Đảng bộ hadah trah di xa bhum glaong Đông Tiến

*** 

Lac xa bhum glaong cơ sở vật chất daok rilo kan kandah. Min meng bruk kham merat, đảng bộ xã bhum glaong Đông Tiến, huyện Hàm Thuận Bắc, tỉnh Bình Thuận hu patagok pren khang, ba jalan salih bahrau dalam patagok kinh tế xã hội, rik daong paglaong raidiuk mbang ngui daok dang ka bhapbini. Kadha vak di Huyền Trân - NaUy, rayo paparsap papar binguk tỉnh Bình Thuận: 

Dom thun tapa, Đảng bộ xã bhum glaong Đông Tiến, huyện Hàm Thuận Bắc, tỉnh Bình Thuận oh padeih salih barau jalan ngak, bruk pan akaok ba jalan, jum pataom gauk yam tapa kan kandah. Kham merat tacei pato bhapbini salih phun pala, kaya raong, pandar alamu tame sản xuất lagaih saong puk palei. Meng di nan, raidiuk bhapbini oh padeih salih bahrau, jalan mbak palei pala dak harei dak praong, siam, hacih saat. Padang hu hatai jia di bhapbini brei ka Đảng, karja puk palei. Meng thau lac dak padang Đảng lac bruk praong, ba tal jayah, maong bruk paglaong chat luong urang jakar, urang đảng lac bruk ngak praong. Dom thun jaik di ini, Đảng bộ xã bhum glaong Đông Tiến sangka patagok urang đảng, rik daong paranaih umo urang jakar, urang đảng, khik caga bruk kế thừa saong patagok di Đảng. Yaok thun, Đảng bộ xã hu ba tame Đảng rilo quần chúng ưu tú, bhian tacei pato ngak siam bruk pato pakai chinh tri, tu tuong ka dom urang jakar, urang đảng saong bhapbini. Saai K’ Văn Thảo, Phó bí thư Đảng ủy xã Đông Tiến, huyện Hàm Thuận Bắc, tỉnh Bình Thuận brei thau : Bruk dak padang Đảng hu siam jang duk saong dahlau daih, yau bruk ngak njauk tukvak, ngak tui chỉ thị 30, 40 di Tỉnh ủy… Dalam nan, bruk praong dalam dak padang Đảng, Đảng bộ thau lac jalan ngak bruk di urang đảng, bruk ngak tui panuac Wa tui chuyên đề yaok thun jeng hu salih siam. Đảng bộ ngak siam dom bruk hu tut angan, hu huyện pok meyaom. 

Lac xã ngak nông nan ye dalam bruk pala drak, Đảng bộ xã pataom tame tacei pato bhapbini pandar alamu barau, ba dom janih pajaih barau brei nang suat glaong tame pala drak. Gam saong thâm canh phun padai saong phun pala karei, karja daok pachreih mikva kham merat salih dom taneh ngak oh kein laba tapa pala dom phun lagaih jang. Saai K’ Thị Rồi, akaok kapul urang nong xã Đông Tiến ndom lac : Cơ cấu phun pala mùa vụ phun padai, phun tangei. Dom thun dahlau, ngak padai sa thun hu 3 vụ. Tuk salih phun pala, pandar alamu ngak dua vụ padai, sa vụ tangei. Barau ini, mikva pala tangei nù hu nang suat glaong.

Taphia phun padai, phun tangei, mikva di xã Đông Tiến daok patagok taneh pala phun thanh long. Meng bruk kham merat tacei pato di urang jakar pachreih nong, meng thun 2014 tal ini, mikva xã Đông Tiến pala hu 4 hecta phun thanh long. Tukvak tal, xã Đông Tiến meda jak ba dom thành phần kinh tế daong sang kathaot pala thanh long. Meng bruk tacei pato dalam di Đảng bộ, mikva dalam xã yam tagok meng dom mblang hamu, apuh dak padang raidiuk trei sir. Tapa nan, mboh hu rilo kreih camin hadah dalam sản xuất di puk palei.

Sang saai K’Văn Việu, sa dalam dom sang khang hatai ba thanh long tame pala saong jeng ginup meda. lac urang đảng ranaih umo di palei, kham merat tapa dom tan pasram pandar tui yaok mo hinh ngak mbang yau : tangei lai, padai ia daong sang drei salih bahrau yaok harei. Meng di nan, drei pambak praong dalam adei saai urang đảng, bhapbini saong bhian ginum biai dalam chi bộ piah gam saong drei daong ka mikva ngak kinh te siam jang.

Meng hu dom sarak njauk nan ye ia mbaok palei pala di xã Đông Tiến hu rilo salih bahrau. Kinh tế xã hội patagok, raidiuk bhapbini dak harei dak glaong. Urak ini, sang kathaot trun daok takik. Gam saong bruk pachreih tui di bhapbini saong bruksami samar di dom urang jakar, dom jalan pambuak pagam palei pala dalam xã jeng hu tuh bê tông. 

Đông Tiến harei ini hu hadah hadai, trei sir, luac thun jeng hu ban hijao di padai. Bhapbini kham merat ngak mbang, oh caik taneh klak saoh, oh daok pagam pambak tame karja. Hu yau nan meng hu bruk pan akaok, tacei pato njauk jalan ngak, siam lagaih saong kein laba di pakat uy, karja xã saong bruk kham merat di bhapbini xã bhum glaong Đông Tiến, rik daong dak padang Đảng bộ Hàm Thuận Bắc khang kajap ./.