Baoh sang lac te bao di xa hoi, baoh sang hu siam mekre xa hoi meng cak rok patagok. Thau yau nan, urak ini rilo baoh sang urang Cam di Ninh Thuận jeng yau mikva dalam taneh ia drei kan kandah yau halei jeng kham merat raong anek nao bac ginup abih, hu jeng dom urang anek naoih joi, salut mbut, ngak bruk daong ka palei pala,  xa hoi. Kadha vak di Thúy Linh- urang vak di Rayo sap ndem Viet Nam daok ngak bruk di ban raya Ho Chi Minh brei thau ka bruk nan. Da-a mikva saong grauk ayut tui pang:

Di palei Cam Hamu Tanran, xã Phước Hữu, huyện Ninh Phước, tỉnh Ninh Thuận, thei jeng thau tal baoh sang diuk pasang sa-ai Lưu Văn Đến saong Thông Thị Huệ, nan lac sa baoh sang kan kathaot, jaoh jo min thau sahaneng kuhria, abih di nyu nan lac sangak raong anek nao bac, sa dalam dom baoh sang takre bac di palei ini.

Diuk pasang sa-ai hu 6 urang anek, min tok caong tame jien duah hu meng bruk ngak mbang apah di diuk saong jien daong joh jo yaok bilan 630 ribau đồng di sa-ai Lưu Văn Đến. Yaom lac kan kandah yau nan, min diuk pasang sa-ai Đến saong sa-ai Huệ tuk halei jeng kham merat brei ka anek bhik nao mbang bac. Diuk pasang sa-ai sahaneng mboh, sang drei kan kandah, oh hu bac da-a, sa-ai Đến jaoh jo oh ngak bruk hagait hu, nan ye anek bik sa-ai brei nao bac, yaom lac kan kandah yau halei, yaom lac ngak apah rambah rambup tal halei thau tal nan. Diuk pasang sa-ai sahaneng, yaom lac anek bhik oh ka ginup mbang ginup ngui cuk min diuk pasang sa-ai kham brei ka anek hu akhar tapuk. Ngan saong bruk kham merat nan, mbiah tal harei ini, diuk pasang sa-ai ngak bahu bruk raong anek bac da-a tal labik tal dhua. Anek likei praong abih urak ini daok bac thun ka 3 Sang bac đại học Bai Gon, khoa Sư phạm lịch sử;  dom anek hadei daok bac di dom sang bac trung học, tiểu học dalam palei. Thau bruk rambah rambeip di amaik ame, langiu di bruk kham bac naih joi, dom urang anek di sa-ai  daok thau anit gauk, daong ka gauk dalam bruk bac da-a. Sa-ai Thông Thị Huệ brei thau:  “Diuk pasang dahlak kham raong anek bik nao bac, yaom lac daok kan kandah rilo….

Daok baoh sang ong Châu Quày, palei Cam Ban Riya, xã Bắc Sơn, huyện Hàm Thuận Bắc, tỉnh Ninh Thuận jeng yau nan, anek rilo, raidiuk daok rilo kan kandah, min ong kham raong anek nao bac tal labik tal dhua. Ong Châu Quầy sahaneng, daok dalam saman rilo salih birau ini, manuac urang brei hu ilamu, duah hu bruk ngak halei oh daok pak drei, kayua bruk bac di drei. Dahlau atau hadei jeng duah hu bruk ngak, meyah anek bik hu bruk ngak ye manuac sia iek praong jang. Ngak amaik ame njauk brei tacei pato, daok bruk bac piah harei hadei ye anek njauk sahaneng tantu, brei kham merat yam tapa dom kan kandah meng rup eng. Langiu bruk pachreih anek bik bac da-a, diuk pasang ong tuk halei jeng tacei pato dom anek jalan diukrai siam mekre, oh co klaik, ngak suan ngak chung dalam palei, xa hoi. Meng hu bruk tacei pato di dua diuk pasang ong, bo 7 urang anek di ong thei jeng salut mbut, kham bac da-a. Urak ini, 4 urang anek di ong hu bruk ngak tani tanat, 2 urang daok bac di dom sang bac trung học, cao đẳng dalam saong langiu tỉnh. Oh lac baoh sang takre bac dalam bhap bini bo sang ong Châu Quầy rilo thun ini mai daok lac baoh sang urang nong ngak mbang naih joi; daok dang saong mikva puk paga gheih ghang, rik jien padai tame ngak jalan mbak dalam palei; tacei pato mikva ba pandar ilamu ky thuat birau tame pala drak raong glang patagok raidiuk. “Ngak amaik ame thei jeng caong khin anek bik drei hu jak jeng, thau akhar tapuk, drei brei tacei pato ka kol nyu bruk bac da-a…”

Oh lac baoh sang di ong Châu Quày, Lưu Văn Đến, urak ini daok hu rilo baoh sang urang Cam karei daok di tỉnh Ninh Thuận raidiuk kan kandah min kham merat kak tian raong anek nao bac tal labik tal dhua, jeng urang ngak bruk daong mikva, xa hoi. Yaok thun,  yaok rituh baoh sang urang Cam hu Trung ương, tỉnh, huyện meyom lac baoh sang takre bac; rik tame dak padang bruk xa hoi bac megru; yaok ribau anek taco urang Cam lac anek saih, sinh vien yam tapa kan kandah bac da-a naih joi. Ong Thọ Đẳng – Akok Kapul pachreih bac huyen Ninh Phuoc, tỉnh Ninh Thuan lac: “Dalam huyện Ninh Phước hu rilo bhap bini Cam, yau nan ye bruk pachreih bac, pachreih ngak bruk dalam huyen siam jang dut saong dom labik karei…”

Meda ndom lac, dalam bruk salih birau yau harei ini di bol bhap Cam Ninh Thuan meneing mai meng bruk takre bac. Kayua dom baoh sang urang Cam thau lac, piah ngak siam jalan tacei ba di Đảng saong Karja dalam bruk dak padang sa xa hoi bac megru, dahlau di abih, brei padang baoh sang bac megru, baoh sang takre bac./.