Tukvak tapa, tui bruk salih taneh pala padai tapa  phun pala angaok thu, dom phun pala hu urang nong Cam tỉnh Ninh Thuận ba tame pala nan lac medhar, tangeiy, ratak naih, ratak lo saong dom janih njam patam karei... Anak meta mboh lac: dom phun pala nan nyu lagaih haong langik tasik thu lagu di Ninh Thuận saong ba mai kein laba kinh tế glaong. Jasi – Urang vak di Rayo sap ndom VN daok di bal raya Hồ Chí Minh hu kadha vak ndom tal bruk ini:

Dahlau diah, sang sa-ai Quảng Đại Hưng daok di palei Phước Đồng 2, xã Phước Hậu, huyện Ninh Phước, tỉnh Ninh Thuận kak kajap haong phun padai saong phun patei. Jien mek tame oh hu ralo, langik dak harei dak pandiak nan ye sa-ai salih sa sào taneh pala patei tapa pala madhar. Hadei di 5 thun, kein laba di phun madhar hu daong ka sang sa-ai patagok jien mek tame.

Xã Phước Hậu, huyện Ninh Phước, tỉnh Ninh Thuận hu labaih 135 ha phun madhar daok brei baoh saong daok pala bahrau 5 ha. Phun madhar daok lac phun pala ba mai kein laba kinh tế glaong, daong patagok jien mek tame, pasiam rai diuk di mikva Cam pak ini.

Langiu di phun madhar, phun nho, mikva Cam Ninh Thuận daok  salih taneh pala padai oh hu kein laba tapa pala kruac bhung kanduh hijao. Tuk Akaok mereip mboh lac, janih phun pala ini lagaih haong langik tasik taneh riya pak ini, urak ini phun cakrok siam. 

Daok pak bhum taneh cuah patih di xã An Hải, huyện Ninh Phước, mikva Cam khang hatai buh jien tame ngak jalan pruh aia patak pataom piah pala njam haih, piah mek hu angan njam hacih, urang Cam di palei Tuấn Tú salih bruk pala njam tui jalan meng kan tapa  pala njam hacih, ngan haong bruk daong ba di dom pakat karja, gah chức năng. Dom baoh sang hu mboh tangin tame harak pambuak bruk pabak njam hacih haong doanh nghiệp, dom labik pablei salih di dom baoh darak, siêu thị, rik daong grap tanat bruk pablei dom janih njam patam, baoh karaoh siam hacih. Jaik abih dom baoh sang pala njam hacih jeng hu laba.

Tui kuhria mboh di gah ngak nong tỉnh Ninh Thuận, vụ Hè thu 2017, dalam tỉnh salih hu 702 ha, mek hu 80% bruk ba tabiak. Dalam nan, phun yaok thun 640 ha, phun lavik thun 62 ha. Piah khik ka bruk salih phun pala meng taneh pala padai tapa phun pala angaok thu mek hu kein laba saong khang kajap, suai lavik, gah ngak nong Ninh Thuận hu pasang iek saong palih ruah dom janih phun pala ka nyu lagaih haong taneh riya, njauk haong bruk pala drak di yaok labik. Taphai di nan, sangka salih meng taneh pala padai tapa dom janih phun mbang baoh, măng tay saong dom janih njam patam baoh karaoh,... pambuak haong bruk pablei tabiak pandap panda kaya nong. Ong Trịnh Minh Hoàng – Akaok Sở Ngak nong saong patagok palei pala tỉnh Ninh Thuận brei thau: Padang dom mô hinh piah ngak habar paglaong chất lượng pambuak pagam haong doanh nghiệp piah pablei dom kaya nong ini. Plaih bruk tuk kurang tuk labaih, abih di nyu nan lac dalam bruk kiểm soát dư lượng jru khik caga phun pala piah ngak habar dom janih pandap kaya nong ini meriak tame hu dom siêu thị piah paglaong yaom di nyu. 

Bruk salih phun pala di bhum urang Cam Ninh Thuận daok ba maikein laba . Dalam tukvak anak tal, gah ngak nong tỉnh Ninh Thuận daok jao brei ilamu kỹ thuật, pambak prong dom mô hình ngak mbang (hiệu quả) hu kein laba, ngak tabiak pandap panda kaya nong hu chất lượng, paglaong yaom di nyu, rik daong patagok jien mek tame ka bhap bani./.