Urang Cam daok di Ban raya Ho Chi Minh hu labaih 7 ribau urang, daok di 10 quận, huyện. Dalam nan, quận Phú Nhuận hu labaih 800 urang, daok pataom ralo di phường 15 saong phường 17. Dom thun dahlau, Pasak duah bruk ngak quận Phú Nhuận pambuak saong Ủy ban bhap bini dua phường nan hu peih yaok pluh tal bac dom bruk ngak yau ye: peih radaih, cakak mbuk, pasiam mac vitinh, điện thoại…piah ka dom urang dam dara bac blaoh duah hu bruk ngak. Min njauk ndem lac, dom tal bac nan tui hatai caong khin di dom dam dara labik ini. Langiu pato bruk ngak, Pasak daok duah bruk ngak ka dom dam dara bac peih radaih, pasiam mac vi tính ngak bruk di dom khu công nghiệp, khu chế xuất, xí nghiệp…Min,  ngak bruk oh hu suai lavik ye dom urang nan klak nao, urang halei ngak suai ye hu 2 thun; daok veik dom urang karei ye padeih ngak daok di sang. Langyah ka bruk ini, dom urang dam dara lac, ngak bruk brei tui tukvak, hukum tani tanat; jien bilan brei mek njauk tukvakdi nyu mboh biak suai…Suai lavik nao oh daok urang halei daok ngak, salih tapa ngak bruk tui hatai karei di drei.

Sa-ai Ippo Him, umo 31 thun daok di phường 17, quận Phú Nhuận bac peih radaih di thun 2007. Tamat tal bac, UB bhap bini phường 17 duah labik brei ka sa-ai nao ngak peih radaih di Công ty tư nhân di phường. Ngak hu dua thun ye sa-ai salih tapa bruk pablei salih. Sa-ai Ippo Him brei thau:

“ Ngak hu dua thun ye padeih, kayua oh ginup jien piah diuk rai…”

Bac hadei sa-ai Ippo Him 1 tal, sa-ai Abu Zukipfaly hadei bac blaoh jeng salih tapa bruk nao pablei salih. Sa-ai mboh bruk pablei salih hu jien chip, jien tame tabiak yaok harei.

“ Hulin nao blaoh ye min jien dauh tame oh giup mbang…”

Ông Kariem Los daok di phường 17, quận Phú Nhuận khan yau ini :

“ ….Dam dara pak ini takre ngak bruk tui hatai di drei. Khol hulin kham merat jak ba, langyah  dom anek kamuan nan veik…”

Ong Mach Dares Samael- Pho akaok Ban đại diện Cộng đồng Isalam Ban raya HCM khan lac, kayua meng halei ba tal dom dam dara Cam oh takre bruk ngak urang duah brei tani tanat oh lac kayua raidiuk kan kandah, bo kayua bruk pathau khan pato bruk ngak, dauh bruk ngak oh ka cambaic pambak praong, karja phường, Ban đại diện Cộng đồng Isalam dauh thau oh ka tantu, jak ba dam dara bac bruk ngak; ilamu duah bruk ngak ralo dam dara Cam labik ini daok biar; sahaneng pablei salih drah hu jien. Yau nan ye, dam dara oh takre bac bruk ngak. Ong lac, caong khin dam dara Cam hu tacei pato bac bruk ngak ka nyu njauk, camereip Ban quản tri sang megik njauk brei ceik hatai tal bruk jak ba, langyah ka bruk pato bruk ngak saong langyah ka bruk ngak…Ong Mach Dares Samael lac  

“ Ilamu bac bruk ngak di rilo dam dara Cam daok biar…njauk brei kham merat rilo jang”

Ralo urang dam dara Cam ngak bruk phổ thông oh hu tapa tal bac halei. Karja palei njauk brei pakhang bruk pathau khan ka patao bruk ngak saong dauh bruk ngak ka dam dara; karja quân Phu Nhuan jeng yau Ban raya HCM njauk brei buh jien padai tame ka dom pasak duah bruk ngak piah paglaong bruk tacei pato duah bruk ngak ka dom dam dara; gam daong phun jien yau brei mesre phun jien piah ka dom dam dara hu bac bruk ngak tamat blaoh lagaih ngak bruk tapa nan piah ka dom urang nan sahanang hatai ndam gam saong bruk hu bac blaoh./.