Akaok UBND TP.HCM Phan Văn Mãi bahrau hu panuac phê bình 4 mban praong di TP.HCM ka oh ngak catang bruk jhul samar peih ngak dom danak dak ba tal bruk phun jien brei masaiy đầu tư công Quý I ka oh ngak hu yau bruk ba tabiak di ban raya. Ong Phan Văn Mãi jeng kakei dom po buh jien tame pasang iek harak gar pambuak bruk hu mbaoh tangin blaoh, ngak cambaih laih bruk ngak di dom gah hu pambuak tal tui harak gar pambuak bruk, ieu kakei dom po thầu peih ngak tui njauk adat di harak pambuak bruk hu mbaoh tangin blaoh. Pataom prein tame peih ngak dom jalan langyah dalam bruk ngak, khik tani tanat dom bruk brei masaiy jien saong ngak salah danak dak tui njauk jalan ba tabiak hu mbaoh tangin blaoh.

UBND tỉnh Cà Mau bahrau peih bruk brei thau Sarak padang mBan tacei pato padang ngak huyện Ngọc Hiển mek hu chuẩn palei pala bahrau, saong taduan mek dom bruk daong padang huyện Ngọc Hiển mek hu chuẩn palei pala bahrau tukvak 2021-2025. Tal urak ini, kuhria rah tapa, yaok xã dalam huyện mek hu 15,4 tanut padang ngak palei pala bahrau. Dom gah, dom doanh nghiệp hu sanya daong 208 tỷ đồng piah huyện jhung langik di taneh ia, lac huyen Ngọc Hiển padang ngak palei pala bahrau.

Bộ Tư lệnh Quân khu 7 pambuak haong UBND tỉnh Bình Phước bahrau jao 93 baoh sang rahra jaik bilai bol lin di labik tapen negar, sang jaik taphia đồn biên phòng thun 2024. Dom baoh sang hu jao pak di labik rahra jaik taphia bilai khik iek di bol lin tapen negar Hưng Phước, labik rahra jaik taphia Đồn biên phòng Thanh Hòa (huyện Bù Đốp) saong labik rahra jaik taphia bilai khik iek di bol lin tapen negar Lộc Hòa, huyện Lộc Ninh. Yaok baoh sang praong 54m2, phun jien padang ngak lac 120 triệu đồng. dom baoh sang tuk mai tal daok thei jeng uan tabuan, saong brei mboh hatai kham merat padang mbang ngui, padang raidiuk di bhum taneh bahrau.

Trà Vinh lac tỉnh hu urang Khmer daok rilo abih dalam taneh ia, meblah jaik 32% menuac sia di tỉnh. Yaok thun, Trà Vinh jeng hu caga jien padai, prein yava piah ramik ngak pasiam, blei pandap pato bac di dom sang bac PT bangsa gam bac gam daok. Thun ini, dom sang bac PT bangsa gam bac gam daok dalam tỉnh hu buh brei labaih 48 tỷ đồng piah ngak pasiam patagok dom sang bac PT bangsa gam bac gam daok saong palahik bruk oh thau akhar haroh ka bhap bini bhum urang bangsa takik.

Harei pataom ahar meng kan Nam Bộ mbang ka XI thun 2024 ngan saong kadha “mbak carak pahe bingi gah maraong negar” hu peih tabiak di Cần Thơ meng harei 17 tal 21/4/2024, pataom hu labaih 100 urang ngak dalam taneh ia hu mbaok tame. Harei pataom thun ini hu peih tabiak ngan haong labaih 200 gian hàng ahar meng kan, pandap mbang, angan je di grauk labik. Harei pataom thun ini daok hu labik mayaih khan, parang iek Inem krung ilamo oh mboh di mata pakat negar bruk ngak tapei racam Thuận Hưng; parang iek, payak mbang oh mek jien ahar bánh xèo biak praong 4m.

Ndom ka bruk megei baoh taneh khang di Đài Loan (Trung Quốc) mesup 3/4, tui yaok pataom bahrau di abih, dom menuac metai dalam mbang megei baoh taneh ini, lac 9 urang, langiu di nan, daok hu labaih 800 urang njauk rambus saong 50 urang lahik. Bruk daong, duah urang gaok bala jeng daok hu ngak dalam samar drah piah daong ka yaok pluh urang daok gar dalam dom baoh sang jaleih. Urak ini, gah daong duah menuac khan lac meda hu rilo jang dom menuac njauk bala dalam dom harei anak tal. Dom chuyên gia khan lac meda daok hu dom dư chấn khang dalam dom harei anak tal.

Fubao – lac drei cagau trúc manek tabiak di mblang bein Everland saong diuk di Hàn Quốc jaik 4 thun tapa hu mai gilac Trung Quốc di harei 3/4 tui sanya di dunya. Labaih 6.000 urang takre hu mai pataom mbaok vil val piah hu maong mboh drei cagau bo drei anit ranam jaik 4 thun tapa mbang puac abiih, yaom lac langik hajan saong laar. Fubao manek tabiak di harei 20/7/2020, hu payua tal Hàn Quốc, brei mboh ka talei pambuak gauk di dua taneh ia Hàn Quốc saong Trung Quốc. Tui sanya khik ramik, drei cagau hu payua tabiak negar langiu hu mai gilac negar Trung Quốc dahlau di tuk umo 4 thun.

Jabat salamat pandap mbang di Liên minh châu Âu (EFSA) hu panuac brei thau dahlau ka sa mbang jit praong kum menuk ada praong meyah virus hu prein pambak meng menuac tapa menuac, kayua anek menuac kurang miễn dịch haong janih virus yau nan. Dalam pathau khan, EFSA brei thau lac dom mbang tamuh jit kum menuk ada dalam bilan ini nyu trun min jit ruak daok pambak praong tabiak tapa tal Nam Cực saong njaom mbak dak harei dak rilo tapa athur hu tasau. Bruk ini mbuan ngak brei jit ruak jeng sa kan kandah praong jang ka anek menuac./.