Urang Gia Rai bhian peih ngak dom rija, roya di tukvak salih bilan di bilan hajan saong bilan thu. Ini lac tukvak kuhria caga ka bilan pala patui di nan dalam thun, saong jeng lac tukvak siam abih piah peih ngak dom rija uan tabuan, thau dhar phor po yang hu daong ka bilan pala hu siam mekre, hu rilo padai brah. Hadei di sa thun ngak bruk glaih glar, mikva bhian peih ngak dom rija, roya, dom harei pataom piah ba gauk me-in, bui sambai, var nao dom sahneng kuhria glaih glar dalam raidiuk. Dalam tukvak ini, urang Gia Rai peih ngak biak rilo rija, roya, rilo adat cambat, yau ye : adat thau dhar phor, tagok sang bahrau, abih di nyu lac adat Ngak pathi ...

Adat ngak pathi di urang Gia Rai lac adat gah metai lahik, min tui hatai sahneng di urang Gia Rai, ini lac harei pataom di bhap bini puk palei. Mai haong adat ngak pathi, abih gauk yau hu ba drei tame sap kong chiêng glaong-biar saong dom ragu ragam di vòng xoang pambuak atah. Dalam dom harei rah tabiak adat ngak pathi, di labik taneh vil val kabo, meda lac sap kong chiêng oh tuk halei padeih, urang salih gauk mbang menyum, chat tamia. Tuk hu alak tame rup, sap kong chiêng dak chreih chrai jang.

Dalam nan, bruk chreih chrai di abih meda lac tuk hu kapul urang tamia hóa trang tabiak mbaok. Thei jeng bui sambai, chreih chrai, urang da-a alak, urang yar ralow, akaok pakao hala… Thei jeng bui sambai, chat tamia dalam sap ginang, sap kong chiêng chreih chrai. Urang Gia Rai ieu nan lac dom Bram. Ini lac adat hu menuac sia dalam palei cang maong di abih. Urang Gia Rai sahneng lac, dom Bram lac dom khamot salut khik caga ka urang metai plaih di khamot jhak, atau lac rup pabhap di urang metai blaoh  mai bui sambai haong puk palei, vil val labik kubo.

Menuac hu pilih ruah ngak Bram lac dom likei dam hu prein yava, hu angan je, tuk hóa thân oh caik ka urang karei thau lac drei. Meyah urang mboh, thau lac drei, jeng hu makna lac dom Bram oh ngak siam bruk di drei saong njauk khamot cap mek. Kayua yau nan ye, dom Bram tuk halei jeng hu iek praong, brei hu kapul kong chiêng taduan raok meng labik hóa trang nao tal labik taneh kubo. Hadei meng chat tamia vil val labik kubo anak bruk chreih chrai di rahra dalam palei, dom Bram mai veik haong bruk biak di anak meta, min alak, pui, vòng xoang jeng daok tui lagu di kong chiêng dui atah miat.

Dahlau, dalam saong hadei di adat ngak pathi di urang Gia Rai, bruk jum pataom gauk hu brei mboh cambaih dalam yaok bruk ngak. Tui tacei pato di taha palei, oh lac taha atau meda, oh lac likei atau kumei, oh thei ieu thei, yaok urang sa bruk. Meng bruk tame glai duah kayau, ngak sang kabo, ngak rup kayau caga ka harei ngak adat tal bruk mek ia, tauk hala, pataom mek njuh, sah to…

Dalam dom harei ini, tuk po sang peih ngak adat, oh cang nao da-a, tok khan brei thau, ye abih menuac dalam palei ba gauk mai daong. Tuk mai, urang ba tui brah, pandap mbang, pabui, menuk saong alak tapai piah daong tame. Thei daong hagait saong daong hadom jeng hu, oh hu thei ndom biai lac takik atau rilo hagait. Ini jeng lac tuk pataom mbaok rilo menuac di rilo palei, rilo bhum karei di gauk dalam bhap bini urang Gia Rai; meda lac gauk gar, but pajaih, ayut sahabat, adei sa-ai pambuak talei rohim..../.