Nao tal sang bac Tiểu học Vừ A Dính, khu phố 2, phường 1, ban sit  Tây Ninh, khol hulin duah taom anai gru Sa Ly Há, sa dalam dom gru pato naih gheih di tỉnh. Abih tuk pato, saai taduan khol lin dalam balik sit, min mekre meta. Saai brei thau, meng tuk dok sit, saai cong khin jeng gru pato. Tuk bac tamat tal 12, saai pakacah tame sang bac Cao đẳng Sư phạm tỉnh Tây Ninh. Thun 2005 tuk bac tamat bloh , saai hu ba mai pato di sang bac tiểu học Vừ A Dính. Di labik ni,  anai gru Sa Ly Há kham merat ba abih drei, iek anek saih yau anek kamuan di drei, duah dom jalan pato gheih, mbuan thau piah pato ka anek saih. Anai jeng bhian sangka tal dom anek saih yếu kém, anek saih hu rai duik kan kandah piah pachreih ba dom anak adei.

 “ Dalam tuk va pato, meyah lac dom adei oh thau ye drei nyai sap Chăm...

Thun 2010, hadei di dom kham merat, anai gru  Sa Ly Há hu tame Đảng. Thun bac  2013 – 2014 saai mek hu angan chiến sĩ thi đua cơ sở,  lac tổ trưởng tổ chuyên môn dalam luac  5 thun gam.

Anit bruk ngak, ranam anek saih, nan lac jalan ngak  di anai A Mi Ná, gru pato joi di sang bac  Tiểu học Tân Hưng A, huyện Tân Châu, tỉnh Tây Ninh. Bac tamat sang bac Cao đẳng Sư phạm tỉnh Tây Ninh thun  2004, saai hu brei bruk pato di palei drei. Tui jalan sahneng lac, pato hagait anek saih khin oh pato dom hagait drei thau, nan ye anai gru A Mi Ná sahneng duah jalan pato ka nyu lagaih di abih ngan song anek saih urang bangsa takik. Tui jalan “ mek anek saih ngak pasak”, anai gru A Mi Ná duah thau song ba dom ilamu siam di abih tame bruk pato pakai di drei. Tapa nan nyu pachreih anek saih bac da-a. Meng di nan, dom adei sit chreih chrai ndom puac, brei thau hatai sahaneng dalam yaok tiết bac, oh dok la cih vak ka bak baoh siphau bo oh thau asal kadha. Brei thau ka ilamu dalam bruk pato pakai, anai gru  A Mi Ná la:

 “Lac gru pato bangsa Chăm, hulin pato rilo thun tal sa hu anek saih bangsa"

Di sang bac Tiểu học Suối Dây A, huyện Tân Châu, tỉnh Tây Ninh hu sa gru pato bhian hu dom anek saih ieu lac  “anai gru Chăm”. Nan lac sa anai gru dok ranaih umo, ndih tapui thun 1988,  angan Sa Ni Ró. Bac tamat sang bac Cao đẳng Sư phạm tỉnh Tây Ninh thun 2013, anai hu ba mai pato di sang bac ni. Tuk bahrau mai ini ngak bruk, anai gaok oh takik kan kandah kayua anek saih bangsa Chăm oh thau nyai sap Yuan lo, dom adei bac suai thau, lavik kanal, samar var. Dalam tuk pato sap Yuan, meyah gaok dom adei oh thau, anai nyai sap cHăm piah langyah ka dom adei thau. Lavik harei dom adei hu tiến bộ song bac, nyai, cih hu haroh Yuan. Puac thun, anek saih di anai hu tagok lớp abih. Anai Sa Ni Ró khan lac:

  “Lac gru pato Chăm, hulin cong khin pato haroh ka dom adei bangsa di drei…

Meda lac meng hatai anit bruk ngak, ranam anek saih bo dom thun tapa, dom gru pato di Tây Ninh kham merat yam tapa rilo kan kandah piah kak kajap song bruk pala menuac. Bruk nan jeng brei mboh kayua habar dalam dom thun jiak di ni, bruk pato megru di tỉnh Tây Ninh hu patagok biak siam. Hu dom jak jeng yau nan, camereip di abih mai meng dom cei gru, anai gru dok harei melam ba abih pren ranaih song hatunghatian di drei brei ka bruk pala menuac di bhum taneh ni./.