Oh ka yam takai tame trang trại le le Hồng Thái di ong Mười Thái ye pang hu sap merao di tapon cim. Tuk yam takai tal labik, tuai damuai dak takre jang tuk mboh biak ralo drei le le hu vang pacang vin  taom dhar sang, daok gah likuk mblang hamu ye yaok tapol le le daok luai dalam danao, kavei aia prong laneng lanoi. Pang ong Mười Thái- Po di Trang trại le le Hồng Thái khan, urang dak mboh tatuak drei jang tuk thau tapol le le ini hu caih mebaoh meng 3 drei le le akaok mereip. Ong Mười Thái brei thau: 13 thun dahlau, kamuan di ong nao hamu mek hu 3 drei le le anek ba mai sang.

Tuk nan mong mboh biak takre, ong Mười Thái buh tabiak 180 ribau đồng piah blei 3 drei le le ini ba mai sang raong ma-in. Lavik livik harei, ong saneng lac rilo le le yamen bingi bo dalam glai urak ini oh daok hu ralo, habar drei oh raong nyu piah pablei? Meng hatai saneng ini, ong Mười Thái duah jalan piah ka le le caih mebaoh, pambak prong tapol le le.

Ong brei thau: "Mek 3 drei mai sang raong jeng oh thau tano atau binai. Kareik nyu dalam van sit jeng hu labaih sa thun. Blaoh saneng tal bruk brei ka nyu caih mebaoh, nan ka meng tabiak darak blei halăm njuan mai vang danao, tal bilan 5 nyu meng mebaoh mbang akaok mereip hu 5 baoh, nyu mebaoh 1 thun 6 mbang hu 65 baoh. Nyu mebaoh bloh meng thau lac 2 drei tano, 1 drei binai ”.

Meng tari tareng roh duah, nan ye ong Mười Thái oh lac tok thau duah jalan ngak ka drei le le mebaoh ralo, baoh kram caih hu ralo, bo daok rami ramik hu pandap mbang, labik mbang, labik daok lagaih ka le le.

Urak ini ye ong Mười Thái thau cambaih ka bruk mbang, bruk ndih daok di tapol le le. Ong khan lac: Meyah caik ka le le binai mebaoh blaoh karam eng ye yaok thun tok mebaoh hu sa mbang kayua nyu tavak raong anek. Kayua yau nan ye, ong raong yaok pluh drei menuk binai mebaoh, tuk le le padeih mebaoh, ong mek baoh di nyu brei ka menuk karam. Menuk binai karam 27 harei ye caih tabiak drei le le anek. Meng jalan ngak ini, baoh le le caih tabiak hu ralo, taphia di nan, le le hadei di tuk mek baoh ye 7 harei tal 20 harei hadei nyu mebaoh veik.

Yaok thun, sa drei le le binai ong raong mebaoh meng 5 tal 7 mbang, yaok mbang meng 7 tal 12 baoh. Tuk le le anek raong hu jaik sa bilan, ong cakak meneing bilau sauk sa gah piah ka le le oh par hu blaoh pandar halăm njuan atau tôn pacang vin taom dhar danao, kavei piah palao le le raong, dreh yau raong ada bo oh cang pacang gah angaok. Di takai danao, kavei ong Mười Thái pala hareik, blaoh pandar xô nhựa caik ndih trun, metham pon hareik thu tagok saong lót gah dalam xô ka le le tame mebaoh. Ong Mười Thái brei thau tuk aia njaom lakhul atau mbak le le jeng diuk hu min taphia nan njauk hu labik padang caik aia taba piah ka le le menyum. Le le daok sit ye brei nyu mbang pandap mbang di menuk sit, tuk le le prong pandap mbang di nyu lac padai.

Meng 3 drei le le tuk akaok mereip, urak ini ong Mười Thái hu ngak jeng trang trại le le Hồng Thái hu yaok ribau drei. Dalam 3 thun jaik di ini, yaok thun ong pablei labaih 2.000 drei le le rilo praong jaik 4 bilan ngan haong yaom meng 450 ribau đồng tal 550 ribau đồng sa drei saong pablei yaok rituh drei le le pajaih praong jaik 6 bilan, yaom 600 ribau đồng sa drei mek tame hu labaih 1 tỷ đồng. Darak pasar blei le le di ong Mười Thái lac dom tỉnh, bal di bhum taneran krong CL min khang di abih lac bal raya Hồ Chí Minh.

Tuk ong Mười Thái ngak hu saong kaya meda tagok meng bruk raong le le ye hu ralo urang nong dalam palei saong dom tỉnh, bal dalam bhum taneran krong CL duah mai rivang iek, bac megru ilamu, hadei di nan blei drei pajaih nao raong. Ong Mười Thái tuk halei jeng abih hatai pato tacei ilamu raong glang. Kayua drei pajaih hu yaom glaong nan ye urang nong palei caong khin raong min OH hu ginup jien blei, ye ong bhian daong tui jalan pablei le le pajaih dahlau min jien brei ka mikva tavak, bayar hadei.

Ong Trần Văn Hoàng- Akaok ấp Bình Lễ, xã Vĩnh Phú Tây brei thau: “bruk raong le le di Mười Thái ấp Bình Lễ lac bruk ngak mbang akaok meti dalam xã Vĩnh Phú Tây. Nyu ba mai kein laba biak glaong dut haong dom mô hình karei. Bruk raong le le ini meyah mikva halei daok kurang jien ye Mười Thái pablei tavak tal yuak padai bayar veik jien blei pajaih ka ong. Daok ilamu raong glang ye Mười Thái pato abih ka adei sa-ai dalam ấp jeng yau langiu tỉnh, meyah thei mai rivang iek bac megru ye ong Mười Thái taduan raok abih”.

Bruk raong le le di ong Mười Thái urak ini hu urang nong dalam ấp Bình Lễ, xã Vĩnh Phú Tây pambak prong tabiak ngan haong jaik 30 baoh sang raong. Oh lac abih hatai daong mikva raong hu jak jeng, ong Mười Thái daok taduan pablei le le  ka mikva dalam palei./.

Jasi lang tapa sap Cam