Dalam dom bruk di harei pataom, dom kapul diễn viên, nghệ nhân, vận động viên mai meng 8 tỉnh piah hu mbaok tame harei pataom, hu nao tapa ceik mai tal dom puk palei di dom huyện Tam Đường, Phong Thổ, Tân Uyên, Than Uyên piah klah rabha bui sambai saong parang me-in pamơrơ bhap bini dom bangsa takik daok di puk palei. Di xã Mường So, huyện Phong Thổ - bhum taneh tổ di urang Thái mbong Tây Bắc, anak hatai anit ranam di bhap bini saong dalam labik ilamu bhian randap, jaik haong puk palei di drei, ong Lò Văn Nhoi, nghệ nhân ngak alat ragam mai meng huyện Mai Châu, tỉnh Hòa Bình bui sambai lac:

“Hu mbaok tame harei pataom ini, dahlak uan tabuan lô, mboh hadah mbaok meta lô. Kol dahlak haong dom tỉnh hu mai pak ini piah taom gaok, ndom biai nao mai, bac megru ilamu di bangsa Thái kol dahlak. Tal urak ini, dalam 8 tỉnh ye dahlak hu nao taom gaok abih, hu bac megru dom kadha biak bahrau ngan saong dahlak. Dahlak mboh biak bui, bac hu rilo kadha saong dahlak caong lac dom thun anak tal, karja drei brei peih ngak harei pataom yau thun ini”

Dahlau di tuk mai haong harei pataom, dom diễn viên, nghệ nhân takik thau gauk, min di harei pataom ini, tuk hu dom bruk parang iek ilamu, du lịch; yaih khan, brei thau dom bruk du lịch di palei drei, padang ngak veik dom rija meng kan, tamia xòe, tamia sạp; parang iek khan ao bangsa Thái saong pakacah dom janih thể thao bangsa, urang mboh jaik gauk jang. Yaom lac urang Thái mbong atau Thái jhuk, yaom lac palei daok di dom tỉnh atah yau:  Nghệ An, Thanh Hóa atau dom tỉnh jaik yau Lào Cai, Điện Biên, dalam yaok diễn viên, nghệ nhân jeng mboh hu hatai anit ranam di ayut sahabat, di adei sa-ai piah, bloh tapa nan urang klah rabha dom ilamu dalam bruk khik ramik ilamu bangsa Thái palei drei. Nghệ nhân Quàng Thị Lanh mai meng tỉnh Điện Biên brei thau:

 “Bui sambai lô, mai ini bac hu rilo, ilamu di Hòa Bình, di Yên Bái, di dom tỉnh karei mboh nyu karei jang palei drei. Tapa harei pataom ini, drei hu taom gaok, bac megru saong hu thau ilamu Thái di yaok bhum palei. Biak caong tal harei pataom mbang hadei piah hu bac megru rilo jang. Tapa harei pataom ini, drei hu taom gaok saong hu rilo ayut sahabat meng dom tỉnh karei, oh lac urang Thái jhuk saoh bo daok hu urang Thái mbong tra”

Tui taong yaom di mBan peih ngak harei pataom ilamu bangsa Thái mbang ka I, dom kapul tame harei pataom biak hu trách nhiệm, brei mboh cambaih tapa chất lượng nghệ thuật, tinh thần thượng võ dalam pakacah thể thao. Min kadha mek hu praong di abih nan lac bruk abih hatung hatian, hatai anit ranam gauk di dom nghệ nhân, diễn viên hu daong pateok li-an di bilan brak labik ceik glai Tây Bắc. Ini jeng lac bruk njauk hu khik ramik piah padang talei jum pataom di dom bangsa dalam bruk khik ramik saong patagok yaom glaong ilamu, pabak hu bruk patagok khang kajap di taneh ia.

Bui sambai anak bruk jak jeng di harei pataom, ong Vương Văn Thành, Phó akaok Ủy ban bhap bini tỉnh Lai Châu, akaok mBan peih ngak harei pataom brei thau:

“Harei pataom ilamu bangsa Thái mbang camereip hu peih ngak di tỉnh Lai Châu piah pok meyaom dom ilamu bangsa Thái hu rah tabiak njauk tui caong khin. Dom ilamu di bangsa Thái meng bruk mbang ngui, daok dang, sap ndom akhar vak hu klah rabha, ginum biai tapak di urang labik ini haong urang di dom bhum palei karei. Tui damuai di dunya, urang jeng mboh harei pataom ilamu bangsa Thái hu parang tabiak cambaih laih. Dalam harei pataom, hu pachreih bhap bini hu mbaok tame, jeng yau bhap bini dom bangsa dalam taneh ia sangka khik ramik ilamu di dom bangsa”

Harei pataom ilamu bangsa Thái mbang ka I di Lai Châu  hu tamat bloh dalam jum pataom di dom bangsa Việt Nam. Hadei di harei pataom, dom nghệ nhân, diễn viên, vận động viên mai veik puk palei haong dom bruk ngak yaok harei, min hatai jeng daok hadar miat Lai Châu saong daok cang tal harei pataom mbang ka II di Sơn La thun 2017./.