabak pajaih kruac bung daok tacei pato ilamu kỹ thuật pala kruac bung ka ralo mikva. Ong Lê Đức Thương, Akaok UB bhap bani xã Hòa Ninh, huyện Hòa Vang, bal Đà Nẵng brei thau: Dahlau diah, ralo bhap bani pak ini pala glai, bei plom, phun manaih, chôm chôm, pa-aok, panat saong padai takik kein laba. Tukvak jaik di ini, mikva salih tapa pala kruac bung saong mek jien tame ralo, glaong jang 6 tal 7 mbang dut haong pala padai saong pala glai. Ong Lê Đức Thương daok brei thau lac, dalam xã urak ini hu 30 baoh sang pala kruac bung di taneh praong abih tih jaik 20 héc ta: (Urak ini dalam xã hu ralo sang pala kruac bung daok tal tame bilan paik baoh, urak ini mikva hu ginup meda, blei hu radaih ô tô. Thun ini xã daok padang 10 ha saong meda  peih prong taneh pala jeng sa bhum chuyên canh. Dahlau diah, mikva paka phun keo, phun tràm saong dom janih phun pala karei. Min tuk mboh phun kruac bung hu yaom nan ye mikva salih tapa pala saong hu karjka daong pajaih saong khak.

        Ong Nguyễn Đình Khánh Vân, Phaok akaok Kapul urang nong bal Đà Nẵng brei thau: phun kruac bung kalik hijao di xã Hòa Ninh hu jeng phun pala praong pak ini. Kapul urang nong bal Đà Nẵng hu pambuak haong dom gah chức năng peih tal pato pathram ilamu kỹ thuật, daong brei khak drak, pajaih phun pala saong daong ka mikva mesre phun jien peih prong taneh pala kruac bung: Ong ndom lac: kapul urang nong bal jeng hu daong brei phun jien piah peih prong bruk pala kruac bung ini, kayua lac kruac bung brei mboh lac hu kein laba. Anak tal, bruk peih ngak dự án nan meda daong peih prong phun kruac bung ini dalam xã Hòa Ninh, lagaih haong taneh riya, langik tasik saong daong patabiak sa janih kaya nong di labik ini. Tuk pala drak, gaok kan kandah hagait ye kapul urang nong dang tabiak daong ka hội viên urang nong pambuak haong doanh nghiệp, dom labik karei dalam bruk tacei pato ilamo kỹ thuật, blei abih baoh kruac bunbg pala hu./.