Lambaok ka urang pan akaok Ndang, Kanja saong lac urang bac pak ini dahlau deih, akaok negar Võ Văn Thưởng brei mboh hatai biak uan tabuan saong drut drui tuk mai rivang sang bac dalam dom harei bo dalam taneh ia daok pamaong tal pahadar harei gru pato Việt Nam 20/11. Akaok negar jeng hu payua panuac tangi sua saong panuac tadhau ayuh siam makre di abih tal dom cei gru, anai gru di harei 20/11. Meng labaih 65 thun dak padang saong praong tagok, kapul gru pato di sang bac tuk halei jeng pabak, parilo manuac urang, paglaong ilamo, hu biak rilo ilamo dalam bruk roh duah, pato magru. Rilo giáo sư, tiến sĩ mek hu rilo angan praong glaong  di gah pato magru dalam saong langiu taneh ia, hu sinh viên saong rahra biak anit ranam, iek praong.

Kapul Room to Read pambuak bruk haong Mintri Pato Megru bahrau brei thau bruk peih tabiak danak dak patagok sap ndom panuac puac ka anek saih tiểu học di Việt Nam. ​Danak dak piah paglaong sap Việt ka anek saih bangsa takik, saong daong ka dom tỉnh ban padang 100 gilang tapuk bahrau di Việt Nam. Tui kuhria, danak dak meda ba mai kein laba ka labaih 60.000 uranaih dalam taneh ia. Urak ini, uranaih dom bangsa takik daok gaok kan kandah dalam bruk ndom puac sap Việt meng tal 1, ngak kan kandah dalam bruk bac ta-a di sang bac. Nan ye, tal bac hu daong ka dom adei paglaong sap Việt, ba chreih chrai dalam bac da-a.

Bộ Chỉ huy Bol lin Biên phòng tỉnh Đắk Lắk pambuak haong Jabat rayo sap ndem VN daok di Tây Nguyên haong dom urang buh jien tame peih bruk jao alin “Baoh sang bhum tapen jalan” ka dom sang kan kathaot gaok kan kandah di xã biên giới Ea Bung, huyện Ea Súp. ​Hadei di jaik 3 bilan padang ngak, baoh sang pakat 4, praong labaih 90 m2 hu ngak salah saong hu jao ka sang ong Hoàng Minh Lý, umo 79 thun, daok di puk 8, lac sang kan kathaot, gaok kan kandah ka sang danaok. Baoh sang hu phun jien buh tame abih tih labaih 150 triệu đồng, dalam nan hu labaih 80 triệu đồng hu dom doanh nghiệp rik jien tame daong, yaom jien daok veik kayua gauk gar dalam sang daong saong hu mbaok tame rik prein padang ngak di dom urang jakar bol lin di Đồn Biên phòng pabah mbang negar Đắk Ruê.

Xã Tâm Thắng, huyện Cư Jút, tỉnh Đắk Nông bahrau tabiak mbaok Kapul daoh tamia buôn Nui. Ini lac bruk ngak ka 6 – Danak dak bruk ngak negar patagok KTXH bhum urang bangsa takik saong bhum ceik. Hu thau, kapul daoh tamia hu 28 urang , kayua ong Y Sim Ê Ban dang akaok. Kapul daoh tamia ngak bruk tui nyaom, yau ye: daoh saong pato dom kadha daoh bhap bini Ê đê; ngak saong ma-in dom lat ragam, taong cồng chiêng saong paneh tabiak dom kadha chiêng bahrau, mbang huak, menyim khan bai, kapul tamia… Bruk tabiak mbaok Kapul daoh tamia buôn Nui piah daong khik ramik, patagok yaom glaong ilamu siam mekre meng kan di dom bangsa takik pambuak haong cakrok du lịch.  

Pasak pathau khan bruk magei baoh taneh saong brei thau ka bruk sóng thần - Viện Vật lý Địa cầu, Viện Hàn lâm Ilamo saong công nghệ Việt Nam dah page ini tabiak panuac lac, di labik huyện Kon Plông, tỉnh Kon Tum bahrau rahtabiak sa mbang magei baoh taneh khang 4 độ, dalam labaih 8,1 km,  saong lac bala pakat 0. Dahlau di nan, jeng dalam dah page ini, Pasak pathau khan magei baoh taneh saong pathau khan ka bala sóng thần jeng hu mboh sa mbang magei baoh taneh khang 3,0 độ (lac bala pakat 0) rahtabiak di labik huyện Kon Plông, tỉnh Kon Tum. Pasak ini jeng brei thau lac, jeng daok tui iek dom mbang magei baoh taneh ini.

Rajaei Malaysia meda samar pasang iek panuac caong tagok yaom brah dalam taneh ia piah khik kein laba di dom gah hu mbaok tame chuỗi sản xuất, abih di nyu lac urang ngak nong. Tui nan, taneh ia ini caong tagok yaom brah mbong patih pala dalam taneh ia, meng 2,6 Ringgit tagok 3,2 Ringgit/1 kg (lac meng 13.000 VNĐ tagok 16.000 VNĐ) meda samar hu pasang iek tui jalan kuhri kuhria kein laba di dom gah, lac urang nong, urang pablei salih saong urang blei mbang. Tui yaok pataom, gah ngak brah di Malaysia tok pabak hu 70% brah mbang dalam taneh ia, nan ye taneh ia ini brei blei brah mbong patih meng Ấn Độ, Thái Lan, Việt Nam saong Campuchia.

Dalam sa kham marat bahrau piah trun manieng bruk tathuak nerak carbon, pacang biến đổi khí hậu, Indonesia hu ba manjek diesel sinh học sarau haong manjek cọ tame ngak menyek nduac ka radaih pui. Lac taneh ia ngak tabiak manjek cọ praong abih di dunya, Indonesia daok duah jalan ngak bahrau piah pandar manjek cọ, dalam nan hu bruk cak rok patagok danak dak manjek diesel sinh học njauk pandar ngan haong hàm lượng manjek cọ 30% - 35% hu ieu lac B30, B35. Puac adit blaoh, urang pan akaok Công ty jalan pasei quốc doanh Indonesia khan lac daok brei pandar pandar manjek diesel sarau haong manjek cọ Biosolar B30 piah nduac radaih pui, rik tame ngak trun manieng bruk tachrauk alam langik tasik di Indonesia.

Harei kabroi, Rajaei Thái Lan khan lac da-a cảnh sát Trung Quốc hu mbaok tame pasang iek dom labik du lịch piah patagok hatai jia di tuai du lịch Trung Quốc, pamaong tal bruk dui pachreih 4,4 triệu tuai Trung Quốc mai tal Thái Lan dalam 2 bilan puac thun ini. Akaok Tổng cục Du lịch Thái Lan ndom lac, bruk ini piah taoh talaih dom suh sah gah an ninh, khik kajap siam mekre ka tuai tal Thái Lan, abih di nyu lac tuai Trung Quốc. Tui kuhria, harei 15/11 ini, dom gah chức năng di Thái Lan ginum biai haong gah Trung Quốc ka jalan peih ngak bruk ini./.