Tui nghệ nhân Đinh thị Thêu daok di huyện Kim Bôi, tỉnh Hòa Bình ye:

Băng: Bruk dam dara oh takre lagu daoh bhap bini nan oh njauk tuh ka gah halei, ka sa nan kayua dom amuk pato oh ka tal labik, anek taco nyu njauk lagu bahrau njom tame. Hip hop bahrau saong chat tamia ini deih. Anek bhik oh ka thau cambaih halau gha di drei, dua tra nyu oh ka thau hu yaom glaong di ragu daoh bhap bini Mường, nan ye oh njauk tuh ka gah halei, urak ini brei pambuak bruk, anek taco njauk kham merat, dom ong dom amuk brei ngak yau habar piah anek kamuan nyu thau hu yaom glaong, makna di ragu daoh bhap bini Mường, halau gha di drei.

Min ngak yau habar piah ka dam dara hu bac, hu daoh lagu daoh bhap bini palei drei tuk oh hu labik pato. Jalan pato pakai lagu daoh bhap bini di  nghệ nhân Đinh thị Thêu biak njauk bac megru:

Băng: Amuk bhian ru anek meng sap Mường, amuk hu taco nao bac mai nyu lac amuk lơi amuk juai ndom sap Mường nyu oh takre pang, min amuk daoh ru miat meng sap Mường ye urak ini nyu lac muk lơi amuk ru taco meng sap Mường nao. Tapa nan brei mboh livik livik harei taco nyu njom tame.

  Thau hu, iek praong ilamu di bangsa, sa-ai Đinh Kiều Dung jeng lac sa dalam dom menuac abih hatai ka bruk khik ramik saong patagok ragu daoh bhap bini Mường. Oh lac dang tabiak peih tal pato ragu daoh bhap bini brei saoh ka dom uranaih meng thun 2004 tal ini, sa-ai daok pabak hatai anit ragu daoh bhap bini ka pasang likei, ka anek, kamuan di drei. Tui sa-ai, piah brei anek kamuan nyu thau saong anit ragu daoh bhap bini, dahlau di abih brei thau ndom sap Mường.

Băng: Tuk biai gauk dalam sang ye drei ndom sap Mường. Kumei metau lac urang Yuan min taco di dahalk ye dahlak pato nyu ndom  Mường, nan ye urak ini nyu ndom biai haong ong amuk meng sap Mường, ndom biai haong amaik ame meng sap Yuan, nyu nao bac nyu ndom sap Yuan, nyu ndom cambaih, hu amuk pato biai nan ye nyu biai biak cambaih.

Sa-ai Đinh Kiều Dung hadar veik, tuk daok sit, sa-ai bhian hu daok la lingiu mblang bein maong iek ia bulan hadah saong pang ame daoh dom kadha daoh bhap bini Mường biak bingi pang, dom panuac daoh ru Mường nyu yamen li-an njom tame dalam hatai di sa-ai mbiah tal harei ini. Tui sa-ai, ragu daoh bhap bini Mường nyu hu pren dui anek menuac mai jaik gauk jang, anit ranam gauk jang..

Băng: Dom lagu daoh ví, daoh bhap bini di urang Mường nyu ngak ka menuac sia mai jaik gauk jang, anit ranam gauk jang, dom panuac khan ka raidiuk di drei jeng hu urang khan meng ariya, meng ragu daoh bhap bini . Labik halei, tuk halei, urang jeng meda ba tame ragu daoh bhap bini, tuk bui sambai urang jeng pambuak tame ariya piah daoh jeng ragu daoh bhap bini Mường atau tuk mebuk hatai jeng meda ngak jeng ariya piah daoh dalam lagu daoh ví nan.

Dalikan khan lac, saman dahlau hu sa urang kumei njauk kateik greik brei tok urang likei oh ranam ngak pasang, sa-ai mebuk hatai lô kayua daok haong pasang min oh hu hatai anit ranam. Saman dahlau amaik ame caik pak halei anek brei daok pak nan, oh kamlah hu.. Pandik harao lô sa-ai oh ndom biai hagait. Gah pasang lac sa-ai kamlo nan ye bayar sa-ai veik ka amaik ame. Angaok jalan mai sang sa-ai mboh cim katrau preo, sa-ai lac haong cim katrau yau ini:

Hát……………

Băng: (Makna lac sa-ai ndom biai haong cim katrau, lac urang chê drei kamlo oh ndom biai hu, urang bayar drei veik ka amaik ame, tuk nan gah pasang meng tatuak drei thau lac sa-ai oh kamlo bo kayua sa-ai mebuk hatai oh khin ndom biai.

Nhạc chiêng mường:………

Dahlau deih lac sa urang kumei lin, urang daoh dalam bol bala, dalam dom mbang nao daoh pamơrơ urang lin saong bhap bini, sa-ai Dung kanal di abih nan lac hatung hatian di urang lin saong bhap bini brei ka sa-ai hadei di yaok kadha daoh, ragu daoh bhap bini Mường hu sa-ai daoh meng abih hatai jai. Sa-ai dak mboh anit anek menuac, ranam bhum taneh menek tabiak dom ragu daoh bingi pang, lai li-an.. Hadei di nan, tuk mai ngak bruk di jabat ilamu huyện Kim Bôi, dalam hatai di sa-ai tuk halei jeng mboh suh sah lac: ngak yau habar piah ka ragu daoh bhap bini Mường oh lihik nao..

Băng: Drei ngak dalam gah ilamu, daoh tamia bhap bini, nan ye dalam hatai nyu pamedeih tagok bruk anit ragu daoh meng kan, ranam ilamu bangsa. Tuk nao trun puk palei, drei tuk halei jeng lac urang pathau khan, brei dam dara thau ba ilamu di bangsa Mường tame pathau khan ka abih gauk thau. Ba ilamu bangsa Mường tame dom danak dak daoh tamia, salam uan dom kadha praong dalam palei. Nao tal halei jeng hu bhap bini anit ranam. Nan lac dom pachreih ba, ngak ka drei mboh  anit ranam jang lagu daoh bhap bini di urang Mường.

Ragu daoh bhap bini Mường klak biak bingi pang min oh mbuan daoh, piah daoh hu, brei thau makna di panuac daoh, tui sa-ai Dung, brei thau ngak lagu ka nyu tabiak suan yava di ragu daoh bhap bini Mường. Dom ragu daoh bhap bini meng kan di urang Mường urak ini daok hu khik ramik meng cambuai. Tok hu urang taha praong thun meng kanal dom kadha daoh klak. Piah ka dom kadha daoh nan oh lihik nao, brei hu rilo menuac yau ye sa-a Kiều Dung, gam saong bruk abih hatai jai di taong abih dom urang anek taneh  Mường./.