Pathau mikva saong grauk ayut!

Bhum taneh Tay Bac oh lac hu langik tathik, ceik glai mekre meta, bo labik ini daok ngak ka urang tatuak drei meng dom gheih mekre di bingula angaok khan ao, pandap mbang, sang danaok tal pandap cuk di dom bangsa takik. Dom pandap nan  tuk halei jeng pachreih dui, ieu da-a dom urang roh duah, dom urang anit ranam ilamu bangsa mai ini roh duah. Dom gheih mekre di dom gu parik tanye di urang kumei bangsa Mông nan lac sa bruk ngak pachreih urang tuk mai tal bhum glaong Sơn La. Da-a mikva saong grauk ayut duah thau dom gheih mekre ini tapa kadha vak “Gheih mekre parik tanye di urang kumei bangsa Mông .

Urang bangsa Mông hu labaih 12% dom menuac sia dalam tỉnh Sơn La. Urang hu mbaok di taong abih dom huyện dalam tỉnh, bhian daok di angaok ceik glaong saong bhum taphia negar. Tui adat cambat tanarankun di urang Mông, abih di nyu nan lac urang kumei, parik tangi oh lac pandap cuk ngak mekre bo daok ndung bak dom yaom glaong ilamu brei mboh adat cambat karei di bangsa. Dom gu parik tuk mbuan mbiah, tuk cầu kỳ, min jeng hu ngak meng pariak mbong. Gu parik di urang kumei Mông bhian gul vin, angaok mbaok hu sarak binguk ia bulan, ia harei, lac dom po yang khang prein bo urang Mông jia tame. Amuk Mùa Thị Mỵ, xã Xím Vàng, huyện Bắc Yên, tỉnh Sơn La lac:

Bang:  Meng tuk daok sit hu cuh parik ye, nyu gam ngak brei mekre gam lac adat cambat di amaik ame caik veik, yaok mbang nao ma-in khol dahlak palih ruah ka drei gu parik mekre di abih.

Langiu di bruk lac ngak mekre meta, gu parik di urang kumei bangsa Mông daok brei mboh bruk kaya meda di urang cuk nyu. Dom urang kumei cuk dom gu parik praong bhian hu maong lac dom urang hu prein yawa khang kadang, tari tarieng ngak mbang, sang hu labaih drap ar. Lingiu di nan, urang Mông daok jia lac, gu parik lac sa janih pandap caga ka rup drei biak siam, pacang hu bhut khamot, angin jhak. Sa-ai Mùa Thị Gống, Bản Xím Vàng, xã Xím Vàng, huyện Bắc Yên, tỉnh Sơn La brei thau: 

Urang kumei Mong khol dahlak hu amaik ame phluh tangi meng tuk umo 4-5 thun, bloh cuh parik meng umo 14-15 thun, saong oh tuk halei brei suak tabiak yaom lac nao ngak apuh, ngak hamu, menyim khan bai atau nao darak; nyu pambuak pagam saong diuk rai yaok harei. Khol dahlak biak hadah mbaok meta ka gu parik di bangsa drei, kayua tuk cuk tame thau lac bangsa Mong, oh meluh saong bangsa karei. 

Gu parik jeng hu rilo janih karei di gauk, tui hatai takre bo urang kumei Mông palih ruah ka drei gu parik halei njauk hatai di abih. Hu urang cuk gam 2 gavang parik. Gu parik bhian hu 5 thaik thaot nan lac: dreih yau dấu hỏi, yau baoh baoh, yau ia bulan dom bingun, gul vin sarak bingu la saong gul vin hu pagam dom janih karei. Angaok dom parik gul vin nan hu dom janih bingu la mekre meta. Tuk lac dom bingu sit sit, tuk lac dom bingu praong pagam cagar nao mai, hu tuk lac dom jalan cagar pambuak gauk. Dom bingu la nan hu ngak meng tangin ndung bak dom hatai sahaneng di urang kumei daok di bhum ceik glai Tay Bac. Amuk Hạng Thị Dong, Bản Cúa Mang, xã Xím Vàng, huyện Bắc Yên, tỉnh Sơn La khan lac:

Khol dahlak cuk parik gam tuk nao ngak apuh atau daok menyim khan bai yau ini, jeng yau tuk nao tame glai paik njam, mek njuk. Bhap bini khol dahlak jia lac, gu parik ba mai rilo siam mekre, patuah jamo saong palaih hu but kamlai.

Dom gu parik mboh yau mbon mbiah, min ngan saong urang kumei bangsa Mông di Sơn La, gu parik daok brei mboh bruk gheih tangin, brei mboh raidiuk hu rilo ilamu saong pambuak pagam haong langik tasik, ceik glai, alam dunya. Urak ini, dom urang gheih tangin ngak parik oh daok hu rilo. Dom gu parik pariak ngak meng tangin dak harei dak lahik nao, salih tame nan lac dom gu parik hu ngak meng mac, pablei ralo di drak pasar. Meyah oh hu dom jalan ngak lagaih dalam bruk roh duah, khik ramik dom yaom glaong ilamu siam mekre meng gu parik di urang Mông juk, ye bruk dom gu parik meng kan dak harei dak lihik nao lac bruk oh plaih hu./.