Nyu jeng bhian randap, yaok thun tal harei 2 bingun bilan 2 saka ia bulan, nyaom darak pasar Thụt di huyện Hàm Yên, tỉnh Tuyên Quang hu peih tabiak. Ini lac nyaom drak pasar biak karei kayua yaok thun tok peih tabiak sa mbang, piah pablei pandap ngak nông saong dom janih kaya nong di bhap bini puk palei, pachreih hu yaok ribau menuac mai meng ralo puk palei. Urang saneng lac, mai tal drak pasar Thụt piah “blei bruk patuah jamo, pablei nao bruk oh patuah jamo”. Yau nan nyaom drak pasar nan nyu yau habar, daa mikva saong taong abih gauk duah thau tapa kadha “dom bangsa adei saai”  harei ini:

Meng sabuh mesup, bhap bini di grap labik chreih chrai ba gauk tuh mai palei Thụt, xã Phù Lưu (huyen Hàm Yên) hu mbaok tame nyaom darak pasar Thụt. Dom gian hàng parang pablei di drak Thụt langiu dom pandap panda di puk palei daok hu ralo gian hàng karei di urang nao pasar meng dom tỉnh karei yau Hà Giang, Nam Định, Hải Phòng… hu parang pablei di tapen dua gah jalan, tui kuhria nyu atah jaik sa mbaik jalan. Tui panuac khan veik di dom urang taha praong thun, angan ieu drak “Thụt” kayua drak ini daok dalam palei Thụt, xã Phù Lưu (huyen Hàm Yên), gah ieu kraong Lô, atah phố huyện Hàm Yên jaik pluh mbaik jalan mai gah brak. Dahlau daih pandap panda hu pajeng ba meng gaiy gilai, kayua bhap bini daok di grap labik ba mai, hu pataom di tapen kraong, parang pablei ka bhap bini puk palei. Tuk nan, di tapen kraong hu ralo urang Lô diuk rai, nan ye menuac dalam palei bhian ieu lac “phố urang Lô” atau phố Thụt. Bruk gheih mekre di drak Thụt nan lac “urang pablei menyai njauk yaom – urang blei oh bayar yaom” taong abih gauk jeng jeng bui sambai, chreih chrai. Urang oh lac brei ka gauk dom pandap pandap, bo daok payua ka gauk panuac tadhau yuh harei xuân, likau ka thun barau hu ralo patuah jamo, “hajan siam ngin lagaih” dahlau di tuk yam tame bilan ngak barau.

Nao drak Thụt, tuai damuai oh lac hu mbang dom pandap mbang bingi biak karei, dom kaya nong yau: labung, cam, kruoc atau dom janih ahar ngak jeng thaik dom anek hu biểu tượng likau patuah jamo ka sa thun barau siam mekre, raong glang hu kein laba bo daok hu mbaok tame dom kadha me-in meng kan yau glum còn, phi tiêu, jhul gai… Yaom lac urak ini, ralo jamriah barau hu salih ka dom pandap ngak nông meng tangin min tame drak Thụt ye ralo bhap bini jeng duah blei ka drei sa pandap ngak nông, ini lac biểu tượng likau patuah jamo, likau brei hu hajan siam ngin lagaih, phun pala hu that hijao jeng gam lac pandap piah lưu niệm di urang nao drak. Bruk njauk biai nan lac, thun ini bruk peih nyaom drak pasar nyu njauk saong harei pataom pakacah saih nan ye nyu pachreih gilac yaok ribau tuai damuai meng dom labik karei mai hu mbaok tame.

Dui pachreih dom amuk, dom kamei dara nao drak nan lac dom gian hàng pablei khan ao saong rilo janih khan, muot saong dom janih khan bai… ndung bak ilamu di bhap bini dom bangsa labik ini. Dahlau daih bhap bini dalam bhum brei cang tal tuk peih drak Thụt meng blei hu pandap ngak nông saong dom pandap panda karei, daok urak ini mikva nao tal drak Thụt langiu bruk blei pandap, urang daok hu taom gaok ndom meyai nao mai hong gauk hadei di sa tukvak suai lavik oh taom gaok, ralo likei kamei hu tuk piah sanya gauk. Dom pandap panda urang blei ralo meng lac hu yaom gah tinh thần ralo jang yau piah ngak kỷ niệm, piah likau brei sa bilan ngak hu siam mekre.

Drak Thụt nan lac sa nyaom drak biak karei tok hu di Phù Lưu, yaom lac urak ini hu ralo salih karei min dom ilamu hadah krah di bhap bini 12 bangsa dalam huyện Hàm Yên jeng daok khik hu. Piah hu dom janih pandap biak karei, karja palei patagok bruk pathau khan jak ba bhap bini dom bangsa dalam huyện ngak tabiak, khik ramik dom janih pandap biak karei di puk palei. Kayua yau nan ye, yaom lac tapa yaok pluh thun, min dom yaom glaong ilamu Việt ka nyaom drak Thụt jeng daok hu khik ramik./.