Tui jalan ngak di di Mentri Quốc phòng ka bruk rik daong pren padang ngak palei pala bahrau, ralo jabat bol lin daok di Tây Nguyên hu dom bruk ngak biak siam. Pak xã biên giới Sa Loong, huyện Ngọc Hồi, tỉnh Kon Tum, bahrau ini, mikva urang Xơ Đăng biak bui sambai tuk hu bol lin Công ty 732, Binh đoàn 15 daong ngak jalan meng labik daok tabiak labik ngak mbang pala drak. Jalan hu peih tabiak ka mikva  patagok bruk ngak mbang kinh tế.

      Page mesup di harei puac bilan 4, labaih 300 urang di dom palei Giang Lố 1, Giang Lố 2 saong Đăk Mốt, xã Sa Loong, huyện Ngọc Hồi, tỉnh Kon Tum hu ba tui jaleing,  xà beng… piah ba gauk ngak jalan nao tal labik ngak mbang pala drak di mikva. Ndom lac jalan, min biak di nyu lac jalan mòn kayua mikva peih tabiak piah nao hamu nao apuh prong 1.500ha. Taha akaok palei  A Sem, palei Giang Lố 2 brei thau, dom pluh thun ini mai mikva njauk nao takai angaok jalan haluk, akaok bei plom, asal tangeiy, asal padai ngak tabiak njauk gui angaok ka-ing nao jaik 5km, mboh biak glaih glar. Urak ini hu bol lin Binh đoàn 15 daong ngak jalan bê tông, taha akaok palei biak drur druai: Dahlau diah, jalan ini mikva nao mai biak kan kandah. Công ty 732 mboh mikva rambah ralo, nao hu urang labuh, urang njauk rambuis jeng hu. Urak ini, Công ty sangka tal bhap bani, ba brei vật liệu piah ka mikva padang ngak jalan ini, mikva mboh biak bui sambai, biak thau dhal phol. 

       Piah daong ka mikva xã Sa Loong ngak jalan bê tông, Công ty 732 hu  caga cuah, patau, xi măng, piah ngak jalan bê tông prong jaik 1m, atah jaik 3km. Nao gam haong mikva, labaih 50 urang jakar, bol lin, urang ngak di Công ty, meng Giám đốc tak urang dang akaok dom đội sản xuất jeng hu mbaok tame ngak jalan gam haong mikva meng page mesup. Urang jah hareik, urang caoh haluk, urang srau bê tông, urang katung talei cước ka nyu tapak jalan… yaok urang sa bruk. Bilan thu Tây Nguyên pandiak bhang khang, aia hauk tabiak tathah abih ao min taong abih bol lin gam haong bhap bani, thei thei jeng abih hatai, kham merat ngak ka nyu blaoh jalan dalam sa harei. Tuk aia harei tame ceik jeng lac tuk jalan bê tông hu tuh blaoh mẻ bê tông puac abih, abih gauk thei jeng bui sambai. Trung úy Hoàng Thanh Bình, urang dang akaok đội sản xuất ka 10, Công ty 732, Binh đoàn 15, lac: “Dahlak jeng yau bhap bani puk pelei biak bui sambai, chreih chai hu bruk sangka di Đảng ủy, Ban giám đốc Công ty brei ka đơn vị ngak jalan ini. Tapa nan, pasiam hu dom kan kandah dalam bilan hajan, piah ka mikva nao ngak hamu ngak puh ka nyu mbuan lagaih.

       Ngan haong mikva xã Sa Loong, jalan bê tông yaom lac oh ka prong, oh ka laneng lanoi yau dom jalan huyện lộ, tỉnh lộ min  yau nan jeng ginup piah peih tabiak dom cơ hội bahrau ka mikva. Kaya nong urak ini mbuan laghaih pajeng nao sang, pandap pada ngak nong ba tagok hamu apuh jeng mbuan laghaih jang. Sa-ai A Huê, urang daok pak palei Giang Lố 1, xã Sa Loong, huyện Ngọc Hồi, tỉnh Kon Tum, lac: Dahlau diah nao mai kan ralo, pala hu akaok bei plom, asal tangeiy, asal padai min oh pajeng tabiak hu. Urak ini Công ty 732 ngak jalan blaoh, mikva mboh biak bui sambai, mikva njauk meda kham merat ngak mbang piah patagok kinh tế jang.

      Trung tá Trịnh Hà Tâm, Akaok Công ty 732, brei thau, tình quân dân di bol lin Binh đoàn 15 saong bhap bani angaok bhum tapen negar Ngọc Hồi hu pambuak pagam luac pluh thun ini mai. Dom thun jaik di ini, yaom lac kinh tế kan kandah, yaom katak cao su trun biar, yaom pablei tabiak biar jang yaom darak pasa, min dom urang jakar, bol lin dom jabat di Công ty tuk halei jeng jak ba piah daong ba mikva di dom puk palei meng dom bruk ngak hu mboh di anek meta, yau katung  điện, ngak jalan. Urak ini, hu  jaik 60% dalam 1.200 công nhân cao su di jabat nan lac urang bangsa takik dalam puk palei, hu rai diuk grap tanat ngan haong jien bilan labaih 5triệu đồng sa urang sa bilan. Trung tá Trịnh Hà Tâm, lac: “Jabat Quân đội  pak ini mboh mikva kan kandah ralo oh daok bingi, dom thun tapa jabat biak saneng kuhria. Kayua nan ye, jabat hu jak ba taong abih urang jakar, urang lin, urang ngak rik daong piah blei cuah patau, xi măng saong bhap bani pachreih tui, klaak pren piah ngak, piah ka bilan hajan bhap bani pala hu củ sắn củ mì ba mai sang pablei yaom glaong, oh ba tabiak hu ye urang blei nyu kateik yaom, ngak ka mikva kathaot jeng daok kathaot miat.

      Gam mbang, gam ndih, gam ngak haong bhap bani nan ye bol lin Công ty 732 hu mikva dalam bhum tapen negar Sa Loong biak anit ranam. Hu palei mikva ba brei caik angan nan lac palei A Tâm, jalan ngak salah blaoh hu mikva caik brei angan lac jalan A Tâm. Nan lac mikva caik brei angan palei, angan jalan tui angan je di urang dang akaok Công ty quân đội 732, urang dang tabiak peih ngak dom công trình daong ka bhap bani. Dom công trình, dom jalan ini ndung bak hatung hatai di bol lin bhap bani, daong ka mikva angaok bhum tapen negar Ngọc Hồi khang kajap jang dalam bruk ngak mbang patagok kinh tế./.