Uan harei Gru jru Việt Nam (27/2), harei kabroi, akaok negar Võ Văn Thưởng hu nao rivang sua tangi, pachreih prein ka dom y, bác sỹ, urang ngak gah y tế Sang iek ruak Nhi đồng 1 Hồ Chí Minh – labik y tế gah uranaih dang akaok dalam taneh ia. Akaok negar taong yaom glaong kapul y, bác sỹ Sang iek ruak Nhi đồng 1 tuk halei jeng jum pataom gauk, khang hatai, jia tame ilamo, hu hatai anit ranam urang ruak, khin sahaneng, khin ngak kayua prein yava di rahra, ngak jeng dom jak jeng biak hadah mbaok mata. Akaok negar caong maong dom y, bác sỹ, urang ngak gah y te tuk halei jeng khik hatai caong khin, anit ranam khang bruk ngak di drei piah patui veik kham marat, ngak bruk.

Hadei di 2 thun brei padeih, TP.HCM bahrau peih ngak veik Danak dak brei mesraiy pachreih bruk ngak mbang. Ini lac danak dak hu TP peih ngak 20 thun tapa, hu yaom jien brei mesraiy glaong abih ka yaok bruk ngak, lac 200 tỉ đồng. TP.HCM pandar kadung jien karja piah daong jien jhung meng 50% -100%, tukvak daong rilo abih lac 7 thun. Phun jien ini piah jhul tagok bruk buh jien tame ngak mbang dom gah praong yau ye: jalan mbak, năng lượng, langyah alam môi trường, công nghiệp hỗ trợ, logistics, ilamu khoa học, công nghệ, salih số saong danak dak padang ngak ban raya thông minh... daong ka doanh nghiệp samar hu phun jien piah samar peih ngak danak dak.

Bruk raong hadang siêu thâm canh 3 tukvak meng kong nghe tuần hoàn takik salih ia saong salamat sinh học hu rahra tỉnh Cà Mau ngak iek jak jeng. Yaok vu hadang mek hu tal 60 tấn/ha. Kein lagaih di bruk raong hadang ini lac peih ngak hu meng 6-8 mbang sa thun; hadang raong oh hu jru kháng sinh, oh tathuak nerak tabiak labik daok, mek hu tanut chuan pablei tabiak negar langiu. Tỉnh Cà Mau taong yaom lac, Danak dak raong hadang siêu thâm canh salamat sinh học hu jak jeng tuk camriep, kong nghe raong mek hu kein lagaih, tani tanat oh ngak tachrauk nerak alam saong takik hu jit ruak.

Dom harei tapa, ia mbak glaong daok njaom tame tỉnh Sóc Trăng, ngak kan kandah tal bruk pala drak di rahra. Di dom xã An Thạnh Nam, An Thạnh 3, Anh Thạnh 2, Đại Ân 1, dalam huyện Cù Lao Dung, mbak bhian daok di tanut 4 phần nghìn, di dom palei akaok pulao, mbak jeng lac meng 1,5 tal 2 phần nghìn. Kayua mbak njaom tame dalam saong daok di tanut glaong, nan ye dom cống thuỷ lợi di labik ini jeng hu kreik sre pacang ia mbak njaom tame. Daok di huyện Long Phú jeng daok gaok kan kandah tapak meng ia mbak njaom tame meng dom harei akaok bilan 2 tal ini.

Sang bac Đại học Cần Thơ bahrau brei thau tanut pilih ruah thun 2024 saong jalan pilih ruah thun ini. Abih di nyu nan lac, thun ini hu jalan pilih ruah bahrau lac pasang iek điểm mbang pakacah taong yaom tame đại học (V-SAT). Mbang pakacah V-SAT hu 7 môn pakacah tui dom nyaom pilih ruah, lac Toán, tiếng Anh, Vật lý, Hóa học, Sinh học, Lịch sử, Địa lý meda pakacah tui jalan trắc nghiệm tui yaok môn eng di nyu di mangaok komputer piah pilih ruah lac taong abih dom gah (kaoh tabiak gah pato magru gru pato, văn học, báo chí). Tanut pilih ruah tui kuhria di Sang bac Đại học Cần Thơ thun 2024 lac 10.060 sinh viên. Tukvak tut angan pilih ruah tui kuhria lac meng harei 20/5 tal harei 15/6.

Sa sruh haoh par trun ia bulan kayua Cty Hàng không vũ trụ Intuitive Machines hu jabat di Houston, Mỹ ngak tabiak, hu nao tal quỹ đạo Ia bulan di harei 21/2, pamaong tal kham merat ngak hu mbang par trun camereip abih di Mỹ tagok thiên thể jaik abih di baoh taneh kuhria dalam labaih 50 thun tapa. Sruh haoh nan ba tui rilo pandap panda jamriak ilamu khoa học di jabat Hàng không Vũ trụ Mỹ (NASA) tagok ia bulan. Nyu pandar sa janih jamriak methane saong oxy hóa lỏng biak la-an bahrau, hu caong lac ginup năng lượng piah nao tal ia bulan samar jang.

Ban Wajima, tỉnh Ishikawa, negar Japon – lac labik danei angan ilamo cih sơn mài daok gaok biak rilo kan kandah kayua dom mbang apui khuah rahtabiak hadei di mbang magei baoh taneh. Dalam tuk nan, sa kapul dom urang ngak ranaih umo di Wajima hu roh duah dom tác phẩm sơn mài daok veik hadei di mbang bala, parang iek saong pablei di ban ine Tokyo. Labaih 120 janih sơn mài yau jaluk, pa-aop, klaok bingu… hu ramik caik tapak di sa gian hàng di Pasak pablei salih di Isetan. Dom janih ini lac angan je ka ilamo sơn mài di ban Wajima, gam tui di nan lac sa dalam dom bruk rik tame ngak jeng ilamo gheih mekre di Japon.

Khau tin meng Hồng Kông brei thau, sruh kapal haoh tauk angan RW602 di Hãng kapal haoh Royal Philipine Airlines daok par meng Boracay di Philippines tal Thượng Hải, Trung Quốc ye sa talok pin sạc dự phòng di tuai ndik kapal haoh nyu khuah, ngak brei labik tuai daok di kapal haoh nyu bak thak. Kapal hoah njauk par trun chip di Hồng Kông saong hu par tagaok nao  Thượng Hải hadei di labaih 3 mon ramik ngak dom bruk khik caga salamat. Biak patuah lac oh hu urang halei njauk hagait dalam bruk nan./.