Bruk ini, lac sa dalam dom bruk pachot, brei mboh cambaih abih lac kol nyu brei ka urang khin mesraiy jien eng drei ngak harak gar mesraiy jien online, hadei di nan, kol nyu ieu urang khin mesraiy jien payua hasit jien (meng 500 rabau đồng tal 5 triệu đồng) piah ngak sahui nao pasang iek, brei mesraiy … Abih di nyu lac, kol nan daok mek angan ini daih, piah pachot saong meblah mek jien, yau ye: Mek angan dom gilang pariak atau Cty jien padai hu biak di Việt Nam, padang website, ứng dụng, yaih khan tapa dom mạng xã hội piah ieu da-a brei mesraiy jien haong yaom laba biak lap. Gam haong nan, kol pachot ini daok hu padang tabiak yaok rabau tài khoản facebook haong dom khau tin ja, hu mbaok tame dom kapul, nyaom, diễn đàn, vak kadha yaih khan brei mesraiy yaom laba lap (lac 1%/ sa bilan), harak gar biak mbuan, oh cang taom gaok tapak, daok tavak sraiy jeng daok hu brei mesraiy, oh cang padang pandap, oh cang pasang iek, tok hu Chứng minh nhân dân atau Căn cước công dân saong hu tài khoản gilang pariak, thẻ ATM lac mesraiy hu jien ... Tuk hu menuac mai mesraiy, kol nyu ieu urang mesraiy brei thau angan, laik phone, thaot CMND/CCCD, thaot mbaok… piah ngak harak brei mesraiy.

Hadei di tuk pachot urang khin mesraiy payua jien sahui piah kol nyu nao pasang iek, brei mesraiy, kol nyu ba tabiak rilo makna lac pok jien mesraiy oh peih tabiak hu kayua harak gar mesraiy oh ka njauk. Blaoh kol nyu ieu urang khin mesraiy buh jien piah ngak veik harak gar, haong panuac sanya lac dom jien nan hu bayar veik hadei di tuk pok jien mesraiy hu peih brei. Min tuk urang mesraiy payua jien tame tài khoản bo kol nyu ba tabiak, kol nyu meblah mek jien nan saong cakak klaoh jalan phone, oh daok ieu hu. Meng jalan ngak ini, urang khin mesraiy jien njauk lahik jien, saong taong abih thông tin cá nhân, njauk kol nan nyu pandar piah ngak dom bruk karei suan adat hukum.

Anak bruk pachot, meblah ini, hu rilo srau kadau di mangaok mạng, Mintri Công an hu panuac kakei lac: Rahra njauk paglaong hatai sangka anak dom bruk pachot, meblah mek jien ndo, drap ar. Tuk caong khin mesraiy jien, brei nao tapak tal dom labik brei mesraiy, dhar gilang pariak piah hu tacei pato jalan ngak harak gar mesraiy. Oh pabak thông tin cá nhân (CMND/CCCD, labik daok, thaot mbaok meta…) tuk oh ka thau cambaih website, ứng dụng saong urang tacei jalan. Oh brei thau tài khoản gilang pariak, mã OTP ka kol nyu. Oh payua jien tame tài khoản cá nhân bo kol nan payua mai. Samar khan brei Công an labik jaik di abih thau, tuk mboh bruk mek angan, pachot, meblah mek jien ndo, drap ar./.