Kapul ngak bruk di tỉnh An Giang kayua ong Lê Hồng Quang, Bí thư Tỉnh ủy An Giang ba akaok hu nao rivang, pachreih ba, pasang iek tapak dom danak dak praong di tỉnh pak di ban Châu Đốc saong ban sit Tân Châu meng di dalam akaok thun bahrau sak inegirai 2024. Bí thư Tỉnh ủy An Giang Lê Hồng Quang kakei kapul langyah, dom po thau padang ngak, kapul dom urang kỹ sư, urang ngak paglaong bruk pambuak gauk khang kajap, kham marat, khang hatai jang, peih ngak catang jang; patui veik jak ba dom urang ngak, dom jamraik jhul khang bruk peih ngak danak dak ngan haong hatai “yam tapa pandiak, jayah hajan”, "3 ca, 4 kíp", tani tanat bruk ngak tui njauk jalan ba tabiak.

Tal harei kabroi (19/2, lac harei 10 bingun bilan 1 saka ia bulan), 94% dom doanh nghiệp di Bình Dương peih pabah mbang ngak bruk veik haong 91% dom urang ngak mai ngak bruk veik, daok dom doanh nghiệp dalam dom labik ngak kong, hu labaih 95% urang ngak mai ngak bruk veik. Tui panuac di Sở LĐTBXH tỉnh Bình Dương, bruk urang ngak mai ngak bruk veik di dom doanh nghiệp dalam tỉnh hu tani tanat kayua doanh nghiệp hu rilo jalan ngak piah khik takai urang ngak saong hu dom sarak pachreih urang ngak mai ngak bruk veik njauk harei, yau ye bruk hu radaih pajeng nao – mai, lì xì akaok thun, peih payak uan thun bahrau.

HĐND tỉnh Ninh Thuận bahrau ba tabiak sarak salih jalan pandar jaik 10 ha taneh glai pacang caga (taneh oh hu glai), di xã Phước Dinh, huyện Thuận Nam salih tapa bruk pandar karei piah peih ngak danak dak Labik du lịch Vịnh Mũi Dinh. Danak dak hu 1 labik khách sạn 3-4 tal, labik biệt thự hu binek manei karei labik bungalow, nhà hàng, labik spa saong dom labik pandar karei pak di labik hu prein taduan rilo abih lac 500 urang. Danak dak ngak salah meda jeng lac labik padeih padai pakat glaong 4-5 patuk tui tanut chuan dunya, rik tame cak rok patagok prein khang du lich di tỉnh.

Tal urak ini, tỉnh Đồng Tháp hu Cục Khik caga phun pala brei mã số ka 1.208 bhum pala haong taneh praong labaih 106 rabau ha; dalam nan, phun mbang baoh lac labaih 15 rabau ha; phun njam patam 2.000 ha; phun padai labaih 88 rabau ha. Jaik abih dom labik hu brei mã bhum pala lac piah pabak ka bruk pablei dalam tameh ia saong pablei tabiak negar langiu. Labik hu brei mã bhum pala padai mboh lac daok tui jalan salih meng pajaih padai hu chất lượng biar tapa pala dom pajaih padai hu chất lượng glaong, brei năng suất glaong. Ngan saong phun mbang baoh hu brei mã bhum pala mboh hu kein laba glaong jang duk haong janih phun mbang baoh yau gauk hu pala ngak tui jalan meng kan

Harei kabroi, Công an huyện Kbang, tỉnh Gia Lai hu duah mboh, pataom mek jaik 500 phun anh túc dalam bein di sa baoh sang rahra daok pak xã Tơ Tung. Dahlau di nan, tapa pasang iek thau tantu cambaih bruk, Công an huyện Kbang peih bruk pasang iek samar drah di labik ong Triệu Văn Thu, umo 53 thun, daok pak palei Cao Sơn, xã Tơ Tung. Tapa pasang iek hu mboh, dalam bein sang ong Thu hu pala 485 phun anh túc. Peih praong bruk pasang iek, kapul công an hu duah mboh 3 pa-op katak sambo jhuk hu janih khang sambo jhuk, ong Thu khan lac nan katak phun anh túc. Công an huyện Kbang daok ba dom janih pandap duah mboh nao dut iek taong yaom, tuk thau cambaih laih ye peih bruk langyah tui njauk adat hukum.

Dalam tuk Tết Nguyên đán thun ini, gah kapal haoh pajeng tuai di Trung Quốc hu pajeng ba jaik 18 triệu mbang tuai, lac biak glaong, kuhri rah tapa, yaok harei pajeng ba jaik 2 triệu 300 rabau tuai. Bruk du lịch tỉnh Hải Nam, Trung Quốc tagok khang dalam tuk Tết Nguyên đán thun ini, tuk yaom harak vé kapal haoh par nao mai tagok glaong. Cục Hàng không Dân dụng Trung Quốc brei patagok prein pajeng ba di tỉnh ini saong dom gah pambuak tal jeng hu peih ngak rilo jalan ngak piah daong ka tuai mai veik hu mbuan lagaih.

Jabat pandar Tháp Eiffel harei kabroi khan lac brei kareik pabah mbang labik du lich danei angan ini kayua dom urang ngak pak ini ba gauk padeih ngak. Bruk padeih ngak mbang ini kayua Tổng Công đoàn lao động Pháp lambaok ka lagaih 400 urang ngak daok ngak bruk pak Tháp Eiffel ba tabiak piah ieu Tòa Thị chính Paris – kapul daok khik 99% phul jien tacei ba Tháp – pasang iek veik bruk khik ramik jien padai. Dom urang ini brei thau lac Tòa Thị chính Paris daok tacei jalan ka baoh Tháp pamaong tame dom bruk ngak mbang “oh khang kajap”, jabat ini taong yaom biak glaong jien mek tame meng bruk pablei harak ve dalam tuk kadung jien kanja brei ka bruk khik ramik saong pasiam veik daok biak bier.

Akaok Mintri pablei salih Ấn Độ Piyush Goyal harei kabroi khan lac rajaei hu ba tabiak jalan ngak piah khik kajap bruk daong yaom kaya nong, lac: ratak, tangei saong kapah, dalam harak sanya ginum biai haong kapul urang ngak nong taneh ia ini, tuk dom bruk trun jalan di gah ngak nong gam gam patuh tabiak dalam 1 adit jaik ini. Ấn Độ daok dalam tuk salih rilo janih phun pala tapa ratak meng brah saong lúa mì, kayua ratak abih takik ia pruh jang saong daong cakak trun bruk blei ratak tame meng negar langiu. Dom bruk trun jalan rah tabiak di tukvak hu makna praong di Ấn Độ tuk bruk bầu cử tui kuhria hu peih tabiak dalam dom bilan tal./.