Akaok negar Võ Văn Thưởng bahrau brei payua harak tadhau ayuh uan umo thun taha ka 1.632 rahra bak umo 100 thun (ndih tapui thun 1924) saong umo labaih 100 thun di 14 tinh, ban dalam taneh ia lac: Bạc liêu, Bắc Kạn, Hà Nam, Đà Nẵng, Thừa Thiên Huế, Quảng Trị, Bắc Giang, Quảng Ninh, Phú Thọ, Nam Định, Thanh Hóa, Yên Bái, Cao Bằng saong Lạng Sơn. Dahlau di nan, puac bilan 12/2023, Akaok negar jeng hu payua harak tadhau ayuh uan umo thun taha tal 1.025 rahra umo 100 thun saong labaih 100 thun di 10 tỉnh, ban lac: An Giang, Vĩnh Long, Bắc Ninh, Quảng Ngãi, Hà Giang, Bắc Giang, Điện Biên, Đắk Nông, Trà Vinh saong Phú Yên.

LĐLĐ TP.HCM khan lac, kuhria tal harei ini, hu 2.075 doanh nghiệp (hu padang Công đoàn) brei thau ka bruk jien bilan, jien thưởng Tết thun 2024, dalam nan thưởng Tết glaong abih di doanh nghiệp hu phun jien negar langiu lac labaih 2 tỉ đồng sa urang saong kuhria rah tapa, jien thưởng Tết meng 6 triệu meteh tal 12 triệu sa urang. Daok di dom doanh nghiệp Karja, jien thưởng Tết glaong abih lac 67 triệu đồng sa urang, biar di abih hu thưởng 2 triệu đồng sa urang. Urak ini hu 5 doanh nghiệp sit, takik menuac ngak, meda oh hu jien thưởng Tết kayua gaok kan kandah.

Thun 2023 bahrau blaoh, tỉnh Vĩnh Long hu peih ngak rilo danak dak sarak brei masaiy jien ngan haong dom urang, dom baoh sang ngak mbang, pablei salih gaok kan kandah kayua jit praong Covid-19. Dalam nan, gilang paraik sarak kanja tinh hu brei ka 31 ribau sang masaiy 1.182 tỷ đồng piah ngak mbang, pablei salih. Meng phun jien hu khik tani tanat bruk ngak, ba bruk ngak bahrau ka labaih 10 ribau urang ngak, 375 urang ngak hu nao ngak bruk di negar langiu tui harak pambuak bruk; daong ka labaih 1.600 anek saih, sinh vien gaok kan kandah hu masaiy jien piah nao bac megru.

Tiền Giang hu 80 mã số bhum pala thanh long di mangaok taneh praong labaih 6.140ha, pablei tapa darak pasar dom taneh ia Japon, Hoa Kỳ, Hàn Quốc, Australia... Tiền Giang daok ba tabiak bruk lac tal thun 2025, hu 3.600 ha taneh pala thanh long mek hu tanut GAP; taneh paik baoh lac 7.900 ha, saong paik hu mangaok 235.000 tấn baoh. Anak tal, piah paglaong chất lượng saong prein meriak gauk di mangaok darak pasar, gah ngak nong tỉnh daok patui bruk ba brei ilamu pala sa janih thanh long ka urang nong bhum pala nan tui jalan GAP gam haong patagok kinh tế pambuak gauk

Piah paglaong yaom kinh te, rilo urang ngak nong di Lai Vung, Đồng Tháp sahneng duah saong pala hu siam quýt hồng Lai Vung dalam chau piah pablei ka tuai parang caik dalam tuk Tết Nguyên đán. Quýt hồng dalam chau hu yaom meng 1 - 5 triệu đồng/chậu, tui chau praong sit saong tui baoh rilo atau takik. Urak ini dalam huyện Lai Vung hu labaih 220 ha taneh pala phun quýt hồng. abih tih dom baoh hu paik dalam tuk Tết Nguyên đán sak inegirai tui kuhria mek hu labaih 4.000 tấn.

Piah dui pachreih rilo jang urang negar langiu tal Trung Quốc ngak mbang, bac megru saong ravang me-in, Cục khik ramik Di dân negar Trung Quốc hu ba tabiak rilo jalan ngak bahrau, dalam nan hu brei pacadu dom bruk ka urang negar langiu likau thị thực di dom pabah mbang negar. Cục khik ramik Di dân negar Trung Quốc khan lac daok pambuak bruk haong dom gah gam tal bruk nan, pataom tame langyah dom tavak tavaiy ngan saong urang negar langiu tal Trung Quốc, jhul samar bruk peih pabah mbang sarak, peih tabiak jalan ngak mbang pablei salih siam lagaih di abih saong jhul patagok bruk padang ngak sa danak dak patagok bahrau.

Piah daong ka rahra samar drah tani tanat veik raidiuk hadei di bala magei baoh taneh, kanja dom bhum palei di tỉnh Ishikawa, Nhật Bản hu peih bruk padang ngak dom baoh sang kathop bahrau saong brei ka rahra tut angan tame daok dalam baoh sang rahra di taneh ia ini. Dom urang hu sang jaleih abih atah khut sa binah meda taduan hu bruk daong meng jien mbaok. Bahrau ini, Kanja Nhật Bản hu brei 4,74 tỷ Yen (lac labaih 33 triệu USD) piah daong ka dom bhum palei ramik ngak pasiam veik hadei di mbang magei baoh taneh.

Google, Cty anek di Alphabet, bahrau brei padeih yaok ratuh urang ngak bruk dalam kapul trợ lý ảo, binah khang saong ilamu, dalam tuk Cty công nghệ ini daok cakak trun jien sahui. Dom menuac ngak binah khang lahik bruk lac ngak gah Pixel, Nest saong Fitbit di Cty. Jaik abih kapul thực tế ảo patagok jeng lahik bruk ngak. Min lambaok Google oh khan brei thau cambaih hadom menuac brei padeih. Dahlau di nan, bilan 1/2023, Cty amaik Alphabet brei thau bruk kuria brei padeih 12.000 menuac ngak, samu 6% dalam abih tih dom menuac ngak di Cty angaok dunya./.