Hadei di 3 thun peih bruk padang ngak palei pala barau, 5 tỉnh di Tây Nguyên hu 11 xã mek hu ginup 19 tanut. Gam saong bruk padang ngak hu dom xã điểm palei pala barau, dom tỉnh jeng bac megru hu ralo ilamu, dalam nan, ilamu ieu pataom bhap bini rik pren tame lac bruk praong dang akaok. Urang vak di rayo sap ndom VN daok di Tây Nguyên hu kadha vak brei thau dom ilamu ini tapa bruk ngak di dom xã dalam tỉnh Đắc Lắc.

Dalam bruk padang ngak palei pala barau, bruk peih praong, pasiam jalan mbak palei pala hu taong yaom lac sa dalam dom bruk kan ngak kayua brei hu ralo jien padai, bruk giải phóng mặt bằng bhian gaok kan kandah. Min, di xã Ea Ô, huyện Ea Kar, tỉnh Đắc Lắc, jalan mbak palei pala hu padang ngak biak samar kuhria meng tuk peih bruk padang ngak palei pala barau, ngan saong 2 baoh tatua khang kajap hu padang ngak, 90 km jalan nao mai meng palei ini tapa palei deih hu pasiam, hu peih praong meng 7 tal 9 mét, jaik 20 km jalan praong saong jalan nao mai di dom xã hu tuh katak atau tuh bê tông, yaom jien padang ngak jaik 70 tỷ đồng. Piah hu dom jalan ngak salih barau mbaok meta palei pala ini, labaih 500 baoh sang bhap bini dalam xã halan hatian yah daning, paga, tak klaak phun kayau, brei tal 160 ribau mét vuông taneh; yaok ribau baoh sang karei bui hatian rik jien padai, harei ngak bruk. Tui ong Nguyễn Minh Chuyền, akaok UB bhap bini xã Ea Ô, ngan saong bruk daok chreih chrai di taong abih bhap bini, tal thun 2015 meda ngak hu salah bruk padang ngak palei pala barau. Ong Nguyễn Minh Chuyền brei thau, piah khik ka bruk chreih chrai ini tuk halei jeng hu tagok glaong, ilamu di xã nan lac brei samar jak ba saong pok meyaom dom kreih ginu hadah hadai:

“Brei samar pok meyaom pren yava di mikva. Pagap yau tuk padang ngak tanut ka 2, kol dahlak nao jak ba yaok baoh sang. Duk cambaih laih taneh brei hadom, jalan hadom, phun hadom bloh hu sa harak ghi nhận, kuhria tabiak yaom jien dom janih nan. Tuk giải phóng mặt bằng bloh kol dahlak ba tagok angaok rayo papar sap, khan lac baoh sang ong A brei taneh du ini, phun du ini. Tal tuk salah bloh tukvak nan ye hu sơ kết, dom kreh ginu ngak siam bruk nan hu pok meyaom chip”.

Meng gheih jak ba bhap bini, di dom xã Quảng Điền, huyện K rông Ana), Ea Tul (huyện Chư M’Gar), Ea Nuol (huyện Buôn Đôn) yaok rituh baoh sang halan hatian panduan nao, brei taneh, rik daong jien, rik pren yava piah padang ngak dom công trình phúc lợi saong jalan mbak palei pala. Tapa nan, jhul samar bruk padang ngak palei pala barau di puk palei. Ong Nguyễn Lộc, daok di palei 1, xã Quảng Điền, huyện K rông Ana, urang hu brei jaik 600 m² taneh, saong hu jak ba yaok pluh baoh sang karei dalam palei kham merat rik daong padang ngak palei pala barau, brei thau:

“Diuk anek sang dahlak thei jeng njauk hatai. Kayua ini lac quyền lợi di urang nông. Ieu lac rik daong min biak di nyu lac hu mbang tui kein laba. Dahlau deih hajan ye gluh baok, pandiak ye thur mur. Min tal tuk ngak jalan tuh katak ye nao mai hacih saat, yaom taneh di drei jeng tagok tui. Pagap yau dahlau daih lac 1 triệu sa mét ye urak ini tagok 12, 13 triệu”.

Bruk njauk pok meyaom di dom xã hu ralo bhap bini bangsa takik nan lac, tuk bahrau peih bruk padang ngak palei pala barau ye gaok biak rilo kan kandah, kayua urang jakar saong bhap bini oh ka thau cambaih kein laba di nyu, min tal urak ini palei pala barau hu peih ngak siam lagaih. Thượng tá Nguyễn Minh Mạnh, chủ nhiệm chính trị lữ đoàn đặc công 198, gah hu mbaok tame daong ka bhap bini di 3 xã dalam tỉnh Đắc Lắc padang ngak palei pala barau brei thau, piah ngak ka mikva thau ka palei pala barau, oh lac ndom yau habar ka mikva pang mboh lagaih, bo daok brei nao jaik mikva meng abih hatung hatian:

“Kol dahlak nao mai, daong ka mikva dalam palei, padang ngak jalan mbak, rok kraong ribaong, nội đồng, thủy lợi… nan ye hatai anit ranam biak jaik gauk di urang lin kol dahlak saong mikva, yau di sang drei. Bruk ngak nan piah pamaong tal bruk padang ngak palei pala barau, piah  ngak salah dom tanut nan saong tuk hu bruk halei ba tabiak kol dahlak jeng hu mikva dalam palei abih hatai pachreih tui”.

Tapa 3 thun padang ngak palei pala barau, dom baoh sang bhap bini di Đắc lắc hu brei taneh, rik daong jien, harei ngak bruk, kuhria tabiak yaom jien abih tih labaih 750 tỷ đồng, rik daong jhul samar bruk padang ngak danak dak. Tal urak ini, hu 28/152 xã dalam tỉnh mek hu meng 10 tal 15 tanut. Kuhria rah tapa, tỉnh ngak hu bloh jaik 36% dom tanut. Tỉnh kham merat dalam thun ini hu 2 xã akaok meti mek hu ginup 19 tanut; tal thun 2015, hu 30 xã tra mek hu tanut chuẩn. Langiu bruk buh jien tame ngak njauk, lagaih, tacei pato chip, dom ilamu dalam bruk ieu pataom hu pren yava bhap bini dalam 3 thun tapa nan lac bruk praong daong ka puk palei ngak hu jayah bruk ngak ini./.