Oh thau kadha main tung còn hu meng tuk halei mai, tok mehit dom urang taha Thái bhum Tây Bắc khan veik: Meng kan, urang likei kumei Thái nao ngak hamu, bhian glam paok danik padai ka gauk, meng nan hu tabiak rai kadha main glum còn. Meng harei nan, baoh Còn oh kurang hu dalam dom harei le tet saong hu patal veik meng rai ini tal rai diah. Amuk Tòng Thị Thân daok di xã Mường Cang, huyện Than Uyên, tỉnh Lai Châubrei thau:

“Thun halei jeng yau nan, tuk tết tal mai khol dahlak ngak baoh còn piah main Tết. Ini lac ilamu meng kan pambuak saong raidiuk di urang Thái, sa bangsa tuk halei jeng ndam gam saong bruk ngak padai ia.”

Dalam baoh sang tuan meng kan, adei sa-ai kumei bangsa Thái daok pataom gauk ngak baoh còn piah main xuan. Dom klaih khan bai adei sa-ai jhik pet labaih pataom veik luac thun hu ba tabiak ngak baoh còn. Baoh còn hu ngak yau ini: cakak sa klaik khan bai pak meta praong 20 cm, pataom pak kok veik jik pagam 3 jalan, akok daok veik caik piah jaih merai tame baloh jik pagam abih. Talei baoh còn atah labaih 50 cm hu ngak meng khan bai kajap. Piah ngak hu dom baoh còn mekre meta, dom adei sa-ai kumei brei palih ruak khan bai hu ginup dom sambo mau jao, bhong, tím, kanhik katam ngak brui meng baoh còn tal talei còn. Bruk jhik baoh còn oh lac piah iek merkre meta bo daok lac hu mak na tui adat cambat. Urang Thái sahaneng: baoh còn oh hu brui lac “Còn Mải” nan lac urang kumei metai pasang. Baoh còn tuk halei jeng brei jik brui pak gah yau ye pak gah langik tasik, brui di jhung talei còn saong ala baoh còn lac brei thau ka langik tasik taneh riya. Bloh hadei di nan mẻng jhik dom brui daok veik saong hu rilo brui ginup sambo mau meng hu patuah jamo, ginup meda saong cak rok patagok.

Tuk hu ginup dom baoh còn rilo ban sambo màu hadah, urang dalam palei ba gauk tabiak glam baoh còn. Oh yau dom kadha main tó mák lẹ, glam baoh atau dom kadha main bhap bini karei, tok hu mblang anak sang ye main hu, bo glam baoh còn brei hu mblang praong. Urang Thái bhian glam baoh còn di mbalng praong di palei atau mblang hamu yuak padai blaoh atau labik hu taneh praong mbuan nao mai pataom hu rilo menuac. Amuk Khoàng Thị Duyên, phường Đoàn Kết, ban sit Lai Châu daok brei thau lac:

“ Jalan me-in ka sa brei glam baoh còn tapa gavang vin, urang halei glam tapa hu urang nan lac naih joi saong patuah jamo luac thun. Jalan me-in ka dua: parabha jeng 2 kapul, likei kumei karei atau gam likei gam kumei tui kapul main. Meyah thei chap oh hu baoh còn ye brei hu pandap brei ka urang glam còn, meyah oh hu pandap piah brei ka urang glum còn ye yuak tanye, abih di nyu nan lac dom dam dara jao brei ka gauk siuk me-om, ao, đồng hồ, kaong tangin…piah hadar gauk”

Dom likei dam, kumei dara angui cuk khan ao di bangsa tangin pan talei còn, payeng dom mbang bloh glam tagok. Baoh còn par tagok dom talei ginup sambo mau iek biak mekre meta. Gah glam, gah ndok baoh còn trun trun tagok tagok oh alah, kayua sap klao , sap preu bui sambai, mboh anit ranam gauk jang. Urang payua hatai anit ranam tapa baoh còn, tuk likei dam caik hatai kumei dara halei ye urang brei baoh còn ka gauk, hadei di nan brei ka gauk dom pandap piah hadar gauk saong meng bruk main còn harei xuan rilo likei dam kumei dara hu jeng diuk jeng pasang, dak padang baoh sang trei sir, haniem phul.

Harei ini, harei pataom tung còn daok hu urang angsa Thái Tây Bắc khik ramik. Kadha main nan oh lac peih ngak dalam tuk ngak yang palei, xên mường, tết, bo daok hu peih ngak dalam dom harei roya di bangsa, di taneh ia atau dalam dom mbang pataom ilamu the thao dom bangsa di dom pakat. Nyu yau talei pambuak abih gauk, ba chreih bui ka palei, pabak jang pren khang jum pataom bangsa./.