Pathau mik va urang nong: Dalam bilan pandiak bhang, rilo labik, urang nong sahaneng tabiak dom jalan ngak piah khik ia pala drak. Kadha “ Urang ngak hamu cong thau” harei ni, khol hulin hu kadha vak khan ka bruk khik ia bilan pandiak di mik va urang nong  xã Phước Hải, huyện Ninh Phước, tỉnh Ninh Thuận. 

Piah dong ka labaih 55 ha padai kurang ia labik jhung kraong di palei Thành Tín, xã Phước Hải, huyện Ninh Phước, rilo urang nong mek mbao cuah nilon piah pacang ia di ribaong Ốc Rọ, oh caik ka ia nduac tabiak tasik, khik ia pruh dong ka phun padai. Nan ye, rilo mblang hamu hu ia tame hadei di labaih 10 harei kurang ia pruh. Ong Châu Tím lac “ urang nong ba mbao mai dak pacang ribaong Ốc Rọ, mek ia tagok piah pruh ka phun padai. Meng nan dalam bilan đông xuân thun ni meng khik hu binek ni, ia meng akaok vụ tal urak ni hu tani tanat. Piah hu ia pala drak, mik va palei Tuấn Tú, xã An Hải, huyện Ninh Phước hu rilo jalan pacang pandiak, dalam nan, jalan ngak di anak meta lac pok paglaong binek Tuấn Tú piah khik ia song ba ia tal bhum pala drak. Jalan ngak ni daok ba mai kein lagaih. Mbaok binek hu pok glaong labaih 50 cm meng bê tông khang kajap, mek mbao cuah pacang piah ngak ka ia tagok glaong ba tame pruh ka 100 ha taneh ngak nong labik ni

Daok di bhum pandiak bhang xã Mỹ Sơn, huyện Ninh Sơn, saai  Đào Văn Tuấn hu buh tabiak 70 triệu đồng padang ngak sa danao tapa chraoh  Hòn Dồ khik ia, caik 300 mét nding ba ia tame hamu pruh ka phun pala. Saai parabha ia pruh ka dom boh sang dok jiak tapen. Anak bruk pandiak bhang dui atah, jalan ngak tạm thời ni hu dong ka saai song bhap bini daok di labik jhung chraoh hu ia pruh ka labaih 20 ha taneh pala drak. Ong Phạm Văn Hường, Giám đốc Công ty Công trình Thủy lợi tỉnh Ninh Thuận tong yaom lac “ Bruk mik va ngak dom danao tạm di angaok krong, chraoh lac sa bruk ngak njauk iek praong song hulin sahaneng lac biak siam lagaih piah khik ia, piah mek ia nan pruh ka phun pala. Jalan ngak ni biak siam biak lagaih dalam tuk pandiak bhang yau urak ni”.

 Lac bhum palei pandiak bhang di abih dalam taneh ia, bruk khik piah, pandar siam halau ia lac jalan ngak suai lavik piah ka Ninh Thuận pacang cakak pandiak bhang./.