Dom thun jaik di ini, ralo baoh sang, doanh nghiệp dalam huyện bhum ceik Bác Ái – tỉnh Ninh Thuận hu ba phun keo lai tame pala di bhum taneh dốc saong mbon ceik bhum glaong saong tuk camereip mboh hu rilo kein laba. Min, piah ka phun keo lai lac phun patruh eik patrun kathaot, bruk quy hoạch pala janih phun ini brei hu caik hatai sangka, klah bruk bhap bini pala ralo phun keo lai, ba tal rilo khat lihik oh kuhria mboh dahlau. Kadha vak di urang pambuak bruk Văn Cảnh saong Thế Quang brei thau ka bruk ini:

Ong Nguyễn Đình Hành, daok di xã bhum ceik Phước Thành, huyện Bác Ái hu 3 ha pala phun keo lai jaik tak pablei. Ong Hành brei thau: mboh janih phun ini ba mai kein laba glaong, mbuan pala nan ye sang ong salih meng pala tangei tapa pala keo lai meng thun 2011. Ong Nguyễn Đình Hành lac:

“Dahlau daih taneh ini pala sa janih tangei min kayua kurang ia nan ye dahlak salih tapa pala keo lai meng thun 2011 tal urak ini hu 3 thun, bruk pala keo lai di Ninh Thuận tuk nan oh ka hu, hadei di ini drei mehit lac taneh pala keo lai hu patagok, yaom kaom tani tanat saong meda patruh kathaot meng phun keo lai ini, nan ye dahlak khang hatai buh jien tame pala tal urak ini jeng hu 3 thun”.

Xã Phước Thành urak ini hu labaih 200 ha phun keo lai meng 1 tal 4 thun. Kayua taneh thu lagu, kurang ia pruh, dom thun jaik di ini ralo baoh sang bhap bini hu salih meng phun pala oh hu kein laba tapa pala phun keo lai. Meng akaok thun tal ini hu 54 baoh sang tut angan tame pala phun keo lai tui mô hình di angaok taneh praong 52 ha. Tuk pala keo lai dalam mô hình, yaok baoh sang hu daong 3 triệu đồng jien blei pajaih saong khak drak tui danak dak 30a. Ong Pinăng Xuân, daok di xã Phước Thành, huyện Bác Ái, tỉnh Ninh Thuận lac:

“Mehit lac pala phun ini jeng ba mai kein laba, rai diuk mikva harei hadei meda cadu jang, labik ini taneh thu lagu oh pala phun hagait karei hu, tok pala hu phun keo, bloh karja daong ka mikva ilamu iek glang ni deih. Mikva mboh lac phun ini ba mai kein laba glaong dalam tukvak anak tal”.

Doanh nghiệp nao dahlau dalam bruk pala phun keo lai dalam huyện Bác Ái nan lac cty Ngọc Doanh. Cty ini urak ini hu jaik 400 ha phun keo lai di xã Phước Thắng saong Phước Thành. Phun keo lai lagaih saong langik tasik di huyện Bác Ái saong hu yaom kinh tế glaong, pablei tabiak tani tanat, bruk pataom blei saong pajeng ba jeng hu mbuan lagaih. Amuk Nguyễn Thị Ngọc Duyên – Giám đốc cty Ngọc Doanh lac:

“Bruk pablei tabiak ye  urak ini, tỉnh Ninh Thuận drei daok jaik tapen tỉnh Khánh Hòa, pak di Khánh Hòa pabah lamnge Cam Ranh hu 3 sang mac urang blei bayar jien chip, phun ini đường kính meng 12cm tagok ye drei pablei ngak kayau, kayua kayau ini urang tagaik tabiak piah pablei tabiak negar langiu, phun kayau ye pablei hu 1 triệu 800 ribau đồng sa tấn, daok drei pablei dhar saong jung yaom 1 triệu 250 ribau đồng sa tấn di pabah lamnge Cam Ranh, bruk pablei tabiak hu tani tanat, urak ini ngak oh dil ka urang pablei”.

Kein laba meng bruk pala phun keo lai tuk camereip hu mboh cambaih. Min bruk patagok phun keo lai brei hu quy hoạch cambaih laih, klah bruk bhap bini mboh kein laba di anak meta, ba tal bruk urang pala ralo phun keo lai. Hu bloh bài học kayua patagok phun pala tui phong trào, nan ye bhap bini gaok kan kandah kayua tal tuk pablei ye yaom biar, doanh nghiệp oh blei ba tal bruk jah tak klak. Taphia di nan, bruk pala sa janih phun keo lai ngan saong bhap bini daok di Bác Ái jeng lac sa bruk mạo hiểm. Kayua piah tak pablei hu phun keo lai bhap bini brei cang meng 3 tal 5 thun, dalam tuk quỹ taneh pala drak takik nan ye bhap bini kan mek panak raong atah. Ong Nguyễn Cảnh Tài, phaok akaok UB bhap bini xã Phước Thành, huyện Bác Ái, tỉnh Ninh Thuận brei thau:

“Kol dahlak jeng brei pataom tame di dom labik taneh halei, taneh thu lagu, takik oh siam piah jak ba mikva pala, daok dom taneh mikva pala phun yaok thun hu ye kol dahlak oh ba tame pala phun keo lai, piah daok patagok dom phun karei hu kein laba jang, daok phun keo lai tok di pataom tame di bhum taneh mbuon đốc, taneh thu lagu, oh pataom tame pala taong abih phun keo”.

Bruk ba tame pala phun keo lai di huyện Bác Ái, tỉnh Ninh Thuận hu peih tabiak sa jalan nao barau dalam bruk patagok kinh tế, patruh eik patrun kathaot ka bhap bini di labik ini. Min dahlau di abih, bruk quy hoạch pala phun keo lai brei hu dom pakat, dom ngành caik hatai sangka, piah ka phun keo lai hu patagok khang kajap saong ba mai kein laba gloang ka bhap bini./.