Uan Tết Nguyên đán sak inegirai, akaok negar Võ Văn Thưởng saong dom urang lambaok hu nao cuh gilau di Labik Inem krung ilamo sajarah Thành Cổ Loa huyện Đông Anh, ban ine Hà Nội. Cuh gilau hadar prein yava di Patau An Dương Vương, dom urang hu mbaok hu brei mboh hatai thau dhar phol dom rai dahlau hu buh prein padang saong khik taneh ia, caong ka palei negar sron mbon, rahra salamat, taneh ia khang kajap, kaya mada. Cổ Loa lac labik inem krung ilamo sajarah biak hu yaom glaong di bangsa Việt Nam. Tapa nan, akaok negar Võ Văn Thưởng haong urang pan akaok Trung ương saong ban ine Hà Nội hu pala phun pahadar di Labik inem krung ilamo sajarah Thành Cổ Loa.

Mesup ini, Tỉnh ủy, HĐ bhap bini, UB MT negar VN tỉnh Đắk Lắk peih bruk taom mbaok 250 urang ilamu, văn nghệ sĩ saong urang ngak báo dalam tỉnh akaok thun bahrau sak anek girai 2024. Tapa nan, dalam bui sambai, dom urang lambaok hu maong iek danak dak daoh tamia ngan saong dom kadha ndung bak ilamu dom bhum palei haong dom janih alat ragam Tây Nguyên. Urang jeng hu pang pathau khan bruk ngak hu, dom rik daong di dom gah dalam thun tapa, ba tabiak dom panuac, dom hatai sahneng ka dom jalan ngak gah ilamu kong nghe, báo chí, văn nghệ dom thun anak tal.

Piah ba bui sambai, chreih chrai, pakacah gauk anit ranam taneh ia, chreih chrai ngak mbang, pala drak, dah page ini, 10 huyện, ban dalam tỉnh Kon Tum jak gauk peih bruk tabiak mbaok padang ngak palei pala bahrau saong đô thị văn minh. Tapa nan, tỉnh Kon Tum hu ba tabiak dom asal tantu cambaih laih, dalam nan pataom prein tame padang dom bruk ngak mbang, peih mbaok taneh, ngak pasiam veik mblang hamu, cak rok patagok pandap panda OCOP; padang ngak bahrau, ngak pasiam veik danak dak jalan mbak nao mai, kraong ribaong, sang ilamo; daong ka dom sang sarak kanja gaok kan kandah ngak pasiam veik sang danaok, pasiam veik bein phun cak rok bruk ngak mbang; paglaong bruk khik ramik saong cak rok patagok glai…

Akaok Mintri Jalan mbak Pajeng ba bahrau mbaoh tangin brei ngak bruk rami ramik, quy hoạch mblang kapal haoh Cà Mau vaktu 2021 – 2030, pamaong tal thun 2050. Quy hoạch Mblang kapal haoh Cà Mau brei tagok hu abih siam lagaih dom hagait daok hu urak ini, pabak ginup bruk pajeng ba, pambuak lagaih haong dom jalan pajeng ba karei, pambuak gauk khang kajap haong bruk khik kajap quốc phòng – an ninh, siam mekre salamat dalam tuk ngak, tuk pandar

Di labik tapen kraong Tiền di dalam huyện Cái Bè, tỉnh Tiền Giang hu rilo urang pah taneh di Kanja abih tukvak pah lac labaih 3 thun min jeng daok pandar. Jaik abih dom urang pah taneh lac dom urang raong ikan, pala phun mbang baoh, pala phun kiểng; abih di nyu nan lac hu 16 urang padang ngak sang khang pakajap, padang ngak labik pablei pandap mbang manyum, du lịch… ngak salih abih mbaok mata dom labik dut saong dahlau deih. 

Karja Tổng thống Mỹ Joe Biden bahrau khan lac brei buh tabiak 1,5 tỷ đô la piah daong sa Cty ngak chip komputer peih praong dalam taneh ia. Dom danak dak di Cty ini tui kuhria hu ba bruk ngak ka labaih 10 rabau menuac dalam 10 thun tal. Ini lac mbang ka 3 rajaei Mỹ daong jien tapak ka 1 Cty ngak chip bán dẫn tui hukum Chip & Khoa học hu mbaoh tangin thun 2022. Hukum ini brei adat rajaei buh tabiak labaih 52 tỷ đô la piah ngak pamadeih tagok veik bruk ngak chip computer di Mỹ, jeng yau jhul patagok dom bruk roh duah saong cakrok.

Yau yaok thun, Harei pataom kruac aik mbang ka 90 thun ini daok hu caong maong abih di France hu peih pakah di ban sit tapen tasik Menton. Sa dalam dom labik dui pachreih tuai damuai dui atah 2 adit ini lac bruk ramik ngak gheih tui asal kadha Thế vận hội Olympic 2024 bo France lac taneh ia dang tabiak peih ngak. Ndem tal Harei pataom kruac aik, rilo urang meda hadar tal dom janih ia la-an bingi hu ngak meng baoh kruac aik. Dom gah peih ngak kuhria lac hu 200 ribau tuai mai hu mbaok tame Harei pataom kruac aik thun ini. 

Cagau Bắc cực lac sa dalam dom janih cagau praong abih di dunya. Min tapa sa roh duah hu ba tabiak bahrau ini di dom urang ilamu Canada saong Mỹ mboh lac, janih cagau ini dak harei dak lavang lavaih kayua labik daok dak harei dak sit. Biến đổi khí hậu ngak brei cagau Bắc cực njauk tagok thu rilo jang dalam dom bilan brak dui atah.. Dom urang ilamu khoa học brei thau, meda lac jaik abih dom drei cagau jeng trun kilo biak khang, kuhria rah tapa, trun jaik 1 kg yaok harei, samu 21 kg dalam 3 adit./.