Taduan panuac da-a di Tong thong Hợp chủng quốc Hoa Kỳ Joe Biden, harei ini, Akok negar CHXHCN Viet Nam Võ Văn Thưởng saong diuk di ong haong Kapol pakat glong Viet Nam tabiak meng mblang kapal haok  Dunya Nội Bài, Ban ine Hà Nội tagok jalan  nao hu mbaok Adit Pakat glong Ginum biai Pambuak bruk Kinh tế châu Á -Thái Bình Dương (APEC) 2023 pambuak saong bruk dua gah pak di Hoa Kỳ meng harei 14 tal harei 17/11. Meng makna praong dalam di Nyaom biai dom urang pan akaok kinh te APEC thun ini saong dalam tuk talei rohim pambuak Viet Nam - Hoa Kỳ daok tagok khang kajap dalam tukvak tapa, mbang nao ngak bruk hu mbaok di Nyaom biai pakat glong  APEC saong dom bruk ngak di Hoa Kỳ di Akok negar Võ Văn Thưởng hu makna biak praong glong, dalam dom bruk pambuak dom gah jeng yau dua gah, daong khik ramik saong pakhang pakajap bruk khik brei sron mbon, tani tanat, siam lagaih ka bruk cak rok patagok di taneh ia.

Taduan mek panuac di urang Quốc hội di Mbang nyaom ka 6, harei ini, Ủy ban Thường vụ Quốc hội peih mbang nyaom, brei panuac ka bruk langyah, taduan mek panuac, rami ramik ngak pasiam dự thảo 7 danak dak hukum, dalam nan hu danak dak Hukum taneh riya (pasiam veik) saong rilo sarak hu makna. Mbang nyaom tui kuhria hu peih tabiak dalam 2 harei mateh, meng bier harei ini tal abih harei 16/11. Ủy ban Thường vụ Quốc hội daok brei panuac ka danak dak Sarak pasang iek asal kadha “bruk peih ngak dom Sarak di Quốc hội ka dom danak dak bruk ngak negar ka padang ngak palei pala bahrau vaktu 2021-2025, patrun kan kathaot khang kajap vaktu 2021-2025, cak rok patagok kinh tế - xã hội bhum urang bangsa takik saong bhum ceik tukvak 2021-2023".

Ban  Đà Lạt, tỉnh Lâm Đồng daok samar brei ramik ngak pasiam do thi, caga dom asar kadha piah peih ngak dom bruk praong dalam bilan 12 anak tal piah pamong tal pahadar 130 thun dak padang saong patagok. Gam haong dom danak dak pamong tal duh ka bhap bini saong tuai damuai tuk puac thun, ban Đà Lạt caga  peih rilo bruk ngak karei karei yau ye: Harei Pataom ragu ragam dunya thun 2023; melam pataom daoh tamia ilamu Viet Nam - Hàn Quốc; parang iek bruk ngak hu jak jeng kinh te - xa hoi di ban Đà Lạt; pahadar 130 thun Đà Lạt hu padang tabiak saong patagok, taduan angan ban hadah karah ka daoh tamia ragu ragam kayua UNESCO pok brei…jeng karja pak ini peih ngak pablak  tame piah pabak bruk ma-in sambai saong brei ka tuai damuai rivang iek.

Pambuak tal bruk saron mbon, tal maong 9 melam kabroi, Công an ban sit Bến Cát, tỉnh Bình Dương hu ngak salah bruk pasang iek labik rahtabiak bala ginuh gauk mangaok jalan mbak di radaih bồn saong radaih mac ngak ka 2 urang metai. Tui khau tin camriep, bala rahtabiak di maong 6 meteh melam kabroi di jalan ĐT.748 (xã An Điền, ban sit Bến Cát, tỉnh Bình Dương). Tukvak nan, dua urang kumei pajeng gauk di mangaok radaih mac biển số tỉnh Đắk Lắk, daok nduac di jalan ĐT.748. Tuk 2 urang nan nao tal labik tapa xã An Điền, ban sit Bến Cát ye paoh tame radaih bồn nduac gam jalan. Hadei di tuk paoh tame, dua urang kumei jaleih trun jalan saong njauk  radaih bồn lik tame rup, metai pak di labik. 

Jabat CSĐT Công an huyện Đầm Dơi, Cà Mau harei kabroi ba tabiak langyah, mek kareik ong Trần Minh Đắc, umo 55 thun, daok di Ban Phú Quốc, Kiên Giang, daok di puk Trung Can, xã Tân Trung, huyện Đầm Dơi. Pambuak tal bruk kamuan umo 3 thun njauk ame raong taong paoh, Jabat CSĐT Công an huyện Đầm Dơi brei thau, hu ginup asar kadha piah ndom lac ong Đắc taong paoh ngak pap anek raong T.N.T tui paka 2 Điều 185 Bộ luật Hình sự. Urak ini kamuan T.N.T hu Sở LĐTB saong XH Cà Mau taduan tui jalan “ iek glang samar chip” saong ba tame Pasak Daong xa hoi tinh Cà Mau raong, iek glang. Bruk nan daok cang pasang iek laka piah ba tabiak jalan langyah patui di nan.

Harei kabroi, urang brei panuac di điện Kremlin Dmitry Peskov brei thau lac Tổng thống Nga Vladimir Putin halain hatain ndem mayai nao mai haong Thủ tướng Đức Olaf Scholz. Tui urang brei panuac di điện Kremlin, Tổng thống Putin tuk halei jeng halain hatain ngan haong dom bruk ndem mayai nao mai, ginum biai, abih di nyu nan lac pakat glaong di abih, min dom mbang ginum biai brei hu kein lagaih. Dahlau di nan, Thủ tướng Đức Olaf Scholz brei thau ka bruk njauk ngak dalam bruk khik tani tanat ndem mayai nao mai haong Nga, abih di nyu nan lac ngan haong Tổng thống Putin ka bruk langyah bruk mesuh gauk di Ucraina. 

Dalam mbang salih birau rajaei praong akaok meti hadei di jaik 13 bilan tagok pan karja, Thủ tướng Anh Rishi Sunak harei kabroi ba Thủ tướng dahlau diah David Cameron tame veik rajaei ngak Ngoại trưởng. Bruk salih birau rajaei praong dalam mbang ini hu taong yaom lac jalan ngak suai lavik di Thủ tướng Sunak piah pachreih  dom đồng minh saong atah klak dom mentri bo Jabat Thủ tướng sahaneng lac oh pabak hatai caong khin. Ong David Cameron njuak brei padeih ngak Thu tuong hadei di tuk duah thau hatai bhap bini ka bruk Anh tabiak truh Lien minh chau Au (Brexit) di thun 2016 saong jaik abih oh hu bruk chính tri halei kuhria meng nan mai.

Bier harei kabroi, di ban ine Vientiane, Lào, Mintri khau tin, ilamo saong Du lịch Lào hu peih họp báo brei thau Asal kadha – angan je ka thun du lịch Lào 2024. Tui amuk Suansavanh Viyaketh, Akaok Mintri Khau tin, Ilamo saong Du lịch Lào, du lịch lac sa gah kinh tế praong, rik tame biak praong ka bruk cak rok patagok kinh tế - xã hội di taneh ia. Kayua yau nan ye, Rajaei Lào thau lac du lịch ilamo, sajarah, langik tasik,… lac dom prein khang piah dui pachreih dak harei dak rilo tuai damuai mai tal taneh ia ini, rik tame ba bruk ngak, patagok jien mek tame ka rahra saong jhul khang bruk ngak mbang. Asal kadha saong angan je ka thun du lịch Lào 2024 lac “Du lịch salamat, ba drei tame ilamo, sajarah saong langik tasik” ngan haong thaot binguk anek limen gam haong khèn Lào ngak angan je patuah jamo ka thun du lịch./.