Umo labaih 40 thun, sa-ai Nguyễn Văn Sơn Hải, urang bangsa Châu Ro, daok pak palei Láng Sim, xã Phước Bửu, huyện Xuyên Mộc, tỉnh Bà Rịa –Vũng Tàu, urang hu labaih 40 mbang brei darah daong manuac. Yaom lac oh daok ranaih min sa-ai saneng lac jeng daok brei darah drei ka dom urang caong khin tuk halei jeng hu. Sa-ai nan lac sa dalam dom urang abih hatai, nòng cốt di gilang darah diuk di tỉnh.

    Ndih tapui thun 1973, yaom lac umo labaih 40 thun, oh daok pren yava khang kadang yau tuk daok dam, min kuhria tal harei ini, sa-ai oh klaak sa mbang brei darah pahla halei. Sa-ai Hải khan lac: “dahlak mong mboh biak ralo dom urang oh patuah jamo, rambah rambup jang dahlak. Nao tame sang iek ruak bo dalam kadhung oh hu jien padai. Hu daong brei tanjaoh darah ka dom urang ruak kathaot nan jeng lac haniem phol di dahlak”.

     Tapa duah thau, mboh rai diuk di sa-ai Hải jeng biak kan kandah. Baoh sang daok dalam angan kathaot. Yaok harei, sa-ai nduac radaih kuan piah duah jien raong dom anek mbang bac. Glaih glar, rambah rambup yau nan nao, min tuk mahit hu danak dak brei darah pahla, sa-ai halar hatian tut angan nao brei darah. “Jien duah hu di dahlak meng sruh radaih ini. Harei hu ralo, harei hu takik, jeng duh hatai ralo. Tok caong khin hu pren yava piah nao ngak duah jien raong anek mbang bac ye dahlak bui paje”- sa-ai Hải lac yau nan.

      Oh lac abih hatai hu mbaok tame, sa-ai Hải daok lac sa dalam dom “urang pathau khan” biak naih, jak ba ayut sahabat, gauk gar saong biak ralo urang tuai nao radaih kuan di sa-ai hu mbaok tame bruk brei darah pahla. “Akaok mereip manuac urang lac dahlak mahruai, gila, mbang oh ginup mek pren halei piah brei darah. Yau nan min tuk pang dahlak ndom lac yaok mbang brei darah hu mboh pren yava drei siam jang nan ye hu ralo urang jia tui saong hu mbaok tame”- sa-ai Hải klao khan yau nan.

     “Yaok sa tanjaoh darah brei nao, sa rai diuk daok veik”, asal siam di danak dak hu dui pachreih sa-ai Hải hu mbaok tame piah jeng sa dalam dom urang kak kajap haong bruk brei darah pahla. Brei nao piah taduan mek veik, dom “triết lý” nan yau mboh angaok harak, báo min daok hu sa-ai nduac radaih kuan kathaot Nguyễn Văn Sơn Hải yaok harei khik ramik saong pabak tame, biak njauk caik ka khaol drei bac megru./.