Pathau mikva saong grauk ayut! Palei Cam Vĩnh Hòa, xã Vĩnh Hanh, huyen Châu Thành, tỉnh An Giang hu labaih 210 baoh sang Cam saong labaih 1.000 urang. Dalam dom thun tapa, meng bruk sangka di Đảng saong Karja, mikva kham merat ngak mbang yam tapa kan kandah, patagok raidiuk, daong ngak brei salih birau mbaok meta palei pala. Hanipha urang vak di rayo sap ndem Viet Nam daok di ban raya Ho Chi Minh hu kadha vak brei thau ka dom salih birau di palei Cam ini:

Meng jalan tỉnh lộ 941, tapa tatua Mặc Cần Dưng, nao labaih 500m tal palei Cam Vĩnh Hòa, xã Vĩnh Hanh, huyện Châu Thành, tỉnh An Giang. Nao rah tapa palei, meng mboh bruk salih birau di bhum palei ini. Tapen dua gah jalan betong tame palei, harei ini hu ralo baoh sang praong siam bahrau hu padang tagok. Meda lac sang halei jeng hu tivi, hu radaih patuh, rilo sang daok hu mac li-ua, hu radaih ô tô… Pho akaok Uỷ ban bhap bini xã Vĩnh Hanh Nguyễn Thanh Tú brei thau, raidiuk mikva palei Cam dak harei dak hu salih birau. Taphia bruk sangka pato bruk ngak, duak brei bruk ngak, daong brei mesraiy phun jien yaom laba lap, karja palei daok hu pato pasram ka urang nong ba ilamu ky thuat tame pala drak, raong glang. Meng nan, rilo baoh sang tabiak truh kan kathaot, yam tagok ngak kaya meda meng pandar hu siam phun jien mesre piah pablei salih, raong glang. Yau baoh sang ông Sa Les meng hu mesre phun jien, ong buh tame raong limo. Mbiah tal ini, taphon limo di sang ong hu labaih 22 drei, yaok thun jien mek tame hu jaik 100 trieu dong. Ong Sa Les brei thau: « Xã brei hulun bac bruk raong glang, urang jakar pachreih nong tacei pato jalan pala drak, dahlak ngak tui saong hu yau harei ini, mikva halei khin sua tangin dahlak  pato veik. » 

Tuk bruk ngak mbang patagok ye raidiuk ilamu di mikva Cam jeng patagok tui. Bruk bac da-a di anek bhik dak harei dak hu iek praong. Dom baoh sang hu anek bik tal umo nao bac jeng hu brei anek nao bac, rilo sang daok brei anek nao bac đại học, cao đẳng. Yau sang ông Y Sa daok di palei Vĩnh Hòa, xã Vĩnh Hanh, huyện Châu Thành hu dua urang anek bac gah Y. Ong Y sa lac: “ Urak ini mikva Cam hu salih birau rilo jang dahlau, kham raong anek nao bac đại học, yau bac di Ban Gon, Cần Thơ, Đại học An Giang...rilo adei hu nao bac di negar langiu tuk gilac veik mai ngak bruk duah hu jien tani tanat, caong khin mai ngak bruk daong palei.”

          Anak bruk salih birau di palei drei, ong Hakim Du Số chreih chrai lac: “Dahlau diah khol dahlak kan daman rilo, mikva oh thau raong glang saong pala drak yau nan ye dalam palei rilo sang daok kan kathaot. Meng tuk hu karja palei sangka buh jien tame padang co so ha tang, jalan mbak, ba mbuan lagaih ka mikva nao mai, pajeng pandap. Điện truac hadah, ia hacih hu nao tal yaok baoh sang, balai iek ruak, sang bac, sang ialmu, urang kathaot hu brei harak BHYT. Raidiuk mikva oh daok kan kandah yau dahlau diah tra.”

Urak ini, palei Cam Vĩnh Hòa daok 14 baoh sang kan kathaot min. Daom baoh sang daok veik jeng hu raidiuk meng mbiah ginup tagok, dalam nan labaih meteh dom baoh sang thau kuhria kuhria bruk ngak mbang jeng hu kaya meda. Hu yau nan, meng hu bruk jum pataom, tari tarieng ngak mbang, daong ba gauk patagok kinh tế, patruh eik patrun kathaot, ngak njauk tui dom sarak di Đảng saong Karja. Ong Rozaly, ủy viên Ban đại diện cộng đồng Islam tỉnh An Giang brei thau: “Đảng saong Karja biak sangka tal urang Cam khol dahlak, peih dom tal pato bruk ngak, duah bruk ngak mbang ka anke kamuan urang Cam. Langiu di nan, karja palei tuk halei jeng ba mbuan lagaih ka mikva urang Cam ngak bruk agama di drei”

Raidiuk dak harei dak hu salih birau, mikva urang Cam palei Vĩnh Hòa halan hatain diukrai siam ka dunya, mekre ka agama piah dak padang raidiuk trei sir, haniem phol saong khik ramik ilamu di bangsa./.