Suối Trai lac xã bhum glaong di huyện Sơn Hòa, tỉnh Phú Yên, atah di ban Tuy Hòa labaih 50km. Pak ini hu mikva bangsa Ê Đê daok saong hu dom yaom glaong ilamo, dom rija roya ndung mbak ilamo siam makre. Ndem mayai haong miikva dom bangsa pak xã Suối Trai, Akaok negar Võ Văn Thưởng khan lac, biak bui sambai anak dom jak jeng dalam bruk ngak mbang, paglaong raidiuk, dak padang kanja, rahra di mikva dalam palei, xã. Akaok negar jia lac dalam tukvak anak tal, Đảng bộ, kanja saong rahra di xã Suối Trai daok ngak hu dom jak jeng bahrau di dom gah karei karei.

Meng harei 22 tal harei 26/11, di palei Ilamu – Ravang iek dom bangsa Việt Nam hu peih adit “Jum pataom dom bangsa – Inem krung ilamu Việt Nam” thun 2023. Di harei nan, hu mbaok di labaih 200 urang dom bangsa yau ye Tày, Nùng, Mường, Thái, Khơ Mú, Tà Ôi, Bahnar, Cơ Tu, Xê Đăng, Gia Rai, Raglai, Dao, Mông,… haong dom kapul nghệ nhân mai meng dom tỉnh dalam taneh ia. Adit “Jum pataom dom bangsa – Inem krung ilamu Việt Nam” thun ini hu dom bruk ngak praong yau ye danak dak peih mbaok adit “Jum pataom dom bangsa – Inem krung ilamu Việt Nam” saong Harei pataom parang iek phun Nêu, daoh tamia, thể thao saong ravang iek dom bangsa Việt Nam mbang ka II; Parang iek “Ilamu dom bangsa Việt Nam” ngan haong 160 blah rup thaot ka 54 bangsa Việt Nam…  

Kapul urang kumei Việt Nam pakat negar bahrau peih bruk jao Jai Chung kết pakat negar Mbang pakacah paneh kadha pathau khan paglaong hatai sahaneng ka bruk samu gauk di urang kumei saong urang likei ka uranaih bhum bangsa takik saong bhum ceik mbang ka 1 thun 2023. Bruk ini daok bruk peih ngak Danak dak 8 “peih ngak bruk samu gauk di urang kumei saong urang likei saong langyah dom bruk samar drah ngan haong urang kimei saong uranaih kumei” di Danak dak bruk ngak negar cak rok patagok kinh tế - xã hội bhum mikva bangsa takik saong bhum ceik vaktu 2021-2030. Tapa dom kadha payua mai, bruk pakacah gam brei mboh dom bruk caik tabiak ngak kan kandah tal raidiuk, bac taa di uranaih, gam pathau khan dom asal kadha siam lagaih tui mata maong di uranaih ka sa baoh sang haniem phul, salamat, samu gauk.

Harei kabroi di sang rông palei Ia Gri (xã Chư Đang Ya, huyện Chư Păh, tỉnh Gia Lai), UBND huyện Chư Păh hu ngak adat tamat Harei pataom bingu dã quỳ - ceik pui Chư Đang Ya thun 2023 haong rilo bruk ngak chreih chrai. Dalam nan njauk ndom tal di abih lac dom danak dak: Parang iek kong chiêng; adat “Uan padai bahrau”; ngak iek bruk pak yot, menyim khan bai, sarak kayau, ngak alat ragam, pandap ngak nong; pakacah dom kadha me-in meng kan yau ye jhul brak, dui co, nao cà kheo; ndik ceik Chư Đang Ya; parang iek dom pandap di palei,… Langiu di nan daok hu dom bruk ilamu, daoh tamia bhap bini, yaih khan du lịch, darak kaya nong siam, hacih. Tapa nan, peih tabiak jalan piah padang pandap du lịch karei di huyện Chư Păh jeng yau di tỉnh Gia Lai. 

Tỉnh Sóc Trăng hu labaih 30% rahra lac mikva bangsa Khmer. Tỉnh urak ini hu 10 sang bac gam bac gam daok, ngan haong 102 tal bac saong labaih 3.350 anek saih bhum bangsa tui bac. Meng thun 2022 tal urak ini, Sở hu jao ngak po buh jien tame ngak pasiam veik cơ sở vật chất 5 sang bac gam bac gam daok, ngan haong phun jien abih tih labaih 54 tỷ đồng, meng Danak dak bruk ngak negar ka bruk cak rok patagok kinh tế - xã hội bhum mikva bangsa takik saong bhum ceik. Tal urak ini, dom sang bac gam bac gam daok di dalam tinh dak harei dak hu cak rok patagok. Anek saih bangsa takik, anek saih bhum atah biyah, bhum kinh tế xã hội biak kan kandah hu kein lagaih piah bac taa, ba kein lagaih piah cak rok patagok urang ngak hu ilamo pabak ka bruk cak rok patagok kinh tế - xã hội di bhum palei.   

Sa urang ngak praong gah quốc phòng Mỹ bahrau khan lac dom kapul di taneh ia ini harei kabroi (12/11) hu 2 mbang cuh meng kapal haoh tame Syria piah taong kol bo Mỹ mboh lac hu pambuak bruk haong Iran. Bruk ini lac bruk ngak bahrau abih anak dom mbang cuh tame dom lin di Mỹ  daok di Syria haong Iraq. Urang ngak praong ini brei thau lac bruk cuh tame nan bahrau rah tabiak dom mon, labik njauk cuh tame lac sa labik khik piah phao ndao saong sa jabat dang akaok tacei ba saong pasang iek. Urak ini Mỹ daok taong yaom khut khat saong metai lahik di labik cuh tame ini.      

Harei kabroi, Đức Giáo hoàng Francis hu ndom veik panuac ieu padeih bruk mesruh gauk di Israel saong urang Palextin, gam tui di nan jeng jak ba bruk daong pahla “rilo jang veik” ka dải Gaza. Tui Đức Giáo hoàng, urang njauk rambuac di Dải Gaza njauk hu sangka iek glang y tế biak samar drah, bruk daong khik rahra njauk hu tani tanat saong dom urang njauk Hamas cap khik njauk hu palao. Brei panuac anak rilo manuac di Quảng trường Thánh Pi-tơ hadei di mbang cầu nguyện yaok adit, Đức giáo hoàng Francis ndem lac phao ndao oh tuk halei ba mai saron mbon saong bruk mesuh gauk oh njauk peih praong. Đức giáo hoàng jeng jak ba padang dom jalan ngak pahla saong njauk hu langyah ka dua taneh ia piah padeih bruk mesuh gauk di Israel - Hamas.

Takik abih 36 urang ngak daok gar gah dalam hadei di tuk sa jalan lubang daok padang ngak nyu jaleih di Uttarkashi dalam bang Uttarakhand, Tây Bắc Ấn Độ. Tui panuac khan di cảnh sát pak nan, sa binah jalan lu bang  daok padang ngak nyu jaleih di mon 4 saboh harei kabroi (12/11). Binah jaleih daok atah di pabah mbang lubang jaik 200 mét. Dom kapul daong duah pakat negar di Ấn Độ saong cảnh sát pak nan hu ba menuac nao daong duah. Tui kuhria, bruk daong duah abih 2-3 harei piah daong dom urang ngak daok gar gah dalam jalan lubang./.