Asar rabung măng tây hijao hu pabam dalam kadung nilon, dalam 3 bilan bloh a tabiak mblang hamu pala, phun ini atah di phun diah 30cm. Janih phun ini  lagaih saong taneh laman, xốp, mbuan tathuak ia labik jaik kraong, craoh. Dahlau di tuk pala, mikva njauk buh khak limo kubao, khak hữu cơ vi sinh, khak lân tui tacei pato. 

Mikva  brei palih ruah taneh pachoh ralo, độ pH meng 6 tal 7, taneh pala kapal meng 40 tal 50cm. Hadei di nan, mikva ngak taneh, pok  ro, pambu pandiak 30 harei dahlau si pala. Lubang pala dalam 50 cm. Plih ruah phun anek glaong  meng 25 tal 30cm, pala meng 18.000 tal 27.000 phun sa hecta. 

Bilan bhang thu, mikva brei pruh ia tui jalan patak pataom, khik tathak taneh meng 60 tal 70%. Pala hu 15 harei, mikva brei buh khak NPK 150 kilo ka sa hecta, buh veik yau nan hadei 15 harei. Brei tui iek jit ruak di phun mang tay, brei pruh jru, ngak hareik, buh khak ka lagaih. Hadei meng 4 tal 5 bilan, măng tây kaoh pablei hu.

Sa-ai Trần Cảnh daok di Plaei Patoh Tuấn Tú, xã An Hải, huyện Ninh Phước, tỉnh Ninh Thuận, buh prein yawa jien padai tame kuac roh bingun ia pruh ka phun mang tay. Urak ini, măng tây kaoh pablei, yaok harei duah hu meng 200 tal 300 ribau đồng, labaih ka sang mbang cai.

Daok sa-ai Nguyễn Văn Thanh daok di phường Bình Tân brei thau, sang sa-ai pala 1000 met vuông phun măng tây hijao dalam bein. Kuhria abih tih jien buh tame ngak jaik 22 triệu meteh. Tuk phun tabiak akaok rabung meda, yaok harei kaoh hu 6kg, kaoh gam dalam 4 bilan hu 720 kilo. Yaom pablei 50 ribau đồng sa kilo, jien mek tame hu 36 triệu đồng, laba jaik 14 triệu đồng dalm 4 bilan, yaok bilan mek tame hu 3 triệu meteh./.