Đồng Nai brei taneh ngak jalan piah yaok urang takik rambah rambep

      Bruk padang ngak palei pala barau di Đồng Nai hu mek hu rilo bruk njauk hatai di bhapbini dom puk palei. Abih di nyu nan lac, di bruk ini, rilo urang nong hu halan hatian brei yaok rabau mét vuông taneh ngak jalan nao mai di palei pala piah gam buh oren dak palei negar. Kadha vak di urang pambuak bruk Ngôn Chi yaih khan ka sa urang nong brei taneh ngak jalan di huyện Thống Nhất, tỉnh Đồng Nai:   

       Baok jalan di tổ 6, ấp Nguyễn Huệ 2, xã Quang Trung, huyện Thống Nhất, Đồng Nai daok thi công, kuhria caga hadei tết Nguyên Đán Đinh Dậu meda ngak blaoh. Taneh, patau daok srau kadau, dhur muan yau nan min oh mboh sa urang halei bực bội. kayua ini lac baok jalan mòn sit livik mai mikva nao mai pajeng ba, pablei salih kaya nong meng puh mai sang, tabiak huyen. Bilan hajan lac glut baok, pandiak lac dhur mun. Min, oh hu suai tra, baok jalan haluk dhur mun ini hu jeng jalan bê tông atah labaih 1.200m, praong meng 4 tal 6m, hu jalan menyek patung dua gah. Bruk njauk pok meyaom lac piah ngak baok jalan ini, rilo urang nong halan hatian brei taneh pala drak di drei, urang takik lac pluh, urang rilo lac brei yaok rabau met vuong taneh. Dalam nan, ông Vũ Viết Châu lac sa dalam dom urang brei taneh rilo abih, ngan saong labaih 3.000m²  puh  . Ông Châu khan lac :“Dahlak mong mboh mikva rambah rilo, harei hadei oh hu baok jalan lac nyu biak kan kandah. Puh sang dahlak lac daok di dom canah jalan praong, dahlak oh brei taneh lac mikva oh hu baok jalan halei nao tapa. Meng bruk nan, dahlak maong mboh bruk haniem siam ka yaok urang lac dahlak brei taneh nan.

     Hu urang bhapbini poh menyaom, ông Châu hu nao jak ba, ieu rilo urang brei taneh peih praong veik rilo jalan karei di xã. Urang nong Vũ Ngọc Chất gam pataom tame brei taneh ngak jalan saong ông Châu khan lac :  “Nyu lac baok jalan trục lộ praong brei ka drei nao mai siam lagaih ka bruk ngak mbang di drei nyu mbuan jang. Dahlak sahaneng lac kayua bruk hy sinh di drei lac mikva jeng ranam drei, daok saong gauk di bruk anit ranam lac praong abih.

      Oh lac hu baok jalan di tổ 6, bo oh hu suai livik di ini, jalan tổ 5 atah 1,3km jeng di ấp Nguyễn Huệ 2 hu salih jeng jalan bê tông meng lingiu nao tal puh meng taneh brei di mikva di libik ini. Saai Phạm Duy Thành daok di ấp Nguyễn Huệ 2, xã Quang Trung, huyện Thống Nhất brei thau hu baok jalan yau ini jeng hu lac pren di dom urang ye ông Châu:“Mengkan nao takai, blaoh ramik psiam hamiet sit sit ndih radaih honda. Hadei ini hu Wa Châu lambaok ka gah ngak nong piah ieu mikva saong karja daong ka mikva hu baok jalan.”

      Rilo urang hu ndom tal ông Vũ Viết Châu biak pok glaong kayua dom thun tapa, ông hu brei labaih 3.000m²   taneh puh ngak rilo canah jalan karei di gauk. Ngak tui ông, biak rilo urang nong di huyen  Thống Nhất hu brei jaik 13 rabau met vuong taneh ngak jalan nao mai di palei, rik daong yaok tỉ đồng padang ngak công trình menyek.

       Nao angaok dom baok jalan pambuak pagam ấp di xã Quang Trung, huyện Thống Nhất barau hu tuh bê tông, tuh menyek tapak di lingik xuân la ar bingi ngak ka kol drei mboh sambai jang. Bruk bui sambai nan hu rilo veik tuk ông Châu saong mikva urang nong huyen Thống nhất khoe lac : jaik tal, rilo baok jalan palei pala sit, binik hu tuh bê tông laneng pambuak pagam saong gauk meng ấp ini tapa ấp thiah, xã ini tapa xã karei meng dom tấc taneh ameh bo rilo urang alin brei di bruk padang ngak palei pala barau./.

Thúy Linh