Trích một đoạn hát (….)

Tui panuac bangsa Sán Dìu, Soọng hu makna lac daoh, daok Cô lac takơ. Panauc daoh saong lagu lagam Soọng Cô laman lamuac brei mboh hatung hatian di urang daoh ngak limin hatai urang pang. Urang Sán Dìu daok hadar kanal asal di ragam daoh di bangsa drei. Dalikan khan lac tuk baoh taneh saong langik tasik daok jaik gauk, hu sa palei kaya meda hu rilo menuac daok di tapen kraong biak mekre. Hu sa harei Po langik hanaok ginong brei ia kraong tagok glaong ngak metai abih janih. Dalam palei hu dua adei sa-ai nan samar takai laok tame baoh kadaoh thu theik angaok kraong nan ye oh metai. Tuk ia thu dalam palei oh daok thei yau nan ye urang tok gauk ndih tapui tabiak rilo anek taco ngak ka urang bangsa Sán Dìu hu rilo menuac veik. Yaom lac palei hu rilo manuac min lac anek taco sa rilo darah oh tok gauk hu nan ye njauk tapa palei karei duah tok. Piah ngak ka ayut palei deih laman hatai urang palei ini mek sap daoh brei thau hatai di drei. Ragam daoh Soọng Cô hu tabiak rai meng nan saong daok veik mbiah tal harei ini.

Yau dom ragam daoh bhap bini karei karei, daoh Soọng Cô di urang Sán Dìu dak harei dak lahik nao kayua dom ragam daoh birau daok palak tame. Min di dom palei yau Hà Phong, Hạ Long, Cẩm Phả saong Vân Đồn di tỉnh Quảng Ninh jeng daok khik ramik hu ragam daoh bhap bini Soọng Cô dalam raidiuk, yau pandap mbang oh kurang hu di urang bangsa Sán Dìu. Ong Trương Bình Minh, akok kalup kapul Daoh Soọng Cô phường Hà Phong lac:

 “Dom thun dahlau diah, dahlak ngak akok khu phố, ini jeng lac khu phố ilamu nan ye urang Sán Dìu khin padang bruk daoh tamia piah pok meyaom bnagsa Sán Dìu gam tacei pato anek kamuan harei hadei khik ramik ilamu bangsa drei. Yau nan ye, khol dahlak meng padang kalup kapul Daoh Sọong Cô di bangsa Sán Dìu hu Đảng saong Karja taduan brei angan”.

Jeng yau ragam daoh sli, lượn di urang Tày, Nùng saong sình ca di urang Cao Lan, Sọong Cô di urang Sán Dìu lac ragu daoh bhap bini ngan saong panuac daoh dam dara, hu patoa veik meng samar ini tapa samar diah. Urang Sán Dìu takre daoh kayua Soọng Cô tabiak meng raidiuk yaok harei, brei mboh hatung hatai , dom caong khin di urang ngak hamu ngak apuh.

(Trích một đoạn hát…)

Dom panuac daoh Sọong Cô yam tapa abih không gian, tukvak, raidiuk. Urang meda daoh luac sa melam, rilo melam, daoh dalam sang, daoh tuk nao ngak apuh atau ngak yang mebang. Kayua yau nan ye, daoh Sọong Cô oh kurang hu dalam raidiuk urang bangsa Sán Dìu.

Ong Tạ Trung Xuân, urang di Kalup kapul daoh Sọong Cô phường Hà Phong khan lac:

“ Yaom glaong di Sọong Cô ngak brei hadah mbaok bangsa, ngak ka drei mboh yau sa baoh bingu sit dalam sa pok bingu praong 54 bangsa adei sa-ai. Yau nan ye brei khik ramik saong patagok nyu tui sarak di mentri chính trị nan lac padang ilamu Viet Nam ndung bak ialmu bangsa”

Urak ini, bruk khik ramik ilamu gheih mekre di daoh Sọong Cô ralo meng tapa bruk sinh hoạt di dom kalup kapul di bhum palei. Min dom kadha daoh hu patoa veik meng cambuai tal urak ini oh daok khik hu, oh ka hu vak me-piah. Lingiu di nan, dom urang di Kalup kapul daoh Sọong Cô jeng umo thun taha, daok rai dam dara urang ranaih bangsa Sán Dìu oh thau cambaih sap ndom panuac puac di bangsa drei nan ye bac daoh jeng lac sa kan kandah praong piah khik ramik ragu daoh bhap bini ini. Kayua yau nan ye ragam daoh ini dak harei dak lahik nao.

Sa-ai Lam Thị Hải pho akok kalup kapul daoh Soọng Cô ban sit Hạ Long khan lac:

 Dahlak thau ralo ilamu bangsa ini nan ye dahlak biak khin dom wa hu jalan piah patoa veik ka naek kamuan rai hadei khik ramik ilamu bangsa ka ragu daoh Sọong Cô, daong ka ragam daoh ini oh lahik nao.

Urak ini, manuac thau daoh Soọng Cô daok takik. Dom kalup kapul oh ginup menuac nan ye oh taduan hu angan, tok eng kalup kapul daoh Soọng Cô di phường Hà Phong, ban sit Hạ Long hu taduan lac kalup kapul daoh Soọng Cô di  Hội Văn nghệ bhap bini tỉnh Quảng Ninh. Anak tal, kalup kapul daoh Soọng Cô Bình Dân (Vân Đồn) hu Hội văn nghệ bhap bini tỉnh Quảng Ninh taduan di hraei 18/11. Piah khik mikva saong patagok yaom glaong di ragu daoh Sọong Cô, brei pachreih padang rilo kalup kapul daoh tamia bhap bini di dom puk palei, roh duah, padang ngak, pablak dom kadha daoh Soọng Cô tame dom danak dak ilamu nghệ thuật. Bhian ba ragu daoh ini tame me-in piah pabak ilamu di bhap bini dom bangsa bhum glaong, bhum atah bayah, bhum ceik car. Hu yau nan, Soọng Cô meng khik hu ilamu karei dalm 54 bangsa Việt Nam./ .