Pathau mik va song tong abih gauk! Gru pato Lò Văn Thắng di xã Mường Sang, huyện Mộc Châu, tỉnh Sơn La dahlau deih lac Hiệu trưởng sa sang bac phổ thong cơ sở di puk palei, urak ni padeih hưu. Ong oh lac pato bac ka rilo rai anek saih, bo daok lac urang caik rilo tuk vak piah bac megru, roh duah haroh Thái piah pato veik ka mik va, dong tame ka bruk khik ramik song patagok dom ilamu bangsa. Lường Hạnh, urang vak di rayo sap ndom VN daok di bhum Tây Bắc hu kadha vak khan ka Ong.

Gru Lò Văn Thắng ndih tapui song prong tagok dalam sab oh sang hu rilo adei saai pachreih bac song khik ramik ilamu bangsa. Umo 10 thun ong hu ame pato pasram, ong cih siam saong bac gheih haroh Thái, min kayua rai duik kan kandah tuk nan oh tui bac hu, haroh Thái dak harei dak lihik nao. Duh hatai ka bruk ni, gru Thắng nao tal dom urang hu  ilamu saong thau haroh Thái, dom pasak pato pakai dalam tỉnh roh duah  tài liệu. Tal thun 2010, gru pabak veik ilamu song ba giáo trình mai ngak veik ka nyu lagaih song âm vực di urang Thái patih bhum Mộc Châu. Camereip gru pato ka adei saai dalam sang thau bac, thau cih haroh Thái. Mboh hatai takre bac di mik va dalam palei, gru peih tal bac haroh Thái akaok meti di palei Nà Bó 1, xã Mường Sang. Gru Lò Văn Thắng brei thau:

“ Hulin hu mbaok song peih bruk pato haroh Thái, kayua haroh Thái hu meng lavik mai, meng saman Lê haroh Thái hub a tame ngak văn tự di bhum Tây Bắc. Ka 2 jeng meng boh sang takre bac, sap - haroh bangsa drei brei thau, nan ye hulin peih tal bac saoh mboh hu jak jeng

Tal bac haroh  Thái  camereip di gru Thắng hu 32 urang bac, hu umo thun karei di gauk, mik va dalam palei thei khin bac akhar haroh Thái jeng hu pato brei saoh. Dom urang bac di tal bac ni hu jeng gru pato haroh  Thái ka rilo puk palei di xã Mường Sang yau: tal bac  bản Nà Bó 1, Nà Bó 2, bản Vắt, bản Lun...song dom tal  bac haroh Thái ka dom kamuan sit dalam tuk padeih hè. Kuhria tal harei ni, gru Thắng song adei saai cộng sự peih hu labaih 10 tal bac, hu labaih 300 urang bac, dalam nan hu sat al bac hu jiak 70 urang bac kayua Uỷ ban bhap bini huyện Mộc Châu pambuak bruk peih ngak, hadei di tuk bac tamat bloh khoá bac  hu  thi cấp chứng chỉ. Gru Lò Văn Thắng jeng hu caik rilo tuk vak piah duah thau ka adat cambat tanarakun di bangsa drei yau adat likhah caga  di urang Thái Mường Sang, Mộc Châu, xên bản, xên mường, adat likau hajan, cúng mo... Dom tác phẩm văn học praong di bangsa  Thái yau:  Xống chụ xon xao ( Tiễn dặn người yêu), quam tô mương ( Chuyện kể về bản mường), ca dao tục ngữ, panuac pato ngak menuac jeng hu gru duah patom piah pato  veik ka rai hadei. Ong Lường Văn Hoạt, sa urang bac tal bac haraoh Thái camereip brei thau:

Rilo menuac mai bac haroh Thái song gru Lò Văn Thắng, dalam nan hu dahlak. Tuk thau bloh, hulin pato veik ka mik va dalam palei, thun 2013 peih tal bac di palei Nà Bó 1, thun 2014 peih tal bac di palei  Nà Bó 2, thun 2015 peih di palei  bản Vắt, 2016 peih di palei  bản Lun, yaok thun peih 2 tal bac, tal bilan hè peih tal pato haroh Thái ka anek kamuan

Jiak 40 thun buh pren yava ka gah pato megru, gru Lò Văn Thắng tuk halei jeng hu dom gru pato, dom rai anek saih song mik va urang Thái dalam bản, mường anit ranam, iek praong. Padeih hưu bloh, gru Thắng lac sa urang dalam kapul khik ramik ilamu puk palei. Ni lac jalan peih tabiak brei ka gru roh duah, palih ruah dom inem krung ilamu bo ong muk, ong kei caik veik song khik ramik, patagok dom yaom glaong nan ka rai rah harei hadei./.