Labaih 4 thun ni mai meng 4 tuk mesup, adei Tráng A Đông, sang dok di cụm 17, palei 7 (Đắk R’măng) medeih piah nao takai labaih 10km tal sang bac. Thun bac ni, adei likei Đông tame tal bac 1, Đông hu bruk ba adei nao bac.

Hadei di tuk rao mbaok meta,  caga tapuk siphau,  lisei ba tui, 2 adei saai Đông gam song dom uranaih dalam palei nao takai tal sang bac . Dom labik jalan kan nao, Đông cõng adei nao tapa oh caik ka nyu labuh . Tui Đông, bruk nao takai labaih 10km lac biak glaih glar, urak ni daok kuhria ka adei nan ye mboh gleih glar jang, livik livik Đông padeih gleih. Kayua yau nan ye, abih rilo tuk vak jang, song 2 adei saai Đông mai tal sang bac  suai jang dom ayuh sahabah sang dok jiak sang bac.

Kayua bac mesup nan ye adei likei Đông tame tal bac, dok Đông dok di mblang cang tal tuk vak bac beir harei di drei meng tame bac. Abih var bac, adei likei Đông bac bloh, huak lisei song saai bloh dok la gah langiu cang saai bac bloh piah ba gauk mai sang.

Oh lac adei saai Đông, yaok pluh uranaih di dom cụm 16, 17 (palei 7) harei harei jeng nao takai labaih 2 tuk piah tal sang bac. Tuk tal labik, tong abih sre ia huak, mbaok meta gam thur mun gleih glar. Jalan atah, rilo adei bac var beir harei min nao meng saboh mesup piah samu tuk tame sang bac

Dok dom harei bac gam mesup gam biar harei, tong abih adei dok veik di sang bac kreik pandiak, cang tal beir harei tame bac. Dom adei ba tui lisei piah huak. Mboh var lasei di dom adei, urang halei jeng mboh anit. Tok hu lasei haong sara, hasit njam glai song dom boh cà pháo laik tapa sambo jhuk

Adei Vàng A Trung, anek saih tal 3 brei thau: “ sang adei dok atah, mesup mai yaok urang dalam sang nao ngak abih, adei di sang jeng oh thau ngak hagait, yau nan ye nao takai meng saboh avar tal sang bac song dom ayuh ka sambai. Nao bac avar gam bingi liar, hu rilo ayuh nao song gauk, meyah lac cang tal tuk cala pandiak nao ye pandiak lo, takik urang, tal sang bac gleih glar kan bac hu siam.

Thaot binguk yaok pluh anek saik bak katap, tangin pan pok lisei dok di mblang bein cang tuk tame bac hu rah tabiak meng rilo thun ni mai

Sang bac tiểu học La Văn Cầu lac sa dalam 2 sang bac Tiểu học di xã Đắk R’măng. Sang bac urak ni hu 654 anek saih, dalam nan hu 98% anek saih lac urang bangsa takik. labik ini daok rilo kan kandah kayua oh ka hu điện, ia piah pandar. Sang bac hu duah jalan pasiam veik meng bruk pandar năng lượng ia harei song kuac danao piah mek ia pabak ka bruk pato pakai, mbang ngui di cei gru anai gru song dom adei min dok rilo kan kandah tavak tavaiy 

          Gru Lê Quận Thanh Minh, Hiệu phó sang bac brei thau “ Oh lac hu dom adei sang dok di cụm 16, 17 palei 7) bo daok hu rilo ADEI karei nao takai meng 6 - 7 km tal sang bac. Kayua SANG daok atah, nan ye harei lei jeng hu meng 10 -15 anek saih bac biar harei min meng mesup jeng hu mbaok di sang bac. Nao bac gleih glar yau nan min dom thun jiak di ni hu biak takik anek saih klaK bac. Anak bruk di dom adei yau nan, sang bac pachreih ba, kakei dom adei main dok jiak sang bac song khik trật tự ka dom adei karei dalam tal bac.

Ong Phan Đinh Tuấn, Phó JJabat pato megru huyện Đắk Glong brei thau “ Bruk anek saih kayua sang dok atah, kreik pandiak dok veik di sang bac, hu rah tabiak di sang bac tiểu học La Văn Cầu (xã Đắk R’măng) song sang bac tiểu học Vừ A Dính (xã Đắk Som). Thun 2015, sang bac tiểu học Vừ A Dính hu ngak iek bruk sang gam dok ka dom adei. anak tal, meyah bruk ini mboh hu siam lagaih, brei peih praong tapa sang bac tiểu học La Văn Cầu piah padeih bruk nan. Langiu di nan, dom cụm dok atah sang bac, tuk ginup anek saih ye jeng meda peih tal bac tạm, sang tạm piah ka dom adei nao bac ka jiak.

Kham merat pasiam kan kandah piah nao tal sang bac di dom uranaih urang bangsa takik di labik ni lac bruk njauk iek prong song njauk pachreih ba. Cong khin dalam tuk vak anak tal di labik ni hu buh jien tame  piah padang sang bac bán trú atau hu bruk mbang bán trú, hu sang bac sit, piah ka dom adei takik glaih glar jang angaok jalan nao tal sang bac./.