Tukvak jaik di ini, uranih di dom bhum urang bangsa takik di tỉnh Đak Lak klak bac meteh dhi dak harei dak ralo. Kadha njauk biai nan lac dom urang ngak amaik  ngak ame kayua mboh rai diuk kan kandah nan ye  brei ka anek drei nao ngak apah tuk kaol nyu oh ka tal thun nao ngak bruk.

       Akaok thun ini, hu urang randap tacei ba, ong Lê Văn Hồng (urang Mông), daok di thôn Noh Prông, xã Hòa Phong, huyện Krông Bông brei 2 urang anek lac Lê Văn Cải, umo 10 thun saong Lê Văn Khương, umo 15 thun nao trun bal raya Hồ Chí Minh piak jhik. Oh yau panuac sanya lac bruk ngak njuan jien bilan glaong, tok hadei di 2 bilan, kayua bruk ngak trak nan ye dua urang anek di ong bhian iew phol ka ame daong. Ong Hồng njauk nyim jien tame bal raya HO CHI MINH piah ba dua urang anek mai sang. Ong Hồng khan lac: Puk paga tangi sua yau habar ba anek nao bo oh daok veik ngak blaoh mai sang lac rambah ralo, nan ye nyim jien nao mek anek mai,, urak ini mai sang oh ka hu jien bayar sre rambah ralo. 

      Jeng kayua kathaot, ong  Lê Văn Tỏa, daok di thôn Noh Prông, xã Hòa Phong, huyện Krông Bông brei anek kamei umo 13 thun padeih bac piah nao ngak atah, min ong oh thau anek drei urak ini daok pak halei, lavik lavik nyu iew phon mai khan lac ngak bruk glaih glar ralo. Mahit nyu lac ngak bruk glaih glar ralo, ngak luac harei oh hu tukvak padeih padei. Meng 6 tuk page tal 11h, meng 12h tal 7h melam, huak blaoh ngak tal 12h melam, oh hu tukvak padeih padei blaoh daok njauk ép công tra. 

       Tui ong Nguyễn Văn Tâm, akaok xã Cư Pui, huyện Krông Bông yaom lac karja hu sarak daong ka anek kamuan bhum urang bangsa takik, min kayua rai diuk kan kandah ralo baoh sang jeng caik ka anek drei nyu padeih bac. Ong Tâm lac: Ralo meng lac bhap bani urang bangsa takik, sang kan kandah caong duah jien nan ye brei anek bhik nao ngak  pah. Min tal tuk khaol dahlak thau lac hu bruk dom adei nao ngak bruk saong hu dom adei mboh tangin pambuak bruk haong cơ sở lao động ngan haong uranaih nan lac suan khaol dahalk hu nao langyah jak ba dom baoh sang nan, amaik ame dom adei taom gaok dom adei piah ba dom adei mai sang min kayua sang kan kandah caong duah jien nan ye dom urang ini oh ka iew anek drei mai sang.

       Ong Trần Ngọc Hùng, Phaok phòng Lao động -Thương binh saong Xã hội huyện Krông Bông brei thau, bruk uranaih klaak bac nao ngak bruk di dom khu công nghiệp, atau nao ngak pak dom nhà hàng hu rah tabiak meng puac thun 2014. Yaom lac kol dahlak hu pambuak bruk haong karja puk palei, dom kapul nyaom nao trun pathau khan, jak ba, langyah. Gaok mai ba tabiak bruk ngak suan gah adat hukum tuk mek uranaih oh ka ginup thun ngak bruk piah xử lý min jeng oh pacang cakak hu bruk ini. Kuhria meng akaok thun tal ini, dalam huyện hu 135 em ( meng 12-16 thun) klaak bac. Dalam nan, 42 uranaih padeih bac nao ngak bruk pak bal raya Hồ Chí Minh. Piah langyah abih mbon bruk uranaih klaak bac meteh dhi piah nao ngak bruk, tui  ong Hùng lingiu di bruk paglaong akaok saneng ka dom baoh sang ka quyền uranaih, njauk hu bruk ba tangin tame ngak khang di taong abih xã hội, abih di nyu lac njauk langyah bruk ngak mbang duah jien ka dom baoh sang kan kandah di dom bhum atah bayah: Khin patrun bruk uranaih nao ngak bruk avar saong uranaih klaak bac nao ngak ye njauk hu sarak đầu tư piah cakrok patagok kinh tế grap tanat rai diuk ka bhap bani. Ndom ka sarak patagok kinh tế, tal urak ini hu biak ralo min piah ka bhap bani hu mbang tui dom sarak ini, lac bruk oh mbuan. Ngan haong dom gah chức năng njauk tame bruk piah  cakrok patagok di puk palei. Abih di nyu, Krông Bông lac sa huyện kathaot nan ye dom jabat chức năng njauk sangka jang ka sarak, jalan ngak patagok kinh tế di huyện./.