Dalam harei Ramưwan di urang Cam Bàni pak tỉnh Ninh Thuận oh kurang hu har sakaya – sa janih mbang meng kan mai piah iew amuk akei saong payak tuai. Daa mikva saong taong abih gauk gam duah thau ka jalan ngak tabiak saong makna di har sakaya dalam lễ hội Ramưwan, tapa kadha vak hadei ini di Ái Nghiêm:

Har sakaya lac sa pandap mbang biak karei di urang Cam tỉnh  Ninh Thuận. Har hu ngak piah pok tagok dom urang hu iek prong dalam tuk Ramưwan, ndam lakhah…Sakaya hu tame dalam rai diuk di urang Cam yau brei mboh hatai iek prong, panuac pandit di urang Cam ndom lac:

Tapei anung gah ala

          Sakaya gah angaok

Tui adat cambat di urang bangsa Cam, baoh har langiu di bruk ba bui sambai dalam dom rija roya, dalam van payak tuai, daok brei mboh bruk gheih tangin, tari taring di urang kamei Cam jang yau hatung hatian di urang ngak har tal urang mbang.

Piah hu dom baoh har bingi, pahe laya, lamek, mikva bhian palih ruah ratak asal khang, ba nao rao ka nyu hacih, caik ka nyu thu aia, thaok klik.

Jal baoh menuk atau baoh ada tame jaluk, paoh samu tangin tal tuk jeng rabaoh ye buh ratak lo tame, buh hasit saradang saong laya tame. Kadha praong di abih nan lac har sakaya  njauk poh baoh haong saradang haong gauk ka nyu racin. Kayua lac, meyah taong oh racin, saradang meda kandaong veik ngak ka ahar oh bingi. Piah hu dom baoh har sakaya tasak, pahe, hang, tuh dom janih angaok nan tame khuôn meng sứ (bhian lac panyin sứ) ba nao kahôn.

Har sakaya biak pachreih urang mbang kayua nyu pahe laya, yamen saradang, limek di ratak lo meluk hasit hatung hatian di urang ngak har, ngak ka urang mbang nyu mboh biak bingi biak pahe./.