Pathau mikva saong grauk ayut!

Dalam danak dak harei Sanecar adit dahlau, khol drei hu duah thau ka ragu daoh ru anek di urang bangsa Mường. Ragu daoh bhap bini – Sa drap ar ilamu hu yaom glaong di urang Mường, lac sa bruk ngak brei hadah mbaok meta di sa bangsa. Min hu oh takik uranaih Mường urak ini oh thau, oh takre panuac daoh ru Mường, bruk nan kayua thei? Kadha Dom bangsa adei sa-ai harei ini, khol drei duah thau hatai sahaneng di dom urang daok haduh hatai ka bruk khik ramik saong patagok ilamu Mường.

Tui nghệ nhân Đinh Thị Thêu daok di huyện Kim Bôi, tỉnh Hòa Bình ye: Bruk dam dara oh takre ragu daoh bhap bini ye oh njauk tuh ka thei jeng, dahlau di abih nan lac kayua dom amuk patoa veik oh tal labik tal dhua, anek bik ye nyu takre lagu daoh birau ini. Hip hop birau meng daoh tal chat ini diah. Anek bik oh ka thau halau gha di drei, dua tra nyu oh ka thau yaom glaong di ragu daoh bhap bini Mường, yau nan ye juai tuh ka gah halei, urak ini brei pambuak gauk, anek taco brei kham merat, dom ong muk brei langyah yau habar brei ka anek bik thau hu yaom glaong, makna  di ragu daoh bhap bini Mường, halau gha di drei.

Min ngak yau habar piah dom dam dara hu bac, hu daoh dom ragu daoh bhap bini palei drei tuk oh ka hu sang bac halei, tal bac halei peih pato. Jalan pato pakai ragu daoh bhap bini di nghệ nhân Đinh Thị Thêu biak njauk bac tui. Amuk lac: Amuk bhian ru taco ndih tui sap Mường, amuk hu taco nao bac mai sang nyu lac amuk lei juai myai sap Mường taco oh takre pang, min amuk daoh ru miat, ru miat tui sap Mường ye urak ini nyu ndok amuk ru nyu meng sap Mường. Tapa nan mboh lac dom taco nyu njom tame paje.

Thau, iek praong drap ar di bangsa, sa-ai Đinh Kiều Dung jeng lac sa dalam dom urang ba abih hatai jai ka bruk khik ramik, patagok ragu daoh bhap bini Mường. Oh lac peih tal pato daoh brei saoh ka dom anek kamuan ranaih sit meng thun 2004 mbiah tal ini, sa-ai daok daok pabak veik hatai anit ragu daoh bhap bini ka pasang, ka anek, kamuan di drei. Sa-ai lac: Tuk ndem meyai dalam sang ye drei ndom sap bangsa Mường. Anek metau lac urang Yuan min taco dahlak jeng pato meyai sap Mường urak ini taco ndem meyai saong ong muk tui sap Mường, ndem saong amaik ame meng sap Kinh, nao bac ndom sap phổ thông, hu amuk pato ndem yau nan ye taco meyai biak cambaic.

Sa-ai Đinh Kiều Dung hadar veik: Tuk daok sit, sa-ai bhian daok langiu sang iek ia bulan hadah saong pang ame daoh dom kadha daoh bhap bini Mường mboh biak druat druai, dom panuac daoh ru Mường lai la-ar njom tame hatai jai, suan yawa sa-ai mbiah tal harei ini. Sa-ai mboh lac, reagu daoh bhap bini Mường hu prein khang ngak ka anek manuac diuk rai thau anit ranam gauk jang, dui urang mai jaik gauk jang.

Dahlau deih lac sa urang kumei ngak lin, lac urang daoh di bol bala, dalam dom mbang nao daoh pamơrơ urang lin saong bhap bini, sa-ai Dung hadar di abih nan lac dom anit ranam di urang lin saong bhap bini brei ka sa-ai hadei di yaok mbang daoh sa kadha daoh, ragu daoh bhap bini Mường  hu sa-ai daoh meng hatung hatian brei mboh janih gheih, mekre di ilamu bangsa drei.

Ragu daoh bhap bini Mường meng kan biak bingi pang min oh mbuan daoh, piah daoh hu brei thau makna di nyu, tui sa-ai Dung, brei thau mbeik sap daoh ka njauk, ka gheih, ka bahu suan yava di ragu daoh bhap bini Mường. Dom ragu daoh bhap bini Mường urak ini daok hu khik ramik tui jalan patoa veik meng cambuai. Tok hu dom urang taha umo meng thau daoh dom kadah daoh meng kan. Piah ka gilang nan oh lahik nao, brei hu dom urang yau sa-ai Kiều Dung, gam saong bruk abih hatai jai si taong abih dom urang anek palei Mường./.