Labik ngak alak tapai Thái Tây Nguyên di saai Lương Văn Dũng, 27 thun bangsa Thái, daok di buôn Thái, xã Ea Kuêh, huyện Cư Mgar, tỉnh Đắk Lắk urak ini hu tani tanat, yaok thun ngak saong pablei tabiak jaik 1.000 ché alak tapai dom janih, ba jien tame labaih 100 triệu đồng. Saai Dũng brei thau, meng caong khin patui bruk ngak alak tapai mengkan di sang, thun 2015, saai ruah bruk ngak saong pablei salih alak tapai piah padang mbang ngui. Saai bac megru alamu ngak alak tapai di dom urang dalam sang saong di bhapbini piah ngak hu alak tapai Thái biak bingi. Meng 3 janih lac brah ndiuk, kam ndiuk saong men hala, dalam nan men hala lac janih ngak brei pahe bingi biak karei di alak tapai Thái. Bruk caong padang mbang ngui di Lương Văn Dũng hu Đoàn dam dara puk palei daong pren drah samal: Camereip abih di bruk dahlak ngak alak tapai piah caong khik ramik bruk ngak alak tapai Thái. Tuk hu dom adei saai di huyện đoàn saong dom urang dang akaok sangka daong brei mesraiy 20 triệu, daong ka dahlak lingiu phun jien di sang daok hu jien piah blei dom pandap panda piah ngak alak.

Jeng meng bruk sahaneng khik ramik saong pasiam veik bruk ngak alak tapai mengkan, saai H Bích Niê Kđăm, bangsa Ê Đê, daok di buôn Wieo A, ban sit  Krông Năng, huyện Krông Năng, tỉnh Đắk Lắk sahaneng, duah saong bac megru bruk ngak alak tapai meng amuk pajeng amaik di drei. Saai H Bích brei thau, yaom lac urang bhapbini dalam bhum caong hu alak tapai, abih di nyu nan lac di dom harei lễ, tết, min oh hu thei ngak saong pablei janih alak ini. Tapa dom tuai hu dahlau meng bruk pablei salih asar mắc ca di sang, H Bích sahneng tal bruk ba janih asar ini tame ủ alak, ngak tabiak janih alak biak karei. Tui nan, sa janih alak tapai barau pahe, bingi biak karei hu tabiak rai. Yaom lac pablei tal 1 triệu đồng 1 ché 10 lít, alak tapai mắc ca jeng hu dom urang thau ka alak blei piah menyum. Saai H Bích daok kuhria jhul khang bruk yaih khan alak tapai, abih di nyu nan lac alak mắc ca di dom ban praong yau Hà Nội saong ban raya Hồ Chí Minh piah peih praong darak pasal, saong piah yaih khan janih alak mengkan di bangsa drei: Mboh lac ilamu di bangsa drei dak harei dak lihik nao yau nan ye dahlak caong khin bac piah dahlau di abih lac khik veik. Daok janih alak tapai mắc ca ini lac biak karei di libik lingiu dom janih mengkan di alak tapai daok hu asar mắc ca hu hana sấy thu buh tame. Dahlak daok caong peih praong bruk yaih khan pandap ini tabiak darak pasal praong jang piah rilo urang hu menyum dom đặc sản di Tây Nguyên, thau tal dom pandap mengkan di urang Ê Đê drei saong daong drei mboh hadah mbaok jang.

Piah daong ka dam dara hu jalan padang mbang ngui, tỉnh Đắk Lắk hu rilo bruk ngak yau: brei mesraiy ưu đãi; peih dom tal ravang iek, bac megru dom bruk ngak mbang hu; pasram ilamu, kỹ năng, ginum biai tapak di urang dang akaok tỉnh, po doanh nghiệp saong dam dara ka padang mbang ngui.

-Meng thun 2009 tal ini, dom pakat đoàn tỉnh Đắk Lắk hu daong dam dara mesre dom phun jien padang mbang ngui piah ngak mbang pablei salih, ngan saong paok jien mesraiy ủy thác meng gilang pariak sarak karja lac labaih 646 tỷ đồng; hu 5 dự án mesraiy jien meng kadung jien negar ka bruk ngak ngan saong paok jien abih tih 700 triệu đồng. Dom pakat đoàn dalam tỉnh jeng brei 50 paok jien padang mbang ngui ka dam dara labaih 1 tỷ đồng. Meng bruk sangka ini, rilo dam dara khang hatai padang mbang ngui ngan saong rilo mô hình siam gheih, ba mai kein laba kinh te glaong, rik daong ba bruk ngak ka rilo dam dara karei.

Ông Phạm Minh Tấn, Phó Bí thư Thường trực Tỉnh ủy Đắk Lắk brei thau, bruk padang mbang ngui di dam dara tuk halei jeng lac sa dalam dom bruk sangka dahlau di tỉnh dalam bruk patagok: Anak tal, dom pakat ủy Đảng daok sangka tacei pato urang dang akaok dom pakat Đoàn saong karja, ba mbuan lagaih ka dam dara padang mbang ngui tui jalan tuổi trẻ sáng tạo nao gam haong bangsa dalam bruk patagok kinh tế xã hội di tỉnh.

-Meng hatai sahneng padang mbang ngui  nhạy bén saong darak pasal, rilo dam dara Đắk Lắk hu roh duah piah ba tabiak pandap, mô hình hu kein laba kinh tế pandar di puk palei. Abih di nyu nan lac ngan saong dam dara bangsa takik, hatai sahneng padang mbang ngui meng ilimo mengkan hu ba mai ka dom urang nan bruk jak jeng. Saong meng jak jeng nan nyu hu rik daong khik ramik, pasiam veik saong ngak brei hu rilo jang dom janih pandap, bruk ngak mengkan di bangsa drei./.

Thúy Linh