Anak dom kan kandah rah tabiak di jit ruak kum menuk ada di ralo puk palei dalam taneh ia, Uy mban bhap bini tỉnh Hau Giang hu tacei pato dom gah, dom pakat jhul pakhang bruk pacang cakak jit ruak, abih di nyu nan lac sangka tal bruk pathau khan piah paglaong akaok sahneng di urang raong glang, pablei salih menuk ada dalam tinh. Kadha vak di Tan Phong – urang vak di rayo sap ndom Viet Nam daok di bhum taneran kraong Cuu Long:

Saai Nguyễn Văn Út Nhỏ daok di palei 8, xã Thuận Hưng, huyện Long Mỹ brei thau: sa ribau drei menuk dalam trại di saai praong hu jaik sa bilan. Dom harei ini mehit lac jit kum rah tabiak di ralo labik min saai takik duh hatai kayua tapol menuk di saai hu klauk jru pacang cakak ginup, taphia di nan saai daok hu ngak hacih saat var ro yaok harei. Sa-ai lac:

“Dahlak mboh jit ruak rah tabiak kan kandah nan ye ba menuk mai dahlak hu khan brei ka thú y palei, xã thau, bloh tal 14 harei drei klauk jru pacang cakak saong var ro bilan ini drei jeng ngak sre ngin brei nyu oh njauk ruak”

Bruk thau pacang cakak jit ruak ka tapol menuk ada di saai Út Nhỏ jeng lac akaok sahneng di urang raong glang di huyện Long Mỹ urak ini. Tui kuhria, urak ini dalam huyện Long Mỹ hu jaik 2 triệu drei menuk ada. Dalam nan hu labaih 80% menuk ada raong pataom hu klauk jru pacang cakak ginup. Saai Phan Ngọc Toại – urang jakar thú y xã Thuận Hưng, huyện Long Mỹ brei thau: dom thun dahlau Long Mỹ bhian rah tabiak jit kum menuk ada, nguy hiểm jang nan lac dalam thun bloh di huyện hu 3 urang njom kum A H1N1, H5N1 njauk tame sang iek ruak, hu sa urang metai. Meng bruk nan, dalam tukvak tapa huyện hu pataom tame pathau khan tui ralo jalan piah paglaong akaok sahneng di urang raong glang,  meng nan  bo dom baoh sang raong glang hu thau lac bruk kuhria caga pacang cakak jit kum menuk ada oh lac khik caga siam ka tapol menuk ada di drei bo daok khik caga pren yava ka rup drei. Saai Phan Ngọc Toại daok brei thau lac:

“Mikva raong menuk, ada caik hatai tal bruk kum nan ye tuk ba mai brei ngak hacih saat var ro, pruh jru pametai anek ruak, bloh pambuak bruk saong gah thú y tal harei brei thau bruk klauk jru pacang cakak ginup nan ye tukvak tapa jit ruak di puk palei oh rah tabiak. Tukvak anak tal gah thú y hu patui bruk  jak ba bhap bini kham merat pambuak bruk saong gah thú y piah klauk jru pacang cakak saong pasang tapol ka nyu khang kajap, klauk jru pacang cakak ginup, peih ngak siam bruk pacang cakak jit ruak”

Tui kuhria mboh, urak ini abih tih menuk ada di tỉnh Hau Giang hu jaik 4 trieu drei, ralo jang thun bloh jaik 500 ribau drei. Anak bruk jit kum menuk ada rah tabiak kan kandah, piah khik hu siam, taphia bruk tacei pato pathau khan paglaong jang gac akaok sahneng di urang raong glang, kuhria caga ginup vacxin klauk pacang cakak ngan saong 10 trieu mbang, urang dang akaok tỉnh hu pandar giám đốc dom sở, urang pan akaok dom jabat mban, dom ngành, kapul nyaom saong puk palei patagok bruk tacei pato peih dom jalan ngak pacang cakak jit pak dom puk palei di drei. Tui nan, sở ngak nong saong patagok palei pala, sở kong thuong saong dom labik pambuak bruk pasang iek khang kajap, hu jalan caga, jalan langyah bruk jit ruak di kabau limo, menuk ada tuk hu rah tabiak, oh caik ka jit pambak tapa menuac. Daok gah Sở y tế Hau Giang hu tacei pato taong abih labik y tế meng tỉnh tal puk palei caga ginup jru, hóa chất, radaih brei ka bruk pacang cakak jit saong ngak siam bruk cấp cứu, iek ruak ka urang ruak hu njom jit. Bác sỹ Hoàng Văn Thuấn – phaok akaok khoa njom ruak sang iek ruak đa khoa huyện Long Mỹ brei thau:

“Sang iek ruak hu kuhria caga taong abih dom janih yau jru, duk ndih iek ruak, jamraik suak yava, jamraih tạo oxy, jamraih mek libar, gam saong jalan iek ruak, urang iek ruak, dom pandap trang bị karei ka urang jakar y tế, hu labik oh brei tame. Tui jalan sẵn sàng, ye tuk halei sang iek ruak jeng kuhria caga pacang cakak  jit kum rah tabiak”.

Urak ini gah chức năng tỉnh Hau Giang hu brei ralo kapul nao pasang iek, klauk jru pabak ka dom menuk ada bahrau raong veik, abih tukvak miễn jit. Khik iek khang kajap dom tapol ada raong palao langiu hamu, taphia di nan patagok bruk nao pasang iek jit, pasang iek dom labik pablei salih, sik ngak ralo, pablei menuk ada./.

Bien dich: SaPhi Giah