Pathau mikva saong taong abih gauk!Bruk ngak ginang hu iek lac sa ilamu daok hu khik ramik meng rai ini tapa rai daih dalam baoh sang, dalam but pajaih urang Dao meriah daok di xã Tả Phìn, huyện Sa Pa, tỉnh Lào Cai. Ginang ngan saong urang Dao meriah lac pandap biak hu yaom glaong saong oh kurang hu. Daa mikva saong taong abih gauk duah thau ka bruk ngak ginang di urang Dao meriah tapa kadha vak di Thanh Thủy, urang vak di rayo sap ndom VN daok di Tây Bắc.

Tui adat cambat yaok baoh sang urang Dao meriah brei hu ginang, pi piah duh ka bruk ilamu dalam dom harei lễ, tết, ndam likhah, ndam metai. Urang Dao meriah ngak ginang meng tangin min biak mekre. Mbaok ginang hu ngak meng klik limo atau klik kabau. Klik hu ba nao pambu pandiak atau caik dalam sang ging meng 10 tal 15 harei bloh ba nao cakak tui khuôn rup ginang. Rup ginang di urang Dao meriah hu ngak meng kayau phun panat, paluh huan gah dalam saong ngak ka nyu gul habar ka rup ginang nyu lipih, hanjul min khang, kajap.  

Klik mbaok ginang hu pagam tame rup ginang tui jalan mek dom talei havay ia limin kak veik dua mbaok ginang, hadei di nan urang mek dom nêm kayau peng kajap tame rup ginang piah dui dom talei havay ia nan pak tame gauk, ngak habar ka klik mbaok ginang catang tagok, tabiak hu sap glaong biar. Dom nêm kayau peng vir taom dar ginang ngak jeng janih biak karei di ginang urang Dao meriah. Ong Lý Phủ Quyện, labik ngak ginang di xã Tả Phìn, huyện Sa Pa, tỉnh Lào Cai brei thau: 

“Kol dahlak njauk nao bac megru piah ngak, ngak njauk yau meng kan, ngak meng talei havay ia, nêm ginang jeng ngak meng tangin abih. Ginang ini ngak tabiak jeng duh ka bruk daoh tamia, harei lễ, harei tết saong mikva paling muk kei jeng pandar ginang”.

Piah ngak jeng ginang siam jeng mai meng ilamu saong plak tangin gheih di urang ngak. Oh lac sang urang Dao halei jeng ngak hu ginang. Bruk ngak ginang brei hu patoa meng rai ini tapa rai daih. Urak ini xưởng ngak ginang di sang ong Lý Phủ Quyện lac sa labik mai tal biak hu angan ngan saong tuai damuai. Saai Trần Văn Tuấn, urang tuai mai meng Hưng Yên lac:

“Kol dahlak jeng mboh urang ngak ginang di labik ini biak gheih tangin. Di bhum taneran, ginang urang pagam tame rup ginang meng paku, min di labik ini urang pagam tagok meng talei saong peng nêm tame saong meda salih âm thanh di ginang meng nêm ye ini lac sa đặc sắc duk saong ginang di bhum taneran”.

Urang ngak ginang langiu dua gah tangin gheih daok brei hu tanye pang siam piah pang saong ramik sap di ginang. Sa baoh ginanag siam tuk taong tagok, urang daok atah jeng mehit sap yava, urang daok jaik oh mboh heng tanye, yau nan meng lac sa baoh ginang siam di urang Dao meriah. Harei ini ginang di urang Dao meriah daok di xã Tả Phìn, Sa Pa oh lac duh ka adat cambat di bhap bini, bo daok lac sa pandap du lịch hadah krah, iek yau sa pandap lưu niệm tuk tuai damuai mai tal bhum glaong Tả Phìn./.