Urak ini, dalam ban raya Hồ Chí Minh hu labaih 6000 urang Cam daok di 16 quận, huyện di ban raya.  Dalam dom thun jaik di ini, bruk thể dục thể thao hu cakrok patagok dalam bhap bini Cam daok di ban raya Hồ Chí Minh. Abih di nyu nan lac dalam dam dara, sinh viên saong anek saih… Thể dục thể thao oh lac ba mai pren yava, ngak brei chreih chrai dalam bac da-a saong dalam tuk ngak bruk, bo nyu daok lac sa mblang me-in daong ka dam dara hu taom gaok, bac megru ilamu di gauk.  Meng bruk me-in thể dục thể thao ini, kapul caoh mbanh, dit blong likei Cam Quận 8, ban raya Hồ Chí Minh hu padang tabiak saong daok me-in biak siam.

Hu padang tabiak meng thun 2005 mbiah tal urak ini hu jaik 10 thun,  kapul caoh mbanh, dit blong likei Cam Quận 8 (daok ieu lac kapul Awar) hu abih tih 16 urang umo meng 18 tal 55 thun. Meng dom harei camereip, dom adei sa-ai kham merat abih drei piah pakhang pasiam pren yava hadei di sa harei ngak bruk glaih glar.  Meng tuk hu mbaok tame kapul caoh mbanh, rilo urang dahlau deih takre me-in ban glai ban klo, urak ini hu rilo siam mekre dalam taom gaok, ndom biai haong puk paga. Bruk me-in  thể thao hu daong paglaong pren yava, paglaong ilamu ndom puac, daok dang saong daong jhul kadun likuk dom tệ nạn xã hội, khik ramik siam mekre puk paga. Ong Haji Rozaly, Ban Quản trị sang megik Awar  Quận 8 gam lac urang dang akaok kapul caoh mbanh Quận 8 brei thau: Mboh dam dara daok takre me-in ban glai ban klo, kol dahlak brei padang kapul caoh mbanh piah ka dom anek kamuan hu labik me-in sambai siam mekre, hu labik piah taom gaok, bac megru ilamu piah jeng menuac siam ka jamaah.

Meng tuk hu mbaok tame kapul dit blong, adei Salayman – anek saih tal 12, sang bac phổ thông Dương Bá Trạc hu rilo tiến bộ, adei mboh bui sambai caong tal harei puac adit piah nao dit blong, piah hu taom gaok haong adei sa-ai. Tapa nan, adei mboh pren yava hu siam jang, sami samar jang dalam bac da-a jeng yau dalam bruk ngak. Adei Salayman, hậu vệ kapul caoh mbanh brei thau: Hu dit blong haong adei sa-ai adei mboh bui sambai lô. Lingiu di nan adei daok mboh pren yava hu khang kadang jang. 

Urak ini, bhap bini Cam di ban raya Hồ Chí Minh hu 6 kapul caoh mbanh, dit blong di Quận 1, Quận 3, Quận 6, Quận 8, Phú Nhuận saong jamaah Hòa Hưng…Dalam dom harei rija, roya, dom kapul bhian taom gauk pakacah, saong hu dom mạnh thường quân pok meyaom meng dom pok pandap sit sot min nyu hu makna pachreih ba biak praong. Amuk Salymah, urang hu anek dalam kapul dit b long bui sambai khan lac: Meng tuk tame dit blong, anek di dahlak oh daok nao me-in ban glai ban klo, pren yava di nyu jeng hu khang kadang jang, dahlak uan tabuan lô mboh anek di dahlak nyu hu siam mekre yau nan./.