Hà Giang kham merat patrun kathaot padang ngak palei pala barau

#Xã Đông Hà, huyện Quản Bạ lac sa xã bhum glaong ceik patau di tỉnh Hà Giang, hu 10 bangsa adei saai daok, dalam nan bhapbini Mông meblah tal meteh. Peih akaok tuk xã Đông Hà tame padang ngak palei pala barau biak bair, hu 42 sang kathaot, 272 sang jaik si kathaot, meblah tal jaik meteh dom sang dalam xã. Maong ye, jien mek tame di dom sang bhapbini di xã Đông Hà pambak tame ngak nong saong ngak glai yau nan ye bruk kham merat mek hu chuẩn palei pala barau meda hu maong lac brk praong di sa xã bhum glaong ceik patau Hà Giang.

-Nao tal xã Đông Hà di sa var page bilan laar, min cagar veik haong lingik la ar lac bruk chreih chrai di sa bhum ceik glai. Bhapbini meng dom bản daok pataom tame jan patau, ngak nền piah ngak jalan. Thei jeng mboh chreih chrai tuk danakdak padang ngak palei pala barau hu daong ka urang tabiak truh eik lipa, kan kathaot, ba mai trei sir. Saai Giàng Mí Xay, daok pak palei Thống Nhất, xã Đông Hà brei thau: Jak ba ngak jalan, bhapbini hu mbaok tame biak rilo, ngak jalan hu daong ka bhap bini mbuan lagaih pajeng ba tangei. Drei mboh njauk ngak yau nan, livik livik bhapbini pataom gauk ngak, gaok gauk jeng bui sambai.

-Hadei di 7 thun tame padang ngak palei pala barau, meng thun 2011 tal thun 2017 xã Đông Hà ngak hu salah bloh. Hu yau nan, lac meng hu urang dang akaok dom pakat, dom gah, mban tacei pato pang ngak palei pala barau di xã hu dom jalan nao njauk, cambaih laih dalam tacei pato, njauk saong bruk di sa xã kathaot bhum glaong.

-Hu bruk daong di karja ka phun jien, ilamu raong glang, pala drak saong bruk kham merat di yaok sang bhapbini nan ye dom mô hình ngak mbang, patagok kinh tế di xã Đông Hà dak harei dak hu pambak paraong. Rilo mô hình ngak mbang siam, hu laba njauk ndom tal yau ye: pajaih padai 5 gam ( gam pajaih, gam thời vụ, gam pasang iek, gam caga halak halin, gam yuak), mô hình tangei lai, mô hình brei mesraiy jien ngak mbang hu mek veik. Di dom xã bhum taneran ye dom mô hình nan, lac bình thường, min ngan saong sa xã kathoat bhum glaong ini, lac sa bruk salih barau praong. Ông Nguyễn Hữu Nhiệm, akaok uy mban bhapbini xã Đông Hà brei thau: padang ngak palei pala barau di Đông Hà, kan kandah di abih lac ngak habal salih hu bruk ngak mbang pala drak tui jalan klak, tal urak ini hu jaik abih sang urang bhapbini thau pala padai, pala tangei tui  quy trình kỹ thuật: Bruk kan kandah di abih lac jien padai, mikva bhum paglaong rilo meng lac brei taneh, buh pren piah ngak dom công trình, biak kan ieu rik pataom jien padai, rilo meng lac rik pren tame ngak

-Tal tukvak ini, di Hà Giang bahrau hu labaih 10% dom xã dalam tỉnh mek hu chuẩn palei pala barau. Bruk ngak hu praong abih tuk padang ngak palei pala barau di Hà Giang nan lac salih hu jalan sahneng di bhap bini dom bangsa bhum ceik glaong ka bruk ngak mbang, oh daok pak ini pak dhaih yau dahlau daih, pamaong tal bruk ngak mbang tani tanat, pataom gauk, tapa nan hu sa raidiuk trei sir, haniem phul, siam mekre, khang kajap./.

Thúy Linh