Gheih mekre Ok- om- bok Trà Vinh inem krung ilimo phi vật thể negar

Mai Trà Vinh dalam dom harei nan, tuai damuai oh plaih di tatuak drei tuk mboh bak hala dok, bingu la; sap phleing ngũ âm gam saong sap preo ieu, pachreih ba dom kadha mein mengkan ye : katung gauk, jan gaok, jhul gai…gam saong sap loa paparsap meng dua - dua sap Viet – Khơme ngak brei chreih chrai jang, ndung bak rija di bhapbini bangsa Khmer 

Dalam melam ia bilan bak baok bilan 10 saka ia bilan, dahlau di tuk ia bulan  tagok tal kreh kaok, abih urang dalam phum sóc pataom gauk di mblang baha atau mblang sang – labik hu binguk phun pacang ia bilan. Di labik ini, mikva padang bambang hu trang trí bingu hala, ala bambang caik sa baoh ban hu dom pandap paling ia bilan lac dom kaya nong bo mikva pala hu ye : pataiy, la u, kruac bhung… tui pren di yaok sang min oh kurang hu piên (cốm dẹp). Ông Àcha Thạch Ngọc Phương Thi – urang hu rilo thun tu bac, thau cambaih ka ilimo bangsa Khmer, mai meng huyện Càng Long brei thau : “ Pandap piah paling ia bilan lac dom baoh kayau pala dalam bein. Dom kaya nong ini paik hu hadei di 6 bilan hajan bo mikva pala hu, min praong di abih lac piên hu ngak meng ndiuk barau akaok bilan ”. 

Tuk ia bilan tagok truh jhung phun, hadah tagok, urang ieu yang bhian lac urang taha hu but pajaih pok je, meng cuh gilau, truac din, tuh ia tea pok tagok po yang ia bilan; taphia nan likau ka hajan siam angin lagaih, pala drak njauk, phum sóc siam mekre, bhapbini khang kajap pren yava… Pok kakuh blaoh, urang ieu yang daok la pok tangin mai gah ia bilan, mek piên saong dom pandap paling yang yaok janih hasit kacao veik traok tame pabah uranaih, tangin daok veik taong yun tame ka-eng saong tangi dom caong khin ka harei hadei di dom adei… Uranaih brei thau caong khin di drei. Pang blaoh, urang ieu yang kakei dom kamuan kham merat bac da-a ka nyu naih joi piah ngak hu dom caong khin, hu kein laba ka puk palei. Adat ieu yang ia bilan tamat bloh, urang uan tabuan tadau yuh gauk dom panuac siam mekre di abih. Ông Acha Lâm Phi mai meng huyện Trà Cú ndom lac : “Adat ngak yang ia bilan ini tal bilan ye mikva Khmer sang halei jeng ngak. Makna piah thau dhar phuan po yang khik caga bilan pala, maong veik sa thun drei pala hu  hagaiyt, pok panuac likau ngak mbang ginup meda, pren yava khang kajap…hu ông muk kei caik veik mengkan mai tal urak ini thun halei jeng njauk ngak yang.

Langiu bruk pok tagok po yang ia bilan dom kaya nong puk palei, di melam ia bilan bak baok daok hu adat palao menyek ia ( hoa đăng) bo mikva Khmer ieu lac Lôi protip saong adat palao menyek angin. Menyek ia dahlau thiah hu ngak meng phun saong bẹ pataiy, hu cih bingu la, hu ngak dreih yau sa baoh kandi, angaok mui hu tuan hala dok khan bai, min hadei ini hu salih tapa pandap njul. Adat palao menyek ia lac piah likau ma-ah po yang taneh saong po yang ia tapa sa thun li ua drak, pala drak ngak tabiak padai brah. Menyek hadah tabiak meng baoh menyek theik di kraong dalam melam rija jeng piah pahadar menuac urang njauk khik caga ia, alam moi trường sinh thái. Dalam tuk menyek angin hu palao tagok lingik, par nao par mai di lingik melam ba panuac siam mekre tagok po yang ia bilan. Min adat ini urak ini oh daok tra bo hu salih meng blah khan bai lipih sambo màu kanhik, truai hadah meng điện tuan tagok phun, hadah mekre. Ông Acha Sơn Sol mai meng huyện Trà Cú brei thau ka makna di adat palao bingu đăng dalam melam ia bilan baok baoh yau ini “Lôi pro tip (palao hoa đăng) lac piah thau dhar phuan taneh riya kayua taong abih janih di baok taneh hu ngak tabiak meng 4 janih lac taneh,ngin, pui, ia saong 4 janih nan raong diuk abih janih, dalam nan hu anek menuac. Yau nan ye, taphia adat praong ieu yang ia bilan, po yang khik caga mùa màng, bhapbini mengkan oh var thau dhar phuan taneh riya kraong ribong.   

Ok- om- bok, lac sa rija ndung bak adat cambat tanarakun mangkan di bhapbini Khmer Nam bộ, hu peih ngak yaok thun njauk di melam ia bilan bak baoh bilan 10 saka ia bilan bo urang Khmer Nam bộ ieu kac bilan K-đấk. Ini lac sa dalam 3 adat praong dalam thun di bhapbini, nan lac: Chôl- Chhnăm- Thmây, Sêne Đolta saong Ok- om- bok . Rija rah tabiak di abih puk palei hu bhapbini daok min hu peih ngak praong abih di labik inem mek ilimo – sajarah Ao Bà Om ban sit Trà Vinh, tỉnh Trà Vinh. Thun bloh,  Ok Om Bok hu mintri ilimo padhih saong du lich brei angan lac “inem krung ilimo phi vật thể pakat negar”. Meng di nan, rija hu peih ngak praong jang ngan saong rilo bruk mein gam ndung bak bruk mengkan gam hu bruk barau saong lac tuk piah ka dom bangsa adei saai dalam tỉnh hu taom gaok ilimo saong gauk. Ông Nguyễn Đại Đức, Phó akaok sở ilimo padhih saong du lich tỉnh Trà Vinh brei thau  “ Ok- om- bok lac sa bruk ngak gam ndung bak ilimo mengkan gam ba  bui sambai chreih chrai ka bhapbini bangsa Khmer uan bilan pala drak njauk,  urang Yun, urang Lo jeng pataom mbaok tame gam raok bilan thu nan. Ini lac bruk biak siam di dom bangsa dalam tỉnh Trà Vinh, jeng lac bruk hadah mbaok di bhapbini Trà Vinh. Yaok thun tuk bilan Ok- om- bok mai, ba rilo bui sambai ka abih menuac urang. . 

Rija Ok-om-bol- ieu yang ia bilan lac sa bruk greih mekre dalam ilimo mengkan di urang Khmer Nam bộ. Nan lac caong khin rabau rabau rai oh lac di ta-eng bhapbini bangsa Khmer bo daok lac caong khin di dom bangsa, di menuac sia. Urak ini rija hu jeng bruk ilimo gheih mekre dalam raidiuk di sa bhum, oh lac di ta-eng bhapbini Khmer bo lac di abih dom bangsa daok dalam bhum./.

Thúy Linh