Xã Mường So, huyện biên giới Phong Thổ, tỉnh Lai Châu hu bhap bani Tây Bắc mong yau pasak di bangsa Thái mbong. Labik ini hu manek tabiak ralo janih ilamo oh labik halei hu, yau dom ragam xòe, ragam tamia tadhik, tamia nduan; dalikan ariya Thái cổ Mường So; lễ hội Nàng Han; lễ hội Kin Lẩu Khẩu Mẩu... hu ngak jeng ilamo bhum bangsa Tây bắc.

Jeng yau dom labik karei dalam mùa xuân, di palei Nà Củng, xã Mường So tuk halei jeng hu daoh tamia, ma-in kadha ma-in bhap bani piah khik ramik ilamo meng kan di bangsa drei. Kayua yau nan ye bo Klup kapul ilamo bhap bani bangsa Thái palei Nà Củng padang tabiak di thun 2007, min tal harei ini jeng daok hu ralo bruk ngak chreih chrai. 

Nghệ nhân ưu tú Hoàng Ngọc Sứu akaok klup kapul ilamo bhap bani bangsa Thái bản Nà Củng brei thau: thun 1972, ong pato daoh tamia bhap bani ka mikva dalam palei. Tuk nan, dom urang hu mbaok tame bac jeng hu hatai takre ilamu bangsa drei. Kayua yau nan ye, harei tagok apuh tabiak hamu, yaom lac glaih glar min tal melam mai urang pataom gauk veik cuh apui piah pathram daoh pathram tamia, oh thei daok mboh glaih glar. Meng thun 1972 tal ini, manuac urang tame me-in daoh tamia jeng daok hu mbaok saong hu rilo jang. Thun 2007, Klup kapul ilamo bhap bani bangsa Thái bản Nà Củng hu padang tagok, ngan haong 25 urang parabha jeng 2 kapul lac kapul urang kamei saong kapul urang prong thun. 

Tal harei rija, roya, klup kapul ilamo bhap bani bangsa Thái palei Nà Củng jeng jar var pathram dom ragam tamia, dom kadha daoh ndung bak ilamo. Dalam kapul urang prong thun di klup kapul ilamo bhap bani bangsa Thái palei Nà Củng mboh ralo nan lac dom urang umo labaih 60 thun. Yaom lac hu urang ngak ong, ngak muk min ngan haong hatai takre, dom urang nan oh kanda ba drei tame haong sap capi tính tẩu, gam daoh tamia piah brei mboh tài năng nghệ thuật di drei.

Amuk Đèo Thị Ọi, umo 66 thun, urang di klup kapul ilamo bhap bani Thái palei Nà Củng brei thau: "Amuk kak kajap haong klup kapul meng dom thun 70. Amuk haong kapul văn nghệ bhian nao parang me-in pak dom lễ hội meng kan yaok thun. Ngan haong amuk, hu mbaok dalam Klup kapul nan lac sa kadha bui sambai biak prong kayua umo urak ini prong paje, bruk sinh hoạt ilamo, văn nghệ nan lac sa kadha biak siam ka rai diuk".

Daok ngan saong nghệ nhân ưu tú Hoàng Ngọc Sứu, sa urang anek di bangsa Thái, hu menek tabiak dalam pasak di ilamo bangsa drei nan ye ong biak thau hu yaom glaong di bruk khik ramik ilamo meng kan di bangsa drei. Ong Sứu tari tareng roh duah dom baoh tapuk klak di urang Thái, roh duah dom janih pambuak tal dom kadha tamia khan suek, tamia tadhik, tamia ndol saong dom ragam xòe piah pato veik ka dom urang dalam klup kapul. Langiu di nan, ong Sứu daok hu vak tapuk ndom tal dom inem mek dak rai sajarah, dom lễ hội saong meyaih khan urang Thái dalam xã Mường So, huyện Phong Thổ; roh duah dom panuac pandit, panuac pandao, dalikan ka bhum taneh Mường So sahanak ginreih. 

Gam haong bruk hu mbaok tame dom bruk ilamo,  daoh tamia di palei, Klup kapul ilamo bhap bani bangsa Thái palei Nà Củng daok hu nao giao lưu daoh tamia haong dom palei karei daok dalam saong langiu tỉnh. Tapa nan, ba chreih chrai, bui sambai ka dom urang dalam kalup kapul saong tapa nan piah ka urang bac megru, thau jang ka dom yaom glaong ilamo di dom bangsa karei. 

Meng abih hatai ka bruk ngak, klup kapul ilamo bhap bani bangsa Thái palei Nà Củng, xã Mường So daok rik daong pren yava pato tacei dom ragam ragu ilamo Thái ka rai rah dam dara bac megru, khik ramik saong patagok ilamo bangsa drei./.