Ruak sởi jeng daok rah tabiak dalam kan kandah saong pambak samar, abih di nyu nan lac di ban raya HCM, HN. Tukvak ini, dom bác sĩ hu ba tabiak panuac kakei siam di abih nan lac kol drei brei khik caga saong iek glang rup drei eng. Abih di nyu nan lac uranaih sit.

Dahlau di tuk tamuh ruak sởi dom harei urang njauk ruak bhian huac ngin, mboh rup pandiak, bahar, sraiy ia dung, meta meriah, patuk, glaih glar, oh khin mbang atau khin taluk ta-aok.

Dom jalan caga: Sang daok brei laneng lanoi; dalam tuk hu jit sởi, oh brei uranaih nao tal labik hu jit, oh brei uranaih nao jaik uranaih ruak sởi; Caik hatai sangka: mbang menyum brei khik caga pren yava ka uranaih, abih di nyu nan lac tukvak jhung thun tapa bilan akaok thun.

Dalam tuk jit sởi daok tamuh tabiak, langiu bruk klauk vac-xin ginup, dom urang amaik brei thau dom jalan ngak hadei ini piah iek glang uranaih hu siam jang:

1. Khik hacih sa-at rup pabhap: Vi khuẩn hu mbaok grauk labik daok di kol drei, kayua yau nan ye kol drei brei pacang cakak ruak ka uranaih yaok harei. Brei ka uranaih cuk khẩu trang tuk tabiak jalan. Khik hacih sa-at labik daok saong pandap me-in vir taom dar uranaih. Tuk langik tasik oh lagaih atau tuk salih bilan brei caik hatai sangka iek glang ka uranaih klung pabah gam gam saong klung pabah meng ia sara. Taphia di nan, dom urang amaik brei caik hatai tuk urang praong barau nao gah langiu mai ye brei palah khan ao, menei hacih saat bloh meng me-in sambai saong uranaih, patakik bruk mbuan njom mbak meng gah langiu tame.

2. Brei ka uranaih nduac me-in di labik siam mekre: nduac me-in yaok harei hu daong ka uranaih pataom hu saong patagok hu dom kadha pabak ka bruk miễn dịch. Tuk nduac me-in dom tế bào miễn dịch nyu nao mai samar jang, bruk pacang caga ruak di dom tế bào miễn dịch saong vi trùng jeng tagok. Tuk hu me-in sambai, uranaih hu thư giãn, amaik ame jeng mboh uranaih nyu sambai jang, nan lac kadha praong daong ka hệ miễn dịch di uranaih khang kajap yaok harei. Langiu di nan, kol drei brei caik hatai tal dom labik vir taom dar labik uranaih nduac me-in, oh brei uranaih me-in di labik daok hu jit ruak.

3. Daong ka uranaih ndih bingu: Tuk uranaih ndih bingi nan lac daong ka glo akaok jeng yau hệ miễn dịch hu “nạp năng lượng”. Tuk medeih ndih uranaih mboh bui sambai saong mbang menyum ralo jang. Amaik ame brei pasram ka uranaih hu randap ndih saong medeih ndih gam saong baoh sang. Patakik brei ka uranaih me-in biak ralo tuk melam kayua tuk ndih uranaih bhian mepei saong katuak drei. Khik ka duk ndih di uranaih laneng lanoi, hacih saat.

4. Capat ka uranaih jeng lac daong ka uranaih patagok miễn dịch: langiu thư giãn, mát xa daok hu daong salih barau hệ tuần hoàn, daong ka drah dalam rup nduac nao mai hu siam jang piah klak dom độc tố oh siam, daong ka hệ miễn dịch khik kajap tani tanat.

5. Palih ruah pandap mbang patagok hệ miễn dịch: hu biak ralo pandap mbang ralo sinh tố: dom janih baoh kayau yau: cam, pa-aok, lê, lahong… saong njam patam baoh karaoh yau (cà rốt, ploi, súp lơ, trong ndaiy, dom janih ratak…) ngak saong ralo, ikan saong baoh menuk, baoh ada hu pabak dom vitamin A, C, D, selen, kẽm…. daong ka hệ miễn dịch, patagok pren đề kháng ka uranaih. Brei ka uranaih menyum ia tasau hu pabak dom janih yau (Vitamin D, A, C, selen) piah daong patagok hệ miễn dịch ka uranaih hu siam jang./.