Pathau mikva saong taong abih gauk, Meng harei 23 tal harei 25/10, urang Cam Ahier chreih chrai mbang Katê. Dalam dom harei nan, hu rilo janih ahar meng kan, bo ahar naong ya,  Sakaya, pei nung, pei liik... lac janih oh kurang hu piah mikva da-a muk kei saong hatai caong ka raidiuk dak harei dak trei sir, haniem phul. Pa-uan Katê di urang Cam Ahier di Ninh Thuận, urang pambuak bruk Văn Cảnh – Minh Triều hu khan tal mikva saong taong abih gauk dom janih ahar biak karei di harei Kate:

Urang Cam hu panuac lac “Pei nung daok gah la - Sakaya daok gah angaok piah brei mboh yaom glaong di ahar Sakaya. Ahar Sakaya bhian hu ngak dalam tuk mbang Katê di urang Cam saong hu urang Cam Ninh Thuận biak takre.     

Meng tuk daok lac sa uraniah bac tal 4, tal 5, amuk Trương Thị Đào daok di palei Hữu Đức, xã Phước Hữu, huyện Ninh Phước hu amuk gah ame pato ngak ahar Sakaya meng kan di urang Chăm. Urak ini umo jaik 60 thun min amuk daok takre ngak ahar Sakaya piah da-a muk kei. Amuk brei thau, ahar harei ini hu ngak karei jang samar dahlau min nyu daok khik hu yamen bingi di janih ahar Sakaya. Amuk Trương Thị Đào lac: 

       Băng: Dahlau deih amuk gah amaik ngak  meng đường tán, praong tagok dahlak ngak meng đường cát. Ngan saong urang Chăm ye dom harei roya praong yau Ka tê,  ngak pathi, likhah caga urang meng ngak ahar Sakaya. Nan ye ahar ini biak hu yaom gloang ngan saong bhap bini urang Cam.

Lingiu ahar Sakaya, ahar naong ya jeng hu urang Cam ngak piah da-a muk kei dalam dom harei rija, roya. Ahar naong ya hu ngak meng tapung brah, saradang, baoh menuk saong baoh khi. Nyu hu ngak meng kan mai piah brei mboh hatai caong ka raidiuk hu trei sir di urang Cam. Ong Quảng Văn Đại, xã Phước Hậu, huyện Ninh Phước, tỉnh Ninh Thuận brei thau: 

        Băng: Taong abih dom janih ahar nan, urang Cam piah da-a muk kei, caong muk kei chraong daong ka hajan siam, hangin lagaih, ngak hamu hu padai, ngak puh hu tangei, raidiuk hu trei sir, haniem phul. Meyah Ka tê oh hu dom janih ahar nan, ye Ka tê oh daok hu makna.

Dalam gilang ilamu di urang Cam, dom janih ahar meng kan biak hu yaom glaong, pambuak pagam haong dom adat cambat pok da-a muk kei dalam harei Katê. Lingiu di nan, tuk ngak dom janih ahar ini di tuk Ka tê, jeng lac tuk piah ka urang brei mboh bruk naih gheih saong yaih ilamu mbang huak di urang Cam. Amuk Nguyễn Thị Thu, Giám đốc Pasak roh duah ilamu  Chăm Ninh Thuận lac:

         Băng: Hu biak rilo janih ahar di urang Cam min tuk mbang Katê mikva bhian ngak ahar naong ya, Sakaya, pei nung. Urang Việt jeng hu min urang Cam ngak karei jang. Nan lac ilamu mbang huak saong nyu hu mbaok dalam dom rija, roya, abih di nyu nan lac tuk mbang Ka tê piah mikva da-a muk kei. Nan jeng lac kadsha biak karei di Ninh Thuận.

Dom janih ahar meng kan di urang Chăm hu ngak meng dom janih pandap hu dalam palei. Dom janih pandap piah da-a muk kei di urang Cam jeng brei tui hatai sahneng ka lingik tasik, ka anek menuac, brei mboh tapa pandap ngak, tapa số lượng saong bruk rami ramik dalam dom adat cambat.  Ini jeng lac ilamu biak karei saong jeng bruk hu yaom glaong dalam ilamu mbang huak di urang Cam/.