Pathau mikva saong taong abih gauk. Kadha “Urang ngak hamu caong thau” Harei ini likau khan brei ka mikva saong taong aboh gauk thau jalan ngak mbang di sa-ai Phú Minh Tâm, palei Phước Lập, xã Phước Nam, huyện Thuận Nam, tỉnh Ninh Thuận. Ini lac jalan ngak mbang ba mai ralo kein laba. Daa mikva saong taong abih gauk tui pang.

Piah cakrok patagok kinh tế sang, sa-ai Tâm raong tapon pabe, limo angaok takai ceik, brei mbang dom janih pandap mbang hu di ala halui phun glai. Thun 1999, sa-ai Tâm duah thau đặc tính di anek pabe di dom baoh sang mikva dalam palei hu raong pabe piah thau ka jalan raong pabe, bloh sa-ai buh jien tabiak raong 19 drei. Sa-ai buh phun jien tabiak blei taneh di takai ceik piah cakrok patagok tapon pabe saong raong limo. Tal urak ini, sa-ai hu 4 trại pabe labaih 700 drei, gam haong 2 trại limo jaik 100 drei raong mek rilo.

Jalan raong pabe, limo ala halui glai di sa-ai Tâm hu rilo pandap mbang piah tapon pabe, limo tuk halei jeng khang kadang, prong samar. Yaok thun sa-ai pablei pabe hu meng 3 tal 4 mbang, yaok mbang meng 40 tal 60 drei pabe rilo, yaok dreitrak labaih 20 kg. Meng thun 2010 tal ini, yaok thun sa-ai duah laba hu labaih 200 triệu đồng. Sang sa-ai daok hu pala 5 ha đào, 20 ha phun nem dalam glai praong jaik 60 ha piah ngak pandap mbang tani tanat, suai lavik ka tapon pabe, limo. Meda ndom lac, sa-ai Phú Minh Tâm hu sa jalan ngak mbang kinh tế praong jaik 60 ha taneh glai, 6 van ro hu padang ngak siam mekre, hacih sa-at. Sa-ai Phú Minh Tâm brei thau: tuk halei sa-ai jeng duah bac megru dom ilamu raong pabe, limo habar ka nyu siam, lagaih saong ba dom ilamu bahrau tame bruk raong glang, pala drak. Abih di nyu nan lac caik hatai tal bruk pacang caga jit ruak ka tapul limo, pabe./.